(ភ្នំពេញ)៖ ក្រសួងសាធារណការ និងដឹកជញ្ជូន នៅថ្ងៃទី០៨ ខែកក្កដា ឆ្នាំ២០១៦នេះ បានចេញសេចក្តីជូនដំណឹងមួយ ដោយបញ្ជាក់ពីការចាប់ផ្តើមអនុវត្ត ដាក់ឲ្យមានជញ្ជីងចល័តថ្លឹង រថយន្តដឹក​ទំនិញ​ធុនធ្ងន់ឡើងវិញ ដោយដាក់ថ្លឹងនៅតាមឃ្លាំងទំនិញ រោងចក្រផលិតសម្ភារៈធ្ងន់ៗ កសិដ្ឋាននានា ការដ្ឋានផលិតថ្ម ដើម្បីត្រួតពិនិត្យថ្លឹងទម្ងន់ដឹកជញ្ជូន មុននឹងអាចធ្វើចរាចរណ៍នៅលើផ្លូវថ្នល់ ឬនៅតាមផ្លូវវាងសំខាន់ៗ ដែលអ្នកបើកបររថយន្តដឹកជញ្ជូនលើសទម្ងន់ បានបើកបរគេចវេសមិនចូលស្ថានីយថ្លឹងយានយន្ត។

ជាងនេះទៅទៀតនោះ ក្រសួងសាធារណការ ក៏បានរំលឹកដល់ម្ចាស់ក្រុមហ៊ុនដឹកជញ្ជូនធុនធ្ងន់ ឬអ្នកបើកបររថយន្តធុនធ្ងន់ និងសាធារណជនទំាងអស់ ឲ្យចូលរួមអនុវត្តវិធានការនេះ និងរាយការណ៍​មកក្រសួងអំពីករណីមន្ត្រីក្រោមឱវាទក្រសួង ដែលបានចាត់ឲ្យទៅបម្រើការងារនៅតាមស្ថានីយជញ្ជីងអចល័ត និងក្រុមជញ្ជីងចល័តបានប្រព្រឹត្ទមិនត្រឹមត្រូវតាមច្បាប់ទោះ ក្នុងភាពណាក៏ដោយ ដូច​ជាទារលុយ ឬដាក់ខែបង់លុយ ជាថ្នូរនឹងបណ្តែតបណ្តោយឲ្យប្រព្រឹត្តបទល្មើសដឹកជញ្ជូនលើសទម្ងន់ តាមរយៈFacebook ដែលមានអាស័យដ្ឋាន www.facebook.com/mpwt.gov.kh ឬ លេខទូរស័ព្ទ ០២៣ ៤២៦ ១៥៧។

សូមជម្រាបថា គោលបំណងនៃការដាក់ដំណើរជញ្ជីងចល័តនេះ ត្រូវបានក្រសួងសាធារណការ អះអាងថា ដើម្បីការពារទ្រព្យសម្បត្តិសាធារណៈ ផ្លូវថ្នល់ ស្ពាន ព្រមទំាងហេដ្ឋារចនាសម្ព័ន្ធ​ទ្រទ្រង់ផ្លូវថ្នល់​ផ្សេងទៀតឲ្យមានចីរភាព ស្ថិតស្ថេរ គង់វង្ស និងជាប់រឹងមាំតាមអាយុកាល បច្ចេកទេសកំណត់ស្របតាមកម្រិតស្តង់ដារនៃការសាងសង់ ក៏ដូចជាចូលរួមចំណែក​កាត់បន្ថយការចំណាយ​ថវិកាជាតិក្នុង​ការជួសជុលថែទំាហេដ្ឋាន​រចនាសម្ព័ន្ធទំាងនោះ​ឡើងវិញ ដែលខូចមុនកាល​កំណត់ផងដែរ៕