(ភ្នំពេញ)៖ ដោយទទួលបានបទបញ្ជាពី នាយឧត្តមសេនីយ៍ស្នងការនគរបាលរាជធានីភ្នំពេញ ជួន សុវណ្ណ និងក្រោមការសម្របសម្រួលពីតំណាងអយ្យការ លោកឧត្តមសេនីយ៍ត្រី ព្រុំ សន្ធរ ស្នងការរង និងជាប្រធានការិយាល័យកណ្តាលប្រឆាំងបទល្មើស នៅថ្ងៃទី០៥ ខែកក្កដា ឆ្នាំ២០១៦នេះ បានដឹកនាំកម្លាំងសមត្ថកិច្ច បើកប្រតិបត្តិការចុះបង្រ្កាបករណី ជួញដូរមនុស្សឆ្លងដែន ដោយបានឃាត់ខ្លួនជនសង្ស័យម្នាក់ និងបានជួយរំដោះស្រ្តីរងគ្រោះចំនួន៦នាក់ផ្សេងទៀត ក្នុងផ្ទះសំណាក់យីហោរ «តារា» ស្ថិតនៅផ្លូវលេខ១៣៩ សង្កាត់វាលវង់ ខណ្ឌ៧មករា។
លោក ព្រុំ សន្ធរ បានបញ្ជាក់ថា ជនសង្ស័យនាមឈ្មោះ ធឿន ពុទ្ធា ហ ឡាយ ធីជិន ភេទស្រី អាយុ២៤ឆ្នាំ ជនជាតិ ខ្មែរ ស្នាក់នៅចំណុងកើតហេតុខាងលើ បាននាំយកស្រ្តីទាំង៦នាក់នេះ មកស្នាក់នៅបណ្ដោះអាសន្ន ដើម្បីត្រៀមនាំទៅប្រទេសចិន ដោយឆ្លងកាត់តាមប្រទេសវៀតណាម។
ក្រោយពីបានចុះបង្ក្រាបករណីនេះ រួចហើយ កម្លាំងសមត្ថកិច្ច បានបញ្ជូនអ្នកពាក់ព័ន្ធខាងលើ ទៅកាន់ការិយាល័យប្រឆាំង ការជួញដូរមនុស្ស និងការពារអនីតិជន និងបានអនុញ្ញាតឱ្យ ឪពុកម្តាយជនរងគ្រោះ ចំនួន២នាក់ និងបងស្រីជនរងគ្រោះម្នាក់ចូលទៅទទួលជនរងគ្រោះ ព្រមទាំងបានធ្វើការសាកសួរ និងស្រាវជ្រាវបន្ត៕
