(ភ្នំពេញ)៖ ខ្មាន់កាំភ្លើងដែលបាញ់សម្លាប់លោក កែម ឡី បានសារភាពប្រាប់សមត្ថកិច្ចបន្ថែមថា មូលហេតុដែលនាំឲ្យតាមបាញ់សម្លាប់ជនរងគ្រោះនោះ គឺផ្តើមចេញមកពីរឿងលក់ដីមួយកន្លែង ដែលត្រូវបានរាជរដ្ឋាភិបាលផ្តល់ជូនដោយលក់បាន៣-៤ពាន់ដុល្លារ ពេលនោះលោក កែម ឡី បានប្រាប់ទៅខ្មាន់កាំភ្លើងថា លុយនេះទុកសម្រាប់ជួយជនក្រីក្រ (ពួកគេទាំង២នាក់ស្គាល់ និងរាប់អានគ្នា)។

ក្រោយពេលលោក កែម ឡី ប្រាប់ថាយ៉ាងនេះ ជនបង្កក៏យល់ព្រមឲ្យលុយនោះ ទៅលោក កែម ឡី ប៉ុន្តែរូបគេមិនដែលឃើញលោក កែម ឡី យកទៅជួយជនក្រីក្រនោះឡើយទើប ខ្មាន់កាំភ្លើងរៀបចំផែនការតាមបាញ់សម្លាប់តែម្តង។

គិតត្រឹមវេលាម៉ោង១០៖៣០នាទីព្រឹកថ្ងៃទី១០ ខែកក្កដានេះ ខ្មាន់កាំភ្លើងត្រូវបានបញ្ជូនទៅកាន់​ ស្នងការដ្ឋាននគរបាលរាជធានីភ្នំពេញ ដើម្បីបន្តការសួរនាំបន្ថែមទៀត។

សូមជំរាបថា លោកបណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់នៅក្នុង Start mart ស្តុបបូកគោ ខណ្ឌចំការមន។ ហើយខ្មាន់កាំភ្លើងម្នាក់ ត្រូវបានកម្លាំងនគរបាលចាប់បាន ពាក់ព័ន្ធការបាញ់សម្លាប់លោក កែម ឡី ក្រោយកើតហេតុភ្លាមៗ ដោយសារតែឃើញ អាវប្រឡាក់ឈាម ហើយជនសង្ស័យបានសារភាពថា មូលហេតុគឺលោក កែម ឡី ជំពាក់លុយ៣០០០ដុល្លារមិនសង។

ខ្មាន់កាំភ្លើងបានសារភាពថា ខ្លួនឈ្មោះ ជួប សម្លាប់ អាយុ៣៣ឆ្នាំ ជាជាងបាញ់ថ្នាំនៅប្រទេសថៃ។ ជនសង្ស័យបានសារភាពថា ខ្លួនជិះម៉ូតូឌុបមកទេ ហើយប្រើកាំភ្លើងខ្លីបាញ់សម្លាប់ជនរងគ្រោះ៕