(ភ្នំពេញ)៖ លោក សម រង្ស៊ី ប្រធានគណបក្សសង្រ្គោះជាតិ បានប្រកាសនៅលើទំព័រ Facebook របស់លោកនៅព្រឹកថ្ងៃទី០៩ ខែកក្កដា ឆ្នាំ២០១៦នេះថា លោកបានឈ្នះក្តី លោកឧបនាយករដ្ឋមន្រ្តី ហោ ណាំហុង នៅប្រទេសបារាំងក្នុងថ្ងៃនេះ ជុំវិញរឿងបរិហារកេរ្តិ៍ ប៉ុន្តែទោះជាយ៉ាងណា លោក ការ សាវុត្ថ មេធាវីការពារក្តីឱ្យឧបនាយករដ្ឋមន្រ្តី ហោ ណាំហុង បានអះអាងថា លោកពុំបានដឹងអំពីរឿងនេះទេ។

លោក ការ សាវុត្ថ មេធាវីការពារក្តីឱ្យឧបនាយករដ្ឋមន្រ្តី ហោ ណាំហុង ហាក់មានការភ្ញាក់ផ្អើលនៅពេលដែល លោក សម រង្ស៊ី បានប្រកាសថាខ្លួន បានឈ្នះក្តីឧបនាយករដ្ឋមន្រ្តី ហោ ណាំហុង នៅប្រទេសបារាំងជាថ្មីម្តងទៀត។ លោកថា កន្លងមកចំពោះរឿងនេះ មានតែឧបនាយករដ្ឋមន្រ្តី ហោ ណាំហុង ដែលបានឈ្នះក្តីលោក សម រង្ស៊ី ទាំងនៅក្នុងប្រទេសកម្ពុជា និងប្រទេសបារាំង។

លោក ការ សាវុត្ថ បានថ្លែងថា «ខ្ញុំអត់បានដឹងទេ រឿងគេប្តឹងនៅស្រុកបារាំងយ៉ាងម៉េច ប៉ុន្តែរឿងចាស់យូរហើយ នៅស្រុកបារាំងហ្នឹង ឯកឧត្តម ហោ ណាំហុង គាត់ជាអ្នកឈ្នះទេ។ ឯកឧត្តម ហោ ណាំហុង បានយកសាលក្រម និងសាលដីការរបស់តុលាការបារាំងមកឱ្យខ្ញុំ»។

នៅលើទំព័រ Facebook លោក សម រង្ស៊ី នៅថ្ងៃនេះ បានផ្សព្វផ្សាយថា តុលាការនៅប្រទេសបារាំងបានកាត់ក្តីឲ្យ លោក ហោ ណាំហុង ចាញ់រូបលោកម្តងទៀត នៅក្នុងសំណុំរឿងបរិហារកេរ្តិ៍ដែលប្តឹងដោយ លោកឧបនាយករដ្ឋមន្រ្តី ហោ ណាំហុង បន្ទាប់ពីលោក សម រង្ស៊ី ចោទលោកឧបនាយករដ្ឋមន្រ្តី ហោ ណាំហុងថា ជាប្រធានជំរំបឹងត្របែកនៅក្នុងសម័យខ្មែររក្រហម កាលពីឆ្នាំ២០០៨។ ប៉ុន្តែលោកឧបនាយករដ្ឋមន្រ្តី​ ហោ ណាំហុង វិញបានអះអាងថា លោកបានឈ្នះក្តីលើលោក សម រង្ស៊ី ទាំងនៅប្រទេសកម្ពុជា និងនៅប្រទេសបារាំង។

កាលពីឆ្នាំ២០១៣ តុលាការក្រុងភ្នំពេញ ក៏បានកាត់ក្តីឱ្យ លោក សម រង្ស៊ី ចាញ់ឧបនាយករដ្ឋមន្រ្តី ហោ ណាំហុង នៅក្នុងសំណុំរឿងបរិហារកេរ្តិ៍នេះ។ លោក សម រង្ស៊ី ប្រធានគណបក្សសង្រ្គោះជាតិ ក៏ត្រូវបានតុលាការក្រុងភ្នំពេញចេញដីកាឱ្យចាប់ខ្លួន កាលពីថ្ងៃ១៣ ខែវិច្ឆិកា ឆ្នាំ២០១៥ ខណៈដែលលោកកំពុងធ្វើ ទស្សនកិច្ចនៅប្រទេសជប៉ុន ហើយបន្តទៅប្រទេសកូរ៉េខាងត្បូង។ ការបញ្ជាឱ្យចាប់ខ្លួននេះធ្វើឡើងតាមសំណើរបស់ លោកឧបនាយករដ្ឋមន្រ្តី ហោ ណាំហុង ជាដើមបណ្តឹងដែលសុំឱ្យតុលាការអនុវត្តសាលក្រម និងសាលដិកា ដែលលោកបានឈ្នះក្តីលើ លោក សម រង្ស៊ី ពាក់ព័ន្ធនឹងបទ «បរិហាកេរ្តិ៍សាធារណៈ និងញុះញង់ឲ្យមានការរើសអើង» ប្រព្រឹត្តនៅសារមន្ទីរជើងឯក សង្កាត់ដង្កោ ខណ្ឌដង្កោ រាជធានីភ្នំពេញ កាលពីថ្ងៃទី១៧ ខែមេសា ឆ្នាំ២០០៨៕