(ព្រះសីហនុ)៖ នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ បានគូសបញ្ជាក់ថា សមយុទ្ធនាគមាស បានក្លាយជានិម្មិតរូបនៃកិច្ចសហប្រតិបត្តិការរវាងប្រទេស និងកងទ័ពទាំងពីរ កម្ពុជា-ចិន និងរួមចំណែកអបអរសាទរខួបអនុស្សាវរីយ៍លើកទី៦៥ នៃទំនាក់ទំនងការទូតប្រទេសទាំងពីរ ក្នុងការពង្រឹងពង្រីកទំនាក់ទំនងឱ្យកាន់តែជិតស្និទ្ធថែមទៀត។
នាយឧត្តមសេនីយ៍ វង្ស ពិសេន បញ្ជាក់ថា ក្រោមការដឹកនាំប្រកបដោយគតិបណ្ឌិតរបស់ថ្នាក់ដឹកនាំប្រទេសទាំងពីរ គឺសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តម ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន បានធ្វើឲ្យទំនាក់ទំនងមិត្តភាពជាប្រពៃណីមានការរីកចម្រើនឥតឈប់ឈរ និងត្រូវបានបន្តពង្រឹងពង្រីកឲ្យកាន់តែស៊ីជម្រៅលើគ្រប់វិស័យ រហូតឈានដល់កិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ។
ការបញ្ជាក់បែបនេះ ធ្វើឡើងនៅក្នុងឱកាសទទួលស្វាគមន៍ដល់គណៈប្រតិភូ និងនាវាកងទ័ពជើងទឹកនៃកងទ័ពរំដោះប្រជាជនចិន ដឹកនាំដោយឧត្តមសេនីយ៍ឯក វៃ វិនហុយ មេបញ្ជាការតំបន់ភូមិភាគខាងត្បូង នាថ្ងៃទី៤ មេសា នៅកំពង់ផែស្វយ័តក្រុងព្រះសីហនុ ក្នុងឱកាសមកបំពេញទស្សនកិច្ច និងចូលរួមសមយុទ្ធនាគមាសឆ្នាំ២០២៣ ជាមួយកងយោធពលខេមរភូមិន្ទ។
នាយឧត្តមសេនីយ៍ វង្ស ពិសេន បានជឿជាក់ថា សមយុទ្ធនាគមាសឆ្នាំ២០២៣ ពិតជាបានបង្កើនសមត្ថភាព និងចំណេះដឹងដល់កងទ័ពប្រទេសទាំងពីរថែមមួយកម្រិតទៀត ក្នុងនោះបានផ្លាស់ប្តូរបទពិសោធន៍បីគ្នាទៅវិញទៅមក ទាំងការដឹកនាំបញ្ជា យុទ្ធវិធី ក៏ដូចជាបច្ចេកវិជ្ជាយោធាថ្មីៗ ដើម្បីឱ្យកិច្ចសហការអន្តរាគមន៍បានទាន់ពេលវេលា និងមានប្រសិទ្ធភាពខ្ពស់ពេលមានសភាពការណ៍កើតឡើង។
នាយឧត្តមសេនីយ៍ អគ្គមេបញ្ជាការ បានថ្លែងអំណរគុណដល់បក្ស រដ្ឋាភិបាល ប្រជាជន និងកងទ័ពរំដោះប្រជាជនចិន ដែលជានិច្ចកាលបានជួយឧបត្ថម្ភគាំទាំងស្មារតី សម្ភារៈ និងថវិកា យ៉ាងច្រើនដល់កម្ពុជា សម្រាប់កសាង និងអភិវឌ្ឍន៍សេដ្ឋកិច្ច សង្គមកម្ពុជាឲ្យមានការរីកចម្រើនដូចបច្ចុប្បន្ន។
ឧត្តមសេនីយ៍ឯក វៃ វិនហុយ បានថ្លែងនូវការស្វាគមន៍ នាយឧត្តមសេនីយ៍ វង្ស ពិសេន ដែលបានអញ្ជើញមកទស្សនាលើនាវាជើងទឹកកងទ័ពរំដោះប្រជាជនចិន Type 071 Jinggangshan នាឱកាសនេះ ថាបានបង្ហាញឲ្យឃើញពីទំនាក់ទំនងជិតស្និទ្ធ ក្នុងនាមជាអ្នកជិតខាងល្អរវាងប្រទេសទាំងពីរ ជាមិត្តដែកថែប ប្រៀបបីដូចបងប្អូននឹងគ្នា ដែលបានកំណត់គោលដៅដោយសម្តេចតេជោនាយករដ្ឋមន្ត្រី ហ៊ុន សែន និង ឯកឧត្តម ស៊ី ជីងពីង ប្រធានាធិបតីចិន។
ឧត្តមសេនីយ៍ឯក មេបញ្ជាការតំបន់ភូមិភាគខាងត្បូង បានគូសបញ្ជាក់ពីជំហរនៅក្នុងការធ្វើកិច្ចសហប្រតិបត្តិការជាមួយកងយោធពលខេមរភូមិន្ទនៅថ្ងៃអនាគត ទាំងវិស័យកសាងធនធានមនុស្ស ការប្រយុទ្ធប្រឆាំងឧក្រិដ្ឋកម្មឆ្លងដែន ភេរវកម្ម ការជួញដូរមនុស្ស ក៏ដូចជាការរួមចំណែកជាមួយនឹងយន្តការពហុភាគីជាលក្ខណៈតំបន់ដែលមានស្រាប់ ដើម្បីបន្តគាំទ្រដល់សកម្មភាពនានាដែលនាំទៅដល់ការថែរក្សាសន្តិភាព ស្ថិរភាព និងវិបុលភាពនៅក្នុងតំបន់។
ឧត្តមសេនីយ៍ឯក វៃ វិនហុយ បានបង្ហាញជំនឿយ៉ាងមុខមាំថា កិច្ចសហប្រតិបត្តិការទ្វេភាគីដ៏ជិតស្និទ្ធ រវាងកងយោធពលខេមរភូមិន្ទ និងកងទ័ពរំដោះប្រជាជនចិន ជាពិសេស តាមរយៈសកម្មភាព សមយុទ្ធនាគមាសឆ្នាំ២០២៣ កម្ពុជា-ចិន នឹងចូលរួមចំណែកយ៉ាងសំខាន់នៅក្នុងការគាំទ្រដល់ដំណើការទៅមុខ នៃភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។
សូមបញ្ជាក់ថា នាវាជើងទឹកកងទ័ពរំដោះប្រជាជនចិន Type 071 Jinggangshan បានមកដល់ដែនទឹកកម្ពុជាកាលពីថ្ងៃអាទិត្យ ទី២ ខែមេសា បន្ទាប់ពីបានចាកចេញពី Zhanjiang ខេត្ត Guangdong ភាគខាងត្បូងប្រទេសចិនកាលពីថ្ងៃពុធ ដើម្បីចូលរួមសមយុទ្ធនាគមាសឆ្នាំ២០២៣ ជាមួយកងយោធពលខេមរភូមិន្ទ។ លក្ខណៈពិសេសរបស់នាវានេះមានបណ្ដោយប្រវែង ២១០ម៉ែត្រ ទទឹងប្រវែង ២៨ម៉ែត្រ ជម្រៅទឹកប្រវែង ០៧ម៉ែត្រ ល្បឿន ២៥ណត និងអាចផ្ទុកទម្ងន់បាន ២៥.០០០តោន៕
