(កំពត)៖ លោក ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការរៀបចំដែនដីថ្នាក់ជាតិ នាថ្ងៃទី៨ ខែមេសា ឆ្នាំ២០២៣ បានដឹកនាំក្រុមមន្ត្រីជំនាញ ចុះត្រួតពិនិត្យវឌ្ឍនភាព នៃការងារស្ថាបនាផ្លូវមេ តភ្ជាប់ពីផ្លូវជាតិលេខ៤ ឆ្ពោះទៅលើភ្នំបូកគោ ដែលជាផ្លូវបម្រើដល់ចរាចរណ៍ និងការដឹកជញ្ជូនក្នុងតំបន់។
ពិធីនេះក៏មានការចូលរួមពីអ្នកឧកញ៉ា ម៉ុង ឬទ្ធី អគ្គនាយកក្រុមហ៊ុន ម៉ុង ឫទ្ធី គ្រុប, លោក នេត្រ ភក្រ្តា រដ្ឋលេខាធិការក្រសួងបរិស្ថាន, លោក យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន, លោក គួច ចំរើន អភិបាលខេត្តព្រះសីហនុ រួមទាំងមន្ត្រីពាក់ព័ន្ធជាច្រើនរូបទៀតផងដែរ។
ថ្លែងនាឱកាសនោះលោកឧបនាយករដ្ឋមន្ត្រី ជា សុផារ៉ា បានឱ្យដឹងថា គិតមកដល់ពេលនេះ ការស្ថាបនាផ្លូវនេះបានឈូសឆាយតភ្ជាប់ជាស្ថាពរហើយ ទោះបីផ្លូវនេះមិនទាន់បានទៅជាផ្លូវរាបស្មើរ តែយើងអាចតភ្ជាប់បាន ធ្វើឱ្យរថយន្តអាចបើកបរ បានក្នុងល្បឿនពី ១៥ទៅ២០គីឡូម៉ែត្រក្នុងមួយម៉ោង ហើយគម្រោងការនេះពិតជាបានផ្តល់សក្តានុពលខ្ពស់ បើយើងមានប្រព័ន្ធហេដ្ឋារចនាសម្ព័ន្ធតភ្ជាប់ពីផ្លូវល្បឿនលឿនមកដល់ផ្លូវជាតិលេខ៤ ហើយមកដល់ចំណុចគីឡូម៉ែត្រលេខ១៥៨+២៩១ យើងនិងបានពីរផ្លូវឡើងហើយចុះ។
លោកឧបនាយករដ្ឋមន្រ្តី បានសង្កត់ធ្ងន់ថា «យើងបានចាប់ដៃគ្នាធ្វើឱ្យផ្លូវនេះ ដើម្បីឱ្យបានសម្រេចដូចទៅនិងបំណងប្រាថ្នាដែលយើងបានជួបគ្នាកាលខែមករា ឆ្នាំ២០២២ ហើយថ្ងៃទី៨ ខែមេសា ឆ្នាំ២០២៣នេះ គឺយើងបានបំពេញបំណង ប្រាថ្នាស្របតាមអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រី ទៅលើគម្រោងសាងសង់ផ្លូវថ្មីតភ្ជាប់ពីផ្លូវជាតិលេខ៤ ត្រង់ចំណុចគីឡូម៉ែត្រលេខ១៥៨+ ២៩១ នេះផងដែរ»។
នៅក្នុងឱកាសនោះ អ្នកឧកញ៉ា ម៉ុង ឬទ្ធី បានឱ្យដឹងដែរថា «យើងបានចាប់ដៃគ្នាជាមួយក្រសួងដែនដី ដើម្បីអភិវឌ្ឍន៍ផ្លូវថ្មីនេះ កាត់ចំការដូងប្រេង ទោះបីជាយើងត្រូវលះបង់យ៉ាងណាក៏ដោយ ត្រូវតែអនុវត្តតាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ដើម្បីឈូសដូងប្រេងចេញប្រវែង១៥គីឡូម៉ែត្រ អស់ដូងប្រេងជាង ៣ពាន់ដើម ដើម្បីឱ្យកើតចេញជាផ្លូវនេះទុកជាប្រវត្តិសាស្ត្រសម្រាប់ប្រជាជនយើងជាន់ក្រោយ»។
លោក ស្វាយ វុឌ្ឍី តំណាងក្រុមហ៊ុន សុខា អូតែល បានឱ្យដឹងដែរថា ចំពោះការស្ថាបនាផ្លូវថ្មីមួយខ្សែ ដែលជាផ្លូវមេ ដែលត្រូវស្ថាបនាតភ្ជាប់ពីផ្លូវជាតិលេខ៤ បានធ្វើឡើងនៅត្រង់គីឡូម៉ែត្រលេខ ១៥៨+២៩១ ក្នុងឃុំកំពង់សិលា ស្រុកព្រៃនប់ ខេត្តព្រះសីហនុ ឆ្ពោះទៅលើភ្នំបូកគោ ភ្ជាប់ជាមួយកំណាត់ផ្លូវវាលស្រែ៥០០ ដែលមានប្រវែងប្រមាណ ៦១គីឡូម៉ែត្រ។
ផ្លូវនេះមានទទឹង ២០ម៉ែត្រ ដែលចែកចេញជាផ្លូវរថយន្តទទឹង ៣.៥ម៉ែត្រ ចំនួន ២គន្លង ផ្លូវម៉ូតូទទឹង ៣ម៉ែត្រ សង្ខាងចំនួន ២គន្លង និងចិញ្ចើមផ្លូវទទឹង ៣.៥ម៉ែត្រសង្ខាង ដែលសាងសង់ជាផ្លូវក្រាលកៅស៊ូ (AC)។ ផ្អែកតាមស្ថានភាពដីបត់បែនឡើងចុះនៅទីនេះ និងដើម្បីធានាភាពរឹងមាំយូរអង្វែងផង ក្រុមហ៊ុនមានគម្រោងចាក់បន្ថែមនូវកម្រាលបេតុងកម្រាស់ ២០០មីលីម៉ែត្រ ហើយអ៊ុតកៅស៊ូពីលើ។ មកដល់ពេលនេះក្រុមហ៊ុនបានធ្វើការវាស់ស្ទង់ ឈូសឆាយ សម្អាតចេញជាគន្លងតួផ្លូវ ហើយបានតភ្ជាប់ទាំងស្រុង ពីផ្លូវជាតិលេខ៤ រហូតទៅដល់កំណាត់ផ្លូវវាលស្រែ៥០០ នៅលើខ្នងភ្នំបូកគោ ដែលឥឡូវនេះ អាចធ្វើចរាចរណ៍ បានជាបណ្តោះអាសន្ន ដោយរថយន្តប្រភេទខ្ពស់ និងម៉ូតូ។
លោក ស្វាយ វុឌ្ឍី បានឱ្យដឹងទៀតថា ដល់ពេលនេះការសាងសង់សម្រេចបានប្រមាណ ៣០% ហើយនឹងត្រូវបន្តធ្វើជាជំហានៗ ជាផ្លូវម៉ាកាដាំសិន ទៅតាមស្ថានភាពសេដ្ឋកិច្ច និងការអភិវឌ្ឍទីផ្សារបច្ចុប្បន្ន គឺធ្វើយ៉ាងណាឱ្យកំណាត់ផ្លូវនេះបានតភ្ជាប់និងអាចធ្វើចរាចរណ៍បានសិនផងដែរ។
គួរបញ្ជាក់ថា ក្នុងឱកាសនេះលោកឧបនាយរដ្ឋមន្ត្រី ជា សុផារ៉ា ក៏បានអញ្ជើញពិនិត្យដំណើរការសាងសង់ ព្រះពុទ្ធប្បដិមាកម្ពស់១០៨ម៉ែត្រ នៅលើខ្នងភ្នំបូកគោ ក្នុងឧទ្យានជាតិព្រះមុនីវង្ស «បូកគោ» ខេត្តកំពត ស្របតាមក្បួនខ្នាត ទំនៀមទម្លាប់ ព្រះពុទ្ធសាសនា និងរចនាប័ទ្មជាតិ ដែលមានការឯកភាពពីក្រុមការងារអន្តរក្រសួង និងការឯកភាព គាំទ្រពីគណៈសង្ឃនាយកនៃព្រះរាជាណាចក្រកម្ពុជា៕
