(កំពង់ធំ)៖ រដ្ឋបាលខេត្តកំពង់ធំ និងលោកស្រី ព្រមទាំងមន្ត្រីរាជការ កងកម្លាំងសមត្ថកិច្ច ប្រជាពលរដ្ឋបានចូលរួមក្នុងពិធីទទួលទេព្តាឆ្នាំថ្មី ឆ្នាំថោះ បញ្ចស័ក ព.ស.២៥៦៧ ព្រះនាងកិមិរាទេវី ជាបុត្រីទី៦នៃកបិលមហាព្រហ្ម និងលេងល្បែងប្រជាប្រិយខ្មែរ ដែលពិធីនេះបានប្រារព្ធធ្វើឡើងនៅសួនស្ទឹងសែនខេត្តកំពង់ធំ នាសៀលថ្ងៃទី១៤ ខែមេសា ឆ្នាំ២០២៣។
បើតាមសៀវភៅមហាសង្ក្រាន្តបានឱ្យដឹងថា រាជបុត្រីទី៦កបិលមហាព្រហ្ម ព្រះនាមកិមិរាទេវី ជាមគ្គនាយិកាកាន់តំណែងឆ្នាំនេះ ដែលទ្រង់បានយាងចុះមកនៅវេលាម៉ោង៤រសៀល ជាថ្ងៃចូលឆ្នាំថោះ បញ្ចស័ក (ជាវារៈមហាសង្ក្រាន្ត)។ ចំពោះការកំណត់ខែថ្ងៃ និងម៉ោងពេលដែលឆ្នាំចាស់ត្រូវផុតកំណត់ ហើយទេព្តាឆ្នាំថ្មីត្រូវចុះមកទទួលតំណែងពីទេព្តាឆ្នាំចាស់នោះ គឺគេអាចដឹងបានដោយប្រើក្បួនហោរាសាស្ត្របុរាណ គឺក្បួនមហាសង្ក្រាន្ត។
ទេវតាដែលបានមកកាន់តំណែងគ្រប់គ្រងក្នុងឆ្នាំថោះនេះ គឺគង់នៅលើចាតុម្មហារាជិកាអម្ពរពណ៌សេត (ស) លម្អនៅព្រះកាណ៌ដោយសៀតផ្កាចង្កុលណីអភរណៈបុស្សរាគ័មភក្សាហារទ្រង់ចេកណាំវ៉ា (សោយចេកណាំវ៉ា) ចំណែកព្រះហស្តស្តាំទ្រង់ព្រះខ័ន ឯព្រហស្តឆ្វេងទ្រង់ពិណ គង់អង្គុតពាក់ឆៀង បើកព្រះនេត្រនៅលើខ្នងមហិង្សា (ក្របី) ជាយានពាហនៈ។
គួរបញ្ជាក់ថា ខេត្តកំពង់ធំបានរៀបចំសង្ក្រាន្តកំពង់ធំ ដែលមានការប្រគំតន្ត្រីល្បែងប្រជាប្រិយ និងល្បែងផ្សេងៗទៀតសម្រាប់ឱ្យប្រជាពលរដ្ឋទស្សនា និងលេងកម្សាន្តដូចជា
ការសម្ដែងរបាំ សិល្បៈ តន្ត្រីយុវជន ការរាំម៉ាឌីស៊ុន អបអរសាទរឆ្នាំថ្មីរបស់កងកម្លាំងយោធាតំបន់ប្រតិបត្តិការសឹករងខេត្ត និងចូលរួមទស្សនាលេងកម្សាន្តល្បែងប្រជាប្រិយប្រពៃណីខ្មែរតាមផែននីមួយៗ ជាមួយនឹងលោកគ្រូអ្នកគ្រូ យុវជនយុវនារី រួមមានល្បែងវាយក្អម ទូលក្អម លោតបាវ ចោលឈូង រត់ជាគូដាក់ប៉ោងៗជាប់នឹងក្បាល បិទមុខបញ្ចុកចេក រត់ប្រណាំង ពាំពងមាន់ដាក់ស្លាបព្រា បោះអង្គុញ លាក់កន្សែង ទាញព្រ័ត្រ ចាប់កូនខ្លែង ប៉ោងៗរួមមិត្ត ប្រដាល់បិទមុខ ឡើងសសរខ្លាញ់យករង្វាន់ បិទមុខចាប់ទាក្នុងទ្រុង ទាញព្រ័ត្រមហារំអិល ទាត់បាល់មហារំអិល និងទស្សនីយភាពការរាំជាក្រុម៕
