(ភ្នំពេញ)៖ អតីតមន្រ្តីមកពីគណបក្សសិទ្ធិមនុស្ស និងជាមនុស្សជំនិតរបស់លោក កឹម សុខា មួយរូបសុំមិនបញ្ចេញឈ្មោះ​បានទម្លាយ និងសម្តែងនូវក្តីកង្វល់ប្រាប់អង្គភាព Fresh News ឲ្យដឹង​នៅល្ងាចថ្ងៃទី០៥ ខែកក្កដា ឆ្នាំ២០១៦នេះថា បច្ចុប្បន្ននេះលោកពិតមានក្តីកង្វល់ នឹងព្រួយបារម្ភចំពោះទង្វើ និងសកម្មភាពរបស់លោក សម រង្ស៊ី ដែលហាក់ដូចមានបំណងចង់ឲ្យលោក កឹម សុខា និងមន្រ្តីសំខាន់ៗមួយចំនួនបន្តជាប់គុកអញ្ជឹង, ព្រោះលោក សម រង្ស៊ី តែងតែបង្កនូវភាពញុះញង់ អុចអាលឲ្យគណបក្សប្រជាជនកម្ពុជាខឹង និងក្តៅក្រហាយមិនចេះអស់។

មនុស្សជំនិតរបស់លោក កឹម សុខា ដែលបច្ចុប្បន្នជាមន្រ្តីជាន់ខ្ពស់នៅ CNRP រូបនោះបានបន្តបញ្ជាក់ថា ដូចទង្វើថ្ងៃនេះអញ្ជឹង នៅសុខៗទៅអុចអាល គណបក្សកាន់អំណាច ដោយប្រើប្រាស់ Facebook បង្ហោះនូវព្រឹត្តិការណ៍ថ្ងៃ៥-៦ កក្កដា ឆ្នាំ១៩៩៧ ថា ជារដ្ឋប្រហារដោយគណបក្សប្រជាជនកម្ពុជា, តាមរយៈទង្វើធ្វើឲ្យរដ្ឋាភិបាលខឹងមិនចេះចប់ មិនចេះហើយ របស់លោក សម រង្ស៊ី បែបនេះ​អាច​សន្និដ្ឋានបានថា លោក សម រង្ស៊ី កំពុងមានចេតនា​ចង់ឲ្យលោក កឹម សុខា និងមន្រ្តីសំខាន់ៗមួយ​ចំនួនទៀត​របស់គណបក្ស​សង្គ្រោះជាតិ បន្តជាប់គុក​គ្មានថ្ងៃចេញ។

មន្រ្តីជំនិតដដែល​រូបនោះបាន​ពោលពាក្យថា «តើជាការពិតមែនឬ ដែលលោក សម រង្សី មានបំណងចង់សម្លាប់លោក កឹម សុខា និងមន្រ្តីមួយចំនួនទៀតដោយប្រយោល?»

ការលើកឡើង និងបង្ហាញនូវក្តីបារម្ភរបស់មនុស្សជំនិតលោក កឹម សុខា បែបនេះ ធ្វើឡើងបន្ទាប់ពីមានមន្រ្តីជាន់ខ្ពស់រាជរដ្ឋាភិបាលកម្ពុជា បានឆ្លើយតប ទៅលោក សម រង្ស៊ី វិញថា «ដោយសារភាព​មិនម៉ត់ចត់របស់ មេដឹកនាំបក្សប្រឆាំងយ៉ាងនេះហើយ ទើបគណបក្សប្រជាជនកម្ពុជាព្រងើយកន្តើយ មិនអើពើចរចា មិនខ្ចីនិយាយរក, ព្រោះមេដឹកនាំបក្សប្រឆាំងនេះមានចរិតលីលា មួយថ្ងៃសុំចរចា មួយថ្ងៃរិះគន់វាយប្រហារមេដឹកនាំរាជរដ្ឋាភិបាល»៕