(សេអ៊ូល)៖ ការដាក់ឈ្មោះមេដឹកនាំកូរ៉េខាងជើង លោក Kim Jong-Un របស់រដ្ឋាភិបាលទីក្រុង Washington ចូលទៅក្នុងបញ្ជីទណ្ឌកម្មរបស់ខ្លួនជាលើកដំបូង ត្រូវបានស្វាគមន៍ដោយរដ្ឋាភិបាលកូរ៉េខាងត្បូង នៅថ្ងៃព្រហស្បតិ៍នេះ​ ដោយរដ្ឋាភិបាលទីក្រុង Seoul លើកឡើងថា វាគួរតែធ្វើឲ្យមានការដាក់បង្ហាញ នូវការរំលោភបំពានសិទ្ធិមនុស្ស នៅក្នុងប្រទេសផ្តាច់ការនេះ។ នេះបើតាមសារព័ត៌មានស៊ិនហួ ចុះផ្សាយនៅយប់ថ្ងៃទី៧ ខែកក្កដា ឆ្នាំ២០១៦នេះ។ 

សហរដ្ឋអាមេរិកបានឲ្យដឹងថា មេដឹកនាំកូរ៉េខាងជើង លោក Kim Jong-Un និងក្រុមមន្ត្រីកំពូល១០រូបទៀត ក៏ត្រូវបានដាក់ចូលក្នុង បញ្ជីខ្មៅ ដែលជាជនស្ថិតនៅពីក្រោយការរំលោភបំពាន​ ជាសកលរួមមាន៖ ការសម្លាប់ក្រៅប្រព័ន្ធតុលាការ, បង្ខំ និងធ្វើទារុណកម្មពលករ នៅក្នុងប្រព័ន្ធជុំរំ​ពន្ធធនាគារអ្នកទោសនយោបាយ របស់ប្រទេស ដែលបានធ្វើឲ្យកូរ៉េខាងជើង ស្ថិតនៅក្នុងចំណោម «ប្រទេសដែលឃោរឃៅបំផុត នៅក្នុងពិភពលោក»។

រដ្ឋាភិបាលទីក្រុង ​Seoul គាំទ្រសហរដ្ឋអាមេរិក ដែលជាសម្ព័ន្ធរបស់ខ្លួន ដោយបានរំពឹងថា ចលនានេះនឹងបញ្ចាំងពន្លឺ ស្តីពីការរំលោភសិទ្ធិមនុស្ស នៅកូរ៉េខាងជើង។ លោក Phil Robertson អនុប្រធានអង្គការឃ្លាំមើលសិទ្ធិមនុស្សសហរដ្ឋអាមេរិក ប្រចាំតំបន់អាស៊ី បានលើកឡើងថា «វិធានការនេះ គឺជាជំហានដ៏សំខាន់ ដើម្បីឆ្ពោះទៅមុន ក្នុងការសម្រេចបានយុត្តិធម៌ សម្រាប់ជនរងគ្រោះច្រើនរាប់ពុំអស់ ដែលត្រូវបានរំលោភសិទ្ធមនុស្ស នៅក្នុងប្រទេសកូរ៉េខាងជើង»៕