(វៀងច័ន្ទន៍, ឡាវ)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា ដែលជាសមាជិកគណៈកម្មការទន្លេមេគង្គ បានជំរុញឱ្យប្រទេសមេគង្គទាំងអស់ បង្កើនកិច្ចខិតខំប្រឹងប្រែង និងទទួលខុសត្រូវរួម ពង្រឹងកិច្ចសហប្រតិបត្តិការតំបន់ និងភាពជាដៃគូ ដើម្បីធានាថា មេគង្គ ជាទន្លេដែលមានអនាគតកាន់តែត្រចះត្រចង់ មានវិបុលភាពរួមគ្នា សម្រាប់គ្រប់ប្រទេសតាមដងទន្លេ និងប្រជាជនទាំងអស់រស់នៅក្នុងអាងទាំងមូល។
សម្តេចតេជោ ហ៊ុន សែន បានជំរុញបែបនេះក្នុងកិច្ចប្រជុំកំពូលគណៈកម្មការទន្លេមេគង្គលើកទី៤ ដែលរៀបចំធ្វើឡើងនៅរដ្ឋធានីវៀងច័ន្ទន៍ ប្រទេសឡាវ នាព្រឹកថ្ងៃទី០៥ ខែមេសា ឆ្នាំ២០២៣។ ក្រៅតែពីថ្នាក់ដឹកនាំសមាជិកទាំង៤ នៃគណៈកម្មការទន្លេមេគង្គរួមមាន កម្ពុជា ថៃ ឡាវ និងវៀតណាមហើយនោះ កិច្ចប្រជុំនេះ ប្រតិភូតំណាងជាន់ខ្ពស់មកពីប្រទេសមីយ៉ាន់ម៉ា ចិន រួមទាំងតំណាងដៃគូ នៃប្រទេសអភិវឌ្ឍន៍របស់គណៈកម្មការទន្លេមេគង្គមួយចំនួន។
មេដឹកនាំប្រទេសទន្លេមេគង្គទាំង៤ សុទ្ធតែបានឡើងថ្លែងសុន្ទរកថាគន្លឹះ ពាក់ព័ន្ធនឹងបញ្ហាទន្លេមេគង្គស្របតាមប្រធានបទដែលបានដាក់ចេញ «នវានុវត្តន៍ និងកិច្ចសហប្រតិបត្តិការសម្រាប់អាងទន្លេមេគង្គដែលមានសន្តិសុខទឹក ប្រកបដោយចីរភាព»។
មេដឹកនាំទាំងអស់បានរំលឹកឡើងវិញ នូវការចុះហត្ថលេខាលើកិច្ចព្រមព្រៀងឆ្នាំ១៩៩៥ ស្ដីពីកិច្ចសហប្រតិបត្តិការសម្រាប់ការអភិវឌ្ឍ ដោយចីរភាព នៃអាងទន្លេមេគង្គ និងការបង្កើតឡើងគណៈកម្មការទន្លេមេគង្គ (MRC) ដោយតំណាងរដ្ឋាភិបាល នៃបណ្ដាប្រទេសក្នុងអាងទន្លេមេគង្គក្រោម ដោយផ្អែកលើទស្សនៈវិស័យ សម្រាប់អាងទន្លេទាំងមូល និងដោយឈរលើប្រវត្តិដ៏យូរអង្វែង នៃកិច្ចសហប្រតិបត្តិការមេគង្គចាប់តាំងពីឆ្នាំ១៩៥៧មក ដែលពេលនោះ បានបង្កើតឡើងនូវគណៈកម្មាធិការសម្រាប់សម្របសម្រួលការស្រាវជ្រាវក្នុងអាងទន្លេមេគង្គក្រោម។
មេដឹកនាំទាំងអស់បានកត់សម្គាល់ពីសកម្មភាពជាអាទិភាព និងការប្តេជ្ញាចិត្តដែលបានកំណត់ និងធ្វើមុនកិច្ចប្រជុំកំពូល MRC និងភាពប្រទាក់ក្រឡាគ្នាជាបន្ត ជាមួយនឹងប្រទេសជាសមាជិក MRC រួមមានចាប់តាំងពីកិច្ចប្រជុំកំពូលលើកទី១ ក្នុងឆ្នាំ២០១០ នៅទីក្រុងហួហ៉ីន ប្រទេសថៃ ក្រោមមូលបទ «ការបំពេញតាមតម្រូវការ ដោយរក្សាបាននូវតុល្យភាព៖ ឆ្ពោះទៅការអភិវឌ្ឍប្រកបដោយចីរភាព», កិច្ចប្រជុំកំពូលលើកទី២ ក្នុងឆ្នាំ២០១៤ នៅទីក្រុងហូជីមិញ ប្រទេសវៀតណាម ក្រោមមូលបទ «សន្តិសុខទឹក ស្បៀងអាហារ និងថាមពល ក្នុងបរិបទនៃការប្រែប្រួលអាកាសធាតុ និងកិច្ចប្រជុំកំពូលលើកទី៣ ក្នុងឆ្នាំ២០១៨ នៅទីក្រុងសៀមរាប ប្រទេសកម្ពុជា ក្រោមមូលបទ « ការលើកកម្ពស់កិច្ចខិតខំប្រឹងប្រែងរួមគ្នា និងភាពជាដៃគូ ដើម្បីសម្រេចបាននូវគោលដៅអភិវឌ្ឍន៍ ប្រកបដោយចីរភាពក្នុងអាងទន្លេមេគង្គ»។
សម្តេចតេជោនាយករដ្ឋមន្ត្រី បានហៅព្រឹត្តិការណ៍នៃការជួបជុំប្រជុំកំពូលគណៈកម្មការទន្លេមេគង្គនៅប្រទេសឡាវ គឺជាថ្ងៃពិសេសមួយទៀតក្នុងប្រវត្តិនៃកិច្ចសហប្រតិបត្តិការមេគង្គ។
ក្នុងសុន្ទកថាគន្លឹះនោះ សម្តេចតេជោ បានលើកឡើងថា ទន្លេមេគង្គ គឺជាប្រភពទឹកប្រកបដោយចីរភាព ដែលផ្តល់នូវផលប្រយោជន៍ផ្នែកសង្គម សេដ្ឋកិច្ច បរិស្ថាន និងវប្បធម៌ សម្រាប់បណ្តាប្រទេសតាមដងទន្លេ និងសុខមាលភាពរបស់ប្រជាជនទាំងក្នុង និងក្រៅអាង និងជាប្រភពនៃការលូតលាស់ដោយចីរភាព សម្រាប់គ្រប់ប្រទេសមេគង្គទាំងអស់។កិច្ចសហប្រតិបត្តិការដែលយើងបានធ្វើមកទល់បច្ចុប្បន្ននេះ និង ទៅអនាគត គឺត្រូវរួមគ្នាធានាឱ្យបាននូវនិរន្តរភាពនៃទន្លេមេគង្គ និងទន្លេមេគង្គដែលមានសុខភាពល្អ ។
សម្តេចតេជោ បានលើកឡើងដែរថា ការសម្រេចបានជានិរន្តរ៍នូវសន្តិសុខទឹក ស្បៀងអាហារ និងថាមពល គឺជាអាទិភាពខ្ពស់បំផុតនៅក្នុង របៀបវារៈ និងគោលបំណងនៃការអភិវឌ្ឍប្រកបដោយចីរភាពក្នុងតំបន់មេគង្គ និងក៏ដូចជាសម្រាប់ បណ្តាប្រទេសតាមដងទន្លេនីមួយៗផងដែរ។
សម្តេចតេជោនាយករដ្ឋមន្ត្រី បានគូសរំលេចដែរថា និរន្តរភាពនៃទន្លេមេគង្គ គឺជាចំណុចស្នូល ដែលត្រូវយកចិត្តទុកដាក់ ហើយជាក្តីបារម្ភរបស់ប្រទេសទន្លេមេគង្គ។ បើតាមសម្តេចតេជោ បញ្ហាប្រឈមសម្រាប់អាងទន្លេមេគង្គ គឺដោយសារតែការអភិវឌ្ឍសម្រាប់ការលូតលាស់ផ្នែកសេដ្ឋកិច្ចក្នុងតំបន់មេគង្គ គឺមានការកើនឡើង និងស្ថិតក្នុងសន្ទុះលឿនរហ័ស។ ការអភិវឌ្ឍសេដ្ឋកិច្ចយ៉ាងរហ័ស នាំឱ្យការប្រើប្រាស់ទឹកមេគង្គមានការកើនឡើង ហើយនិន្នាការនេះ នឹងបន្តកើនឡើងនាពេលអនាគត និងទន្ទឹមនឹងនោះ បណ្តាប្រទេសមេគង្គ ក៏ដូចជានៅផ្នែកផ្សេងទៀតក្នុងពិភពលោកដែរ ក៏បានយកចិត្តទុកដាក់ខិតខំប្រឹងប្រែងយ៉ាងខ្លាំង ដើម្បីស្តារសេដ្ឋកិច្ចឡើងវិញ ពីផលប៉ះពាល់ដោយសារជំងឺសកលកូវីដ-១៩ ដែលបានអូសបន្លាយ និងដើម្បីការលូតលាស់ប្រកបដោយចីរភាព។
«កត្តាទាំងអស់នេះ គួបផ្សំនឹងការប្រែប្រួលអាកាសធាតុ ព្រមទាំងហានិភ័យ និងផលប៉ះពាល់ដែលនឹងកើតមាននោះទាមទារឱ្យយើង ត្រូវបង្កើនការយកចិត្តទុកដាក់កាន់តែខ្លាំងថែមទៀត ដោយត្រូវធ្វើសកម្មភាពរួមគ្នាក្នុងលក្ខណៈឱ្យកាន់តែមានប្រសិទ្ធភាព ប្រកបដោយកិច្ចសហការ និងឱ្យបានទាន់ពេលវេលា»។ នេះការជំរុញរបស់សម្តេចតេជោ ហ៊ុន សែន ដើម្បីឆ្លើយតបនឹងបញ្ហាប្រឈមរបស់ទន្លេមេគង្គ។
ឆ្លើយតបនឹងបញ្ហាប្រឈមទាំងនេះ សម្តេចតេជោ បានលើកទឹកចិត្តដល់គណៈកម្មការទន្លេមេគង្គ ឱ្យបន្តប្រឹងប្រែងព្យាយាមបន្ថែមទៀត ធ្វើយ៉ាងណាឱ្យការរៀបចំផែនការអាងមានលក្ខណៈគ្រប់ជ្រុងជ្រោយកាន់តែប្រសើរ ការអនុវត្ត ការងារ និងការគ្រប់គ្រងកាន់តែមានប្រសិទ្ធភាព នវានុវត្តន៍លើកិច្ចដំណើរការផ្នែកបច្ចេកទេស និងផ្នែកបច្ចេកវិទ្យា ដោយធ្វើកិច្ចសហការកាន់តែសកម្ម និងបែបបុរេសកម្មជាមួយបណ្តាប្រទេស និងដៃគូមេគង្គ សំដៅនំាមកនូវដំណោះស្រាយប្រកបដោយចីរភាព ឆ្ពោះទៅសម្រេចបាននូវគោលដៅអភិវឌ្ឍន៍ និងការគ្រប់គ្រងកាន់តែប្រសើរ និងប្រកបដោយចីរភាពក្នុងអាងទន្លេមេគង្គ ។
សម្តេចតេជោ ក៏បានជំរុញ និងលើកទឹកចិត្តដល់គណៈកម្មការទន្លេមេគង្គ ឱ្យបន្តខិតខំយកចិត្តទុកដាក់ និងធ្វើការឱ្យកាន់តែជិតស្និទ្ធ និងសហការឱ្យកាន់តែល្អថែមទៀត ជាមួយប្រទេសជាសមាជិកគណៈកម្មការទន្លេមេគង្គ និងដៃគូសហប្រតិបត្តិការទាំងអស់ ដើម្បីប្រសិទ្ធភាពនៃការអនុវត្តកិច្ចព្រមព្រៀងមេគង្គឆ្នាំ១៩៩៥ និយាយជារួម និងសេចក្តីថ្លែងការណ៍រួមក្រុងវៀងច័ន្ទន៍ នៃកិច្ចប្រជុំកំពូលគណៈកម្មការទន្លេមេគង្គ លើកទី៤ និយាយដោយឡែក។
បើទោះបីជាយ៉ាងណាសម្តេចតេជោ បានបង្ហាញក្តីរំពឹងថា ដោយសារការបន្តកិច្ចខិតប្រឹងប្រែង ការធ្វើការរួមគ្នា និងកិច្ចសហការរវាងគ្នានឹងគ្នា នោះនឹងធ្វើឱ្យប្រទេសមេគង្គ អាចសម្រេចបានវឌ្ឍនភាពធំៗបន្ថែមទៀត តម្រង់ឆ្ពោះទៅគោលដៅរួម គឺការសម្រេចឱ្យបាននូវអាងទន្លេមេគង្គ ដែលមានសន្តិសុខទឹកប្រកបដោយចីរភាព មានវិបុលភាព និងមានភាពធន់ ដោយនឹងបន្តផ្តល់ផលប្រយោជន៍ឱ្យគ្នាទៅវិញទៅមក និងជានិរន្តរ៍៕
