(អាមេរិក)៖ យន្តហោះដឹកអ្នកដំណើរ ១៣០នាក់ របស់ក្រុមហ៊ុនអាកាសចរណ៍ Delta Air Lines បាន​ចុះ​ចត​ខុសគោលដៅ ប៉ុន្តែ​អ្នកដំណើរនៅលើយន្តហោះទាំងអស់មានសុវត្ថិភាព ហើយនៅពេលនេះ ក្រុមមន្ត្រីជំនាញ​​កំពុងតែធ្វើការស៊ើបអង្កេត។​ នេះ​បើយោងតាមការចេញផ្សាយរបស់សារព័ត៌មាន CNN ចេញផ្សាយនៅថ្ងៃទី​០៩ ខែកក្កដា។

គណៈកម្មាធិការជាតិសុវត្ថិភាពដឹកជញ្ជូន (NTSB) បានឲ្យដឹងថា យន្តហោះ Delta A320 ជើងហោះហើរ Flight 2845 បានហោះចេញពីអាកាសយានដ្ឋាន Minneapolis និងត្រូវចុះចតនៅអាកាសយានដ្ឋាន Rapid City Regional Airport ប៉ុន្តែបែរជា​ទៅចុះចតនៅមូលដ្ឋានទ័ពអាកាស Ellsworth Air Force Base របស់អាមេរិកទៅវិញ​ នាម៉ោង ៨៖៤២នាទីយប់ថ្ងៃព្រហស្បតិ៍ ដែលទាំងពីរកន្លែងនេះ មានចម្ងាយពីគ្នាជាង ១៦គីឡូម៉ែត្រ។

ក្រុមហ៊ុនអាកាចរណ៍ Delta បានសេចក្ដីសុំទោស​ចំពោះ​រឿងនេះ ប៉ុន្តែ​គណៈកម្មាធិការជាតិសុវត្ថិភាពដឹកជញ្ជូន កំពុងតែធ្វើការស៊ើបអង្កេតលើសហនាវិក អ្នកបើកបរ ព្រមទាំងក្រុមហ៊ុន ព្រោះថា Delta មិនមានប្រាប់ពីមូល​ហេតុនៃការចុះចតខុសកន្លែងនេះទេ។

អ្នកដំណើរនៅលើយន្តហោះ បាននិយាយថា ពួកគាត់ត្រូវបានគេអនុញ្ញាតឲ្យបើប្រាស់ទូរស័ព្ទដើម្បីទាក់ទងទៅ​កាន់សាច់ញាតិកុំឲ្យព្រួយបារម្ភពីរឿងចុងចតខុសកន្លែងនេះ ហើយពួកគាត់បានបញ្ជាក់ថា គាត់ឃើញមានទាហាន​ដើរចុះឡើងនៅខាងក្រៅយន្តហោះ ព្រមទាំងឃើញមានឆ្កែហិតគ្រឿងញៀន​ទៀតផង៕