(ភ្នំពេញ)៖ លោកបណ្ឌិត ហ៊ុន ម៉ាណែត បេក្ខភាពនាយករដ្ឋមន្ត្រីបន្តវេន ដ៏មានប្រជាប្រិយភាព បានលើកឡើងថា សកម្មភាពដែលយុវជនបក្សប្រជាជនកម្ពុជាខិតខំធ្វើនាពេលកន្លងមកនៅក្រៅប្រទេស គឺដើម្បីផ្សារភ្ជាប់ទំនាក់ទំនងរវាងខ្មែរ និងខ្មែរ។
លោកបណ្ឌិត ហ៊ុន ម៉ាណែត ត្រូវបានគេដឹងថា ជាយុវជនបក្សប្រជាជនកម្ពុជា ដែលបានផ្តួចផ្តើមរៀបចំចងក្រងយុវជនបក្សធ្វើសកម្មភាពផ្សារភ្ជាប់ទំនាក់ទំនងជាមួយប្រជាពលរដ្ឋខ្មែរនៅក្រៅប្រទេសមានដូចជានៅអឺរ៉ុប អាមេរិក អូស្ត្រាលី និងនៅកូរ៉េខាងត្បូងជាដើម។ តាមរយៈសកម្មភាពទាំងនេះ ធ្វើឱ្យប្រជាពលរដ្ឋខ្មែររស់នៅក្រៅប្រទេស ជាពិសេសនៅអឺរ៉ុប និងអាមេរិក មានទំនាក់ទំនងល្អជាមួយប្រទេសកំណើត ហើយក៏បានជ្រូតជ្រាបពីការវិវឌ្ឍន៍របស់ប្រទេសកំណើតរបស់ខ្លួនផងដែរ។
ក្នុងពិធីសំណេះសំណាល និងជួបជុំប្រជាពលរដ្ឋខ្មែរ រស់នៅសហរដ្ឋអាមេរិក និងប្រទេសកាណាដា ក្នុងឱកាសអបអរសារទរមហាសង្ក្រាន្តឆ្នាំថ្មីនាថ្ងៃទី០៨ ខែមេសា ឆ្នាំ២០២៣ លោកបណ្ឌិត ហ៊ុន ម៉ាណែត បានរំលឹកថា ដើម្បីផ្សារភ្ជាប់ទំនាក់ទំនងរវាង ខ្មែរក្រៅស្រុក និងក្នុងស្រុក ក្រុមការងារយុវជនបក្សប្រជាជនក្រៅប្រទេស បានធ្វើសកម្មភាពជាច្រើន។ ក្នុងនោះរួមមានទាំងការជួយរៀបចំកម្មវិធីវប្បធម៌ផ្សេងៗនៅក្រៅស្រុកផងដែរ។
លោកបណ្ឌិត បានរំលឹកថា លោកធ្លាប់បានរៀបចំដឹកជញ្ជូនសម្ភារៈជាសម្បត្តិវប្បធម៌ខ្មែរមួយចំនួនទៅរៀបចំកម្មវិធីសង្ក្រាន្តនៅក្រុងឡុងប៊ិច ហើយលោកត្រូវក្រុមប្រឆាំងដេញមិនឱ្យចូលទីតាំងដែលលោកជួយរៀបចំ។ លោក ក៏មានក្រុមការងារឱ្យយោបល់យកសម្ភារៈនោះចេញពីទីតាំងប្រារព្ធនោះទៀត។ ប៉ុន្តែលោកមិនយកចេញនោះឡើយ ព្រោះលោកចង់ឱ្យសម្ភារៈតំណាងឱ្យវប្បធម៌ខ្មែរនោះ ត្រូវបានបង្ហាញជនបរទេស៕
