(ក្រចះ)៖ លោក សរ ចំរុង អភិបាលខេត្តក្រចេះ និងលោក ទ្រី សុភ័ក្រ នាយខណ្ឌរដ្ឋបាលព្រៃឈើខេត្តក្រចេះ នៅព្រឹកថ្ងៃទី៧ ខែកក្កដា ឆ្នាំ២០១៦ នេះបានប្រារព្ធពិធីបុណ្យរុក្ខទិវា ឆ្នាំ២០១៦ នៅបរិវេណសាកលវិទ្យាល័យក្រចេះ ភូមិស្រែស្ដៅ សង្កាត់អូរឬស្សី ក្រុងក្រចេះ ស្ដីពីបព្ហាព្រៃឈើ។

ក្នុងឱកាសប្រារព្ធពិធីបុណ្យរុក្ខទិវា លោកអភិបាលខេត្តបានថ្លែងថា «កន្លងមកក៏ដូចជាបច្ចុប្បន្ននេះ ខេត្តក្រចេះ បានជួបប្រទះ និងបញ្ហាប្រឈមជាច្រើនក្នុងបញ្ហាព្រៃឈើ ពិសេសបញ្ហា​កាប់​រាន ដុត ឈូសឆាយដីព្រៃឈើ ពីសំណាក់ជនខិលខូចដែលមានអំណាច មានទឹកប្រាក់ ដើម្បីវាតយកដី​របស់រដ្ឋធ្វើ​ជាកម្មសិទ្ធិផ្ទាល់ខ្លួន ដោយយកប្រជាពល​រដ្ឋ​ធ្វើជា​ខែល​តតាំង​ជាមួយអាជ្ញាធរ និងតាមរយៈ​ការជួលផ្ទាល់ ឬទិញបន្ត ក្នុងតម្លៃថោក»

ចំណែកឯលោក ទ្រី សុភ័ក្រ បានឲ្យដឹងថា «សម្រាប់ឆ្នាំ២០១៦នេះ ខណ្ឌរដ្ឋបាលព្រៃឈើក្រចេះ បានជ្រើសរើស​កំណត់យកទីតាំង​ប្រារព្ធពិធីបុណ្យរុក្ខទិវា​ថ្នាក់ខេត្ត នៅបរិវេណសាកល​វិទ្យាល័យក្រចេះ ក្រុងក្រចេះ ហើយប្រភេទឈើ​ដែលយកមកដាំនៅពេលនោះ ជាប្រភេទឈើ គគី ឈើទាល បេង ធ្នង់ និងឈើហូបផ្លែជាច្រើនទៀត»។

លោក បានបន្តថា «ការប្រារព្ធធ្វើពិធីបុណ្យរុក្ខទិវានាពេលនោះ គឺក្នុងគោលបំណង់ ដើម្បីស្ដារ និងដាំឡើងវិញនូវ ប្រភេទឈើមានរយៈពេលវែង ដើម្បីធ្វើឲ្យប្រសើរឡើង សោភណ្ឌ័ភាព ទេសភាព ធម្មជាតិ បរិស្ថាន និងចូលរួមចំណែកកាត់បន្ថយ ការឡើ​ងកម្ដៅ​​នៅ​ក្នុងពិភពផែនដី និងបម្រែបម្រួលអាកាសធាតុ»។

សូមបព្ជាក់ផងដែលថានៅខេត្តក្រចេះ រុក្ខទិវាត្រូវបានប្រារព្ធធ្វើជា លើកដំបូងនៅឆ្នាំ ១៩៩២ ហើយបានប្រារព្ធ​ធ្វើជារៀង​រាល់​ឆ្នាំ រហូត​មកដល់​ឆ្នាំ​នេះ ហើយដាំបានសរុប ១១៦,១៣១ដើម និងបាន ដាំនៅ​តាមវត្តអារាម តាមសាលារៀន និងនៅតាម​ទីសាធារណៈ មួយ​ចំនួន​ទៀត។ លទ្ធផល​ខាងលើនេះ បានមកដោយការខិតខំប្រឹងប្រែងចូលរួមទាំង កម្លាំងកាយ និងចិត្តរបស់បងប្អូន ប្រជាពលរដ្ឋ លោក​គ្រូ អ្នកគ្រូ សិស្សា​នុសិស្ស កងកម្លាំង​ប្រដាប់អាវុធ និងដោយមានការយកចិត្តទុក​ដាក់ជួយឧបត្ថម្ភគាំទ្រពីអាជ្ញាធររដ្ឋអំណាចគ្រប់ថ្នាក់ ៕