(ភ្នំពេញ)៖ ក្រុមហ៊ុនកសិកម្មសិង្ហបុរី ដែលកំពុងវិនិយោគដាំដំឡូងមី និងច្នៃជាម្សៅ ប្រកាសស្វែងរកដៃគូដាំដំឡូងមីកែច្នៃសម្រាប់ផ្គត់ផ្គង់ទីផ្សារក្នុង និងក្រៅស្រុក ខណៈការបញ្ជាទិញម្សៅដំឡូងមី មានកំណើនខ្ពស់។
ក្រុមហ៊ុន អេច អិល អេច អាហ្រ្គីខលឈ័រ (ខេមបូឌា) លីមីតធីត និង ក្រុមហ៊ុន ហុង ឡៃហួត គ្រុប លីមីតធីត ដែលជាក្រុមហ៊ុនសឹង្ហបុរី បានវិនិយោគជាច្រើនឆ្នាំ មកហើយ នៅក្នុងប្រទេសកម្ពុជា។ ក្រុមហ៊ុន បានបង្កើតមជ្ឈមណ្ឌលកសិកម្មកកម្ពុជា-សិង្ហបុរី (CSAH) លើផ្ទៃដីប្រមាណ ១ម៉ឺនហិកតា ស្ថិតនៅស្រុកឱរ៉ាល់ ខេត្តកំពង់ស្ពឺ ដើម្បីប្រមូលផ្តុំការវិនិយោគចំរុះលើវិស័យ កសិកម្ម ដូចជាការកែច្នៃចំណីអាហារ ចិញ្ចឹមសត្វ ទីកន្លែងពាណិជ្ជកម្ម និងចម្ការថាមពល ព្រះអាទិត្យជាដើម។
ក្រុមហ៊ុន អេច អិល អេច អាហ្រ្គីខលឈ័រ (ខេមបូឌា) លីមីតធីត និងក្រុមហ៊ុន ហុង ឡៃហួត គ្រុប លីមីតធីត បានវិនិយោគលើការដាំពោត និងដំឡូងមី និងកែច្នៃជាម្សៅមី សម្រាប់នាំចេញទៅក្រៅប្រទេសលើទីតាំងខាងលើតាំងពីឆ្នាំ២០០៨ មកម្ល៉េះ បន្ទាប់ពីខ្លួនទទួលបានសិទ្ធិវិនិយោគពីរាជរដ្ឋាភិបាល។
បច្ចុប្បន្នក្រុមហ៊ុន បាននិងកំពុងធ្វើសកម្មភាពដាំដុះដំឡូងមី និងកែច្នៃជាម្សៅមី នាំទៅកាន់ទីផ្សារក្រៅប្រទេស និងផ្គត់ផ្គង់ក្នុងស្រុកផងដែរ។ ដោយសារការបញ្ជាទិញម្សៅមីពីក្រៅប្រទេស និងតម្រូវការក្នុងស្រុកកាន់តែច្រើន ក្រុមហ៊ុនបានរិះរកលទ្ធភាពពង្រីកការដាំដុះដំឡូងមី ឱ្យបានកាន់តែច្រើន នៅលើផ្ទៃដីដ៏ល្វឹងល្វើយ ដែលខ្លួនទទួលបានសិទ្ធិវិនិយោគពីរាជរដ្ឋាភិបាលនោះ។
ក្រុមហ៊ុន ប្រកាសយកផ្ទៃដីរហូតដល់ ៥,០០០ហិកតា ក្នុងដំណាក់កាលទី១ នៅឆ្នាំ២០២៣នេះ ដើម្បីធ្វើសហប្រតិបត្តិការរួមគ្នា និងភាពជាដៃគូយុទ្ធសាស្ត្រ ដើម្បីដាំដុះដំឡូងមី ហើយយកទៅកែច្នៃក្នុងរោងចក្ររបស់ក្រុមហ៊ុន ដែលមានវត្តមាននៅទីនោះស្រាប់។
ក្រុមហ៊ុនសង្ឃឹមថា គំនិតផ្តួចផ្តើមនេះ អាចនឹងទាក់ទាញ ក៏ដូចជាស្វាគមន៍វិនិយោគគិន ក្នុងវិស័យកសិកម្ម អ្នកម៉ៅការបន្ត កសិករ និងអ្នកជំនាញផ្សេងទៀត នៅទូទាំងប្រទេសកម្ពុជា ឱ្យមកចូលរួមពិភាក្សាលើភាពជាដៃគូជាមួយក្រុមហ៊ុន ដើម្បីពង្រីកទីតាំងដាំដុះដំឡូងមីរបស់ក្រុមហ៊ុន ដែលមានស្រាប់។
ក្រុមហ៊ុនស្វាគមន៍រាល់ដំណាំកសិកម្មគ្រប់ប្រភេទ ដែលនឹងត្រូវដាំដុះនៅក្រោមដំណាក់កាលទី១ ជាមួយការដាំដំឡូងមី បន្ទាប់មក គឺផ្លែស្វាយ ចេក អំពៅ ស្វាយចន្ទី និងដំណាំដាំដុះជាច្រើនផ្សេងទៀត។ ស្ថិតក្រោមគំរូភាពជាដៃគូនេះ ក្រុមហ៊ុននឹងផ្តល់ជូនដី ហើយអ្នកម៉ៅការ ដែលបានចូលរួមសហការ នឹងរៀបចំដីដាំដុះ សម្អាតស្មៅ ព្រមទាំងប្រមូលផលដំណាំផងដែរ។
ប្រសិនបើអ្នកម៉ៅការជ្រើសរើសដាំដំឡូងមី នៅលើដីដែលបានបែងចែកនោះ ខាងក្រុមហ៊ុននឹងផ្តល់ជម្រើសធានាទិញយកមកវិញ ស្របតាមលក្ខខណ្ឌនៃកិច្ចព្រមព្រៀងលើការធ្វើសហប្រតិបត្តិការរួមគ្នារវាងក្រុមហ៊ុន និងអ្នកម៉ៅការ។ ក្រុមហ៊ុន ក៏បានដំណើរការរោងចក្រផលិតម្សៅមីនៅនឹងកន្លែងដែលអាចផលិតម្សៅមីបាន ១២០តោន និងត្រូវការដំឡូងមីរហូតដល់ ៥០០តោន សម្រាប់ការផលិតជារៀងរាល់ថ្ងៃ។
ក្រុមហ៊ុន ក៏គ្រោងនឹងបង្កើតមជ្ឈមណ្ឌលប្រមូលដំឡូងមីនៅនឹងកន្លែង ដើម្បីប្រមូលដំឡូងមីពីកសិករនៅក្បែរនោះ។ បច្ចុប្បន្នក្រុមហ៊ុន បានសាងសង់ឃ្លាំងធំចំនួនពីរ នៅនឹងកន្លែង ដែលអាចផ្ទុកដំឡូងមី បានប្រមាណ ២០,០០០តោនក្នុងមួយថ្ងៃ។ ជាមួយការអនុវត្តគម្រោងនេះ ប្រកបដោយជោគជ័យ ការផ្គត់ផ្គង់ដំឡូងមីកាន់តែមានស្ថិរភាព និងអាចបង្កើតឱកាសសម្រាប់វិនិយោគគិន ក្នុងការបង្កើតរោងចក្រផលិតម្សៅដំឡូងមីថ្មី នៅនឹងកន្លែង។
ក្រុមហ៊ុនសង្ឃឹមថា គំនិតផ្តួចផ្តើមនេះនឹងជួយរួមចំណែកដល់ការរីកលូតលាស់ នៃវិស័យកសិកម្មរបស់ក្រកម្ពុជា ជាពិសេសលើសន្តិសុខស្បៀង និងស្របតាមគោលនយោបាយ គាំទ្ររបស់រាជរដ្ឋាភិបាលសម្រាប់វិស័យកសិកម្មកម្ពុជា។
លោក ឌីឡែន អុង (Dylan Ong) នាយកប្រតិបត្តិនៃក្រុមហ៊ុន HLH Agriculture (Cambodia) Co., Ltd បានមានប្រសាសន៍ថា «យើងមានទំនុកចិត្តថា នៅក្រោមដំណាក់កាលទី១ គម្រោងដាំដុះដ៏ធំមួយនេះ នឹងរួមចំណែកបន្ថែមដល់សន្តិសុខស្បៀងរបស់កម្ពុជា ព្រមទាំងបង្កើតយ៉ាងហោច ១០០,០០០កន្លែង ក្នុងស្រុកឱរ៉ាល់ ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ ក្នុងស្រុកឱរ៉ាល់ បង្កើនជំនាញចំណេះដឹង និងធ្វើឱ្យខេត្តឱរ៉ាល់ក្លាយជាអ្នកផលិតផលិតផលកសិកម្មធំជាងគេ និងអាចចូលរួមចំណែកធ្វើឱ្យវិស័យកសិកម្មនៅកម្ពុជាកាន់តែរីកចម្រើន»។
លោកអ្នកចាប់អារម្មណ៍លើការវិនិយោគនេះ ទាក់ទង អ្នកនាង តៃហ្វា (Tayfa) តាមរយៈលេខទូរស័ព្ទ ០៩៨ ២៩៧ ៩៩៩ និង០៧៨ ៧០៧ ៧២៧ ដើម្បីស្វែងយល់បន្ថែម និងសម្រាប់រៀបចំមកទស្សនាដោយផ្ទាល់៕
