(បាសេឡូណា)៖ កីឡាករបាល់ទាត់ជនជាតិអាហ្សង់ទីន Lionel Messi របស់ក្លឹបអាជីព FC Barcelona និងឪពុករបស់ខ្លួន លោក Jorge Messi ត្រូវតុលាការអេស្ប៉ាញ សម្រេចកាត់ក្តី​ឲ្យជាប់ពន្ធនាគាររយៈពេល ២១ខែ (ជិត២ឆ្នាំ) បង់ប្រាក់ពិន័យ២.៣លានដុល្លារ ពីបទបន្លំ ប្រាក់បង់ពន្ធនៅចន្លោះឆ្នាំ២០០៧ និងឆ្នាំ២០០៩ នាពេលកន្លងមក។

សារព័ត៌មាន BBC របស់អង់គ្លេស បានចេញផ្សាយនៅល្ងាចថ្ងៃពុធ ទី០៦ ខែកក្កដា ឆ្នាំ២០១៦ នេះថា តារាបាល់ទាត់ ឆ្នើម វ័យ២៩ឆ្នាំ Messi រួមជាមួយឪពុករបស់គេ បានលួចបន្លំពន្ធគិត​ជាទឹកប្រាក់ប្រមាណ ៤.៦លានដុល្លារអាមេរិក ដែលជាការបិទបាំងប្រាក់ចំណូលរបស់គេ ដែលបានមកពីការលក់សិទ្ធិរូបភាព ទៅឲ្យក្រុមហ៊ុន Belize និងប្រទេស អ៊ុយរូហ្គាយ ក្នុងចន្លោះឆ្នាំ២០០៧ និង ២០០៩ នេះបើយោងតាមចៅក្រម បានថ្លែងឲ្យដឹងក្នុងពេលជំនុំជំរះក្តី។​

ទាំង Messi និងឪពុករបស់គេ ត្រូវបានរកឃើញគណនីមិនប្រក្រតីចំនួន៣ ពីការបន្លំប្រាក់បង់ពន្ធរបស់ពួកគេ ត្រូវបានរកឃើញដោយតុលាការស្ថិតក្នុងទីក្រុង Barcelona នាថ្ងៃពុធ ទី០៦ កក្កដានេះ គ្រាដែលកីឡាករក្នុងក្រុមជម្រើសជាតិអាហ្សង់ទីនមួយនេះ បានបដិសេធថា «រូបគេមិនដឹងអីសោះ» អំពីការរៀបចំ ហិរញ្ញវត្ថុ របស់គេឡើយ ដោយបានលើកឡើងថា គេជាកីឡាករបាល់ទាត់មួយរូប ដោយមិនបានដឹងពីច្បាប់ជ្រៅជ្រះរបស់អេស្ប៉ាញឡើយ៕