(កណ្តាល)៖ លោក យូ សិរីវុឌ្ឍ ប្រធានក្រុមការងារកសាងសមាជិកបក្សក្នុងជួរកម្មករ និយោជិត តាមរោងចក្រក្នុងខេត្តកណ្តាល និងលោក ភឺន ផល្លា ជំនួយការសម្តេចតេជោប្រធានគនបក្សប្រជាជនកម្ពុជា រួមជាមួយក្រុមការងារ បានចុះជួបសួរសុខទុក្ខ និងសំណេះសំណាលជាមួយកម្មករ និយោជិតប្រមាណ ៤២០នាក់។
ពិធីសំណេះសំណាលធ្វើឡើងកាលពីរសៀលថ្ងៃទី០៨ ខែមេសា ឆ្នាំ២០២៣ នៅក្រុមហ៊ុនផ្លររីស ហ្គាមេន ក្នុងភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល។
ក្នុងជំនួបនោះ លោក យូ សិរីវុឌ្ឍ និងលោក ភឺន ផល្លា បានសម្តែងការស្វាគមន៍ប្រកបដោយក្តីរីករាយជាពន់ពេកចំពោះវត្តមានកម្មករ និយោជិតទាំងអស់ឆ្លៀតពីការងារចូលរួមក្នុងពិធីសំណេះសំណាល។
ប្រធាន និងអនុប្រធាន ក្រុមការងារកសាងសមាជិកបក្សក្នុងជួរកម្មករ និយោជិត តាមរោងចក្រក្នុងខេត្តកណ្តាល បាននាំយកនូវការផ្តាំផ្ញើសាកសួរសុខទុក្ខ និងក្តីនឹករលឹករបស់សម្តេចតេជោ ហ៊ុន សែន ជូនដល់កម្មករ និយោជិត ដែលបានចូលរួមទាំងអស់ផងដែរ។
ក្នុងជំនួបក្រោមបរិយាកាសដ៏ស្និទ្ធស្នាលនោះ លោក យូ សិរីវុឌ្ឍ និងលោក ភឺន ផល្លា បានគូសរំលេចពីជោគជ័យរបស់រាជរដ្ឋាភិបាលដឹកនាំដោយសម្តេចតេជោក្នុងការយកឈ្នះលើជំងឺរាតត្បាតជំងឺកូវីដ១៩។ ជាពិសេសការបញ្ចេញកញ្ចប់ថវិកាជាតិ ដើម្បីជួយដល់កម្មករ និយោជិត ដែលបាត់បង់ការងារក្នុងកំលុងពេលនៃការរាតត្បាតជំងឺកូវីដ១៩។
«កម្ពុជាយើងជាប្រទេសដែលគ្រប់គ្រង និងទប់ស្កាត់ការរាតត្បាតជំងឺកូវីដ១៩ បានល្អប្រសើរទោះបីយើងជាប្រទេសមានវេជ្ជសាស្ត្រនៅទន់ខ្សោយក្តី។ ការយកឈ្នះនេះ នាំឱ្យប្រទេសជាច្រើនកោតសរសើរចំពោះការដឹកនាំរបស់សម្តេចតេជោនាយករដ្ឋមន្ត្រី។ នេះជាជោគជ័យធំណាស់សម្រាប់ប្រទេសជាតិ ប្រជាជន ជាពិសេសកម្មករ និយោជិត។ ជោគជ័យទាំងនេះ មិនមែនជារឿងចៃដន្យឡើយ តែជាលទ្ធផលកើតចេញពីការគិតគូរ និងការដាក់ចេញនូវវិធានការដ៏មានប្រសិទ្ធភាពរបស់សម្តេចតេជោនាយករដ្ឋមន្ត្រី»។ នេះការគូសរំលេចរបស់លោក យូ សិរីវុឌ្ឍ។
ដោយឡែកលោក ភឺន ផល្លា បានរំលឹកថា ក្នុងជំងឺកូវីដ១៩ រាតត្បាត បានធ្វើឱ្យកម្មករ និយោជិតជាច្រើនជួបប្រទះការបាត់បង់ការងារ។ ប៉ុន្តែស្មារតីនៃការគិតគូររបស់សម្តេចតេជោនាយករដ្ឋមន្ត្រី បានបញ្ចេញកញ្ចប់ថវិកាឧបត្ថម្ភប្រចាំខែដល់កម្មករ និយោជិត បើទោះបីមិនបានច្រើន តែក៏ជួយឱ្យកម្មករ និយោជិតដោះស្រាយ ការលំបាកក្នុងជីវភាពប្រចាំថ្ងៃរបស់ពួកគេផងដែរ។
បន្ថែមពីលើនេះ លោក យូ សិរីវុឌ្ឍ និងលោក ភឺន ផល្លា ក៏បានគូសរំលេចវិបត្តិរបស់ពិភពលោកបណ្តាលមកពីជំងឺកូវីដ១៩ និងសង្គ្រាមនៅប្រទេសអ៊ុយក្រែន ជាហេតុនាំឱ្យការបញ្ជាទិញធ្លាក់ចុះ ហើយក៏នាំឱ្យកម្មករ និយោជិតមួយចំនួនបាត់បង់ការងារ។
លោក យូ សិរីវុឌ្ឍ និងលោក ភឺន ផល្លា បានគូសបញ្ជាក់ថា ការបាត់បង់ការងារទាំងនេះ មិនមែនដោយសារបញ្ហា EBA ដូចជនមួយចំនួនលើកឡើងនោះឡើយ។ ប្រធាន និងអនុប្រធាន ក្រុមការងារកសាងសមាជិកបក្សក្នុងជួរកម្មករ និយោជិត តាមរោងចក្រក្នុងខេត្តកណ្តាល បានអំពាវនាវកម្មករ និយោជិត កុំឱ្យជឿតាមការឃោសនារបស់ជនមួយចំនួនថា ការបាត់បង់ការងារដោយសារការបាត់បង់ EBA។
«ដរាបណាសង្គ្រាមនៅអ៊ុយក្រែន មិនទាន់បញ្ចប់ទេនោះ វិបត្តិសេដ្ឋកិច្ចនៅតែអូសបន្លាយ ហើយការងារនៅក្នុងវិស័យវេយណភណ្ឌកាត់ដេរនៅតែមានបញ្ហា ដោយសារការបញ្ជាទិញធ្លាក់ចុះ ការស្លៀកពាក់មិនដូចពេលមិនទាន់មានសង្គ្រាមនោះទេ។ ដូច្នេះភាពរអាក់រអួលការងារក្នុងប្រទេសយើងមិនមែនដោយសារតែរឿង EBA នោះឡើយ»។ នេះជាការបញ្ជាក់របស់លោក យូ សិរីវុឌ្ឍ។
បើទោះបីជាយ៉ាងណា លោក យូ សិរីវុឌ្ឍ និងលោក ភឺន ផល្លា បានលើកទឹកចិត្តកម្មករ និយោជិតទាំងអស់ កុំឱ្យមានការព្រួយបារម្ភចំពោះបញ្ហាទាំងនេះ ព្រោះសម្តេចតេជោ រួមជាមួយថ្នាក់ដឹកនាំជាសេនាធិការ បានដាក់ចេញនូវយុទ្ធសាស្ត្រជាច្រើនដោះស្រាយបញ្ហាទាំងអស់នេះ ដើម្បីធានាថា ប្រជាពលរដ្ឋនៅតែមានការងារធ្វើ រកបានប្រាក់កម្រៃសម្រាប់ទ្រទ្រង់ជីវភាព៕
