(ភ្នំពេញ)៖ ក្រុមសហភាពសហព័ន្ធយុវជនកម្ពុជា ខណ្ឌឫស្សីកែវជិត១០០នាក់ ដែលមកពីតាមបណ្ដា ភូមិ-សង្កាត់ទាំង៦ ក្នុងខណ្ឌបានជួបសំណេះសំណាល និងទទួលឯកសណ្ឋានពីលោក ជា ពិសី អភិបាលខណ្ឌឫស្សីកែវ និងជាប្រធានសហភាពសហព័ន្ធយុវជនកម្ពុជាខណ្ឌ ដែលបានធ្វើឡើងនារសៀលថ្ងៃអាទិត្យទី១០ ខែកក្កដា ឆ្នាំ២ ០១៦នេះ ស្ថិតក្នុងសាលប្រជុំ អាគារA នៃសាលាខណ្ឌ​ឫស្សីកែវ​។

លោក ជា ពិសី បានថ្លែង និងលើក ឡើងទៅកាន់ក្រុមយុវជនទាំងអស់ថា ការសំណេះសំណាល និងពិភាក្សាគ្នារវាងក្រុមយុវជន និងប្រធានសហភាពសហព័ន្ធយុវជនកម្ពុជា របស់យើងអាច​មានថ្ងៃនេះ​បាន ក៏ព្រោះតែយើងទាំងអស់គ្នាមានថ្ងៃ២ធ្នូ និងថ្ងៃ៧មករា ទើបមានថ្ងៃនេះ។ លោក ជា ពិសី បានបន្តថា ដើម្បីបង្កើនភាពស្និតស្នាល និងរាយការណ៍ជូនរាល់សកម្មភាព មិនប្រក្រតីផ្សេងៗ ដែលកើត​មានតាមបណ្ដាមូលដ្ឋាន សូមឲ្យក្រុមយុវជនជួយសហការ រាយការណ៍មកប្រធានសហភាពសហព័ន្ធយុវជនកម្ពុជា ខណ្ឌឫស្សីកែវតាមរយះឆាត Facebook ផ្ទាល់ ដែលមានលោកអភិបាលជាប្រធាន។

លោក ជា ពិសី បានបន្ថែមថា បន្ទាប់ពីបញ្ចប់នៃកិច្ចសំណេះសំណាលនេះ ក្រុមយុវជនទាំងអស់ ដែលមានវត្តមាននាខណៈនេះ ត្រូវបានចូលរួមពិសារអាហារយ៉ាងសប្បាយរីករាយរួមគ្នា ដើម្បីបង្កើន​ភាពស្និត​ស្នាលឲ្យកាន់តែស៊ីជម្រៅ រវាងប្រធានសហភាព​សហព័ន្ធយុវជនកម្ពុជា ខណ្ឌឫស្សីកែវ និងក្រុមយុសហភាពសហព័ន្ធយុវជនកម្ពុជាជាង១០០នាក់ មកពីសង្កាត់ទាំង៦ ទទួលបានឯក​សណ្ឋាន​ពីអភិបាលខណ្ឌឫស្សីកែវ៕