(តិចសាស)៖ ប្រធានាធិបតីសហរដ្ឋអាមេរិក លោកបារ៉ាក់ អូបាម៉ា បានលុបចោលដំណើរ ទស្សនកិច្ចទៅក្រៅ​ប្រទេស ដោយប្ដូរទិសដៅ ទៅកាន់ទីក្រុងដាឡា (Dallas) រដ្ឋតិចសាសវិញ បន្ទាប់ពីមានករណី បាញ់ប្រហារ​គ្នា​រវាងប៉ូលិស និងក្រុមបាតុករ ដែលកើតចេញពី​តវ៉ារឿង រើសអើងពូជសាសន៍។ នេះបើយោងតាមការចេញផ្សាយ ​របស់សារព័ត៌មាន Reuters នៅថ្ងៃទី០៩ ខែកក្កដា។

ខ្មាន់កាំភ្លើងដែលបានបាញ់សម្លាប់ប៉ូលិស ៥នាក់ ត្រូវបាន​ស្លាប់នៅក្នុងហេតុការណ៍បាញ់តបតគ្នា និងត្រូវបាន​គេស្គាល់អត្តសញ្ញាណ ដោយមានឈ្មោះ Micah Johnson វ័យ ២៥ឆ្នាំ ជាយោធាជើងចាស់មួយរូប ដែលបានបម្រើក្នុង ប្រទេសអាហ្វហ្គានីស្ថាន។ ប៉ូលិសបានរកឃើញ​ឧបករណ៍​ផលិតគ្រាប់បែក និង​អាវុធ​មួយចំនួននៅក្នុងផ្ទះរបស់ខ្មាន់កាំភ្លើងរូបនេះផងដែរ។

ករណីតវ៉ាប្រឆាំងនឹងរើសអើងជាតិសាសន៍នេះ ត្រូវបាន​សហរដ្ឋអាមេរិក ចាត់ទុកថា​ ជាអំពើភេរវកម្មមួយ ព្រោះ​ប៉ូលិស៥នាក់បានស្លាប់ និងរបួស៦នាក់ ដោយសារតែខ្មាន់កាំភ្លើង បានប្រើកាំភ្លើង Sniper បាញ់សំដៅមក​កាន់ក្រុមប៉ូលិស។

គួរបញ្ជាក់ផងដែរថា ដើមហេតុដែលនាំឲ្យកើតមានករណីខាងលើនេះ បណ្ដាលមកពីប៉ូលិសបាន​ជ្រុល​ដៃ​បាញ់​សម្លាប់ជនជាតិស្បែកខ្មៅម្នាក់ ហើយវីដេអូនៃ ការបាញ់នោះ ត្រូវបានមិត្តស្រីរបស់ ជនជាតិស្បែកខ្មៅរូបនោះ ថតបាន និងបង្ហោះតាមប្រព័ន្ធអនឡាញ៕