(ភ្នំពេញ)៖ លោក ជិន ម៉ាលីន អ្នកនាំពាក្យក្រសួងយុត្តិធម៌ បានរំលឹកទៅក្រុម​មេ​ធាវី​របស់លោក កឹម សុខា ថា គ្រាន់តែសុំការអនុញ្ញាតពីព្រះរាជអាជ្ញា ដើម្បីចូល​ជួបលោក កឹម សុខា មិនធ្ងន់ស្រាល ឬទាស់ខុសអីនោះឡើយ ព្រោះជាការ​តម្រូវ​ដោយលក្ខខណ្ឌកំណត់ក្នុងសាលក្រម។

ក្រុមមេធាវីរបស់លោក កឹម សុខា នៅថ្ងៃទី១៤ ខែមីនា បានចេញសេចក្តីថ្លែង​ការណ៍​មួយដោយលើកឡើងថា​ សិទ្ធិទទួលបានជំនួយមេធាវីរបស់លោក កឹម សុខា ត្រូវបានរំលោភ។ ការចេញសេចក្តីថ្លែងការណ៍បែបនេះ បន្ទាប់ពីក្រុមមេធាវី ត្រូវបានកម្លាំងសមត្ថកិច្ចយាមកាមនៅក្រៅបរិវេណផ្ទះលោក កឹម សុខា មិន​អនុញ្ញាត​ឱ្យពួកគេចូលជួបលោក កឹម សុខា ដោយទាមទារឱ្យមានការ​អនុញ្ញាត​ពី​ព្រះរាជអាជ្ញាជាមុនសិន។

តាមរយៈបណ្តាញតេឡេក្រាមនៅថ្ងៃទី១៥ ខែមីនា ឆ្នាំ២០២៣នេះ លោក ជិន ម៉ាលីន បានចាត់ទុកការរារាំងរបស់សមត្ថកិច្ចមិនជាការរំលោភលើសិទ្ធិលោក កឹម សុខា ក្នុងការទទួល​បាន​ជំនួយមេធាវីនោះឡើយ។

លោក ជិន ម៉ាលីន បានលើកឡើងដូច្នេះ «បើគ្រាន់តែសុំការអនុញ្ញាតពីបន្តិចទៅ ដូចជាមិនទាស់ខុសអីទេ ព្រោះវាតម្រូវដោយលក្ខខណ្ឌកំណត់ក្នុង​សាលក្រម​តុលាការ ដែលមានអំណាចតាមផ្លូវច្បាប់។ ប្រសិនបើព្រះរាជអាជ្ញាមិនអនុញ្ញាត នោះទើបជាការរំលោភបំពានសិទ្ធិមេធាវីក្នុងការជួបជាមួយកូនក្តី»។

រដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានរំលឹកទៅមេធាវីការពារក្តី របស់លោក កឹម សុខា ផងដែរថា សូម្បីតែការចូលជួបកូនក្តីក្នុងពន្ធនាគារ ក៏ត្រូវតែសុំការអនុញ្ញាតពីអ្នកគ្រប់គ្រងពន្ធនាគារដែរ។

លោក ជិន ម៉ាលីន បានដាក់ការសង្ស័យថា ប្រសិនបើមេធាវីការពារក្តីលោក កឹម សុខា មានចេតនាជួបជាមួយកូនក្តីពិតប្រាកដមែន គ្រាន់តែស្នើសុំបន្តិចទៅ​ព្រះរាជអាជ្ញា ដូចជាមិនអីនោះទេ លើកលែងតែមានចេតនាផ្សេងពីនេះ?

សូមរំលឹកថាក្នុងសាលក្រមផ្តន្ទាទោសលោក កឹម សុខា កាលពីថ្ងៃទី០៣ ខែមីនា ឆ្នា២០២៣ បានកំណត់ថា លោក កឹម សុខា ត្រូវបានហាមមិនឱ្យចាកចេញពីបរិវេណនៃលំនៅឋាន ផ្ទះលេខ​៩៧ ផ្លូវលេខ៣១៣ ភូមិ៧ សង្កាត់បឹងកក់ទី២ខណ្ឌទួលគោក រាជធានីភ្នំពេញ លើក​លែងតែមានការអនុញ្ញាត ដោយព្រះរាជអាជ្ញា​នៃអយ្យការ​អមសាលា​ដំបូងរាជធានី​ភ្នំពេញ។ លោក កឹម សុខា ក៏ត្រូវបានហាមមិនឱ្យជួប​បុគ្គលណា​ម្នាក់​ទាំង​សញ្ញាតិខ្មែរ និងបរទេស ដោយផ្ទាល់ ឬដោយ ប្រយោលតាមប្រព័ន្ធបច្ចេកវិទ្យា ក្រៅពីសមាជិកគ្រួសារ លើកលែងតែមានការ អនុញ្ញាតដោយព្រះរាជអាជ្ញា​អយ្យការ​អមសាលា​ដំបូងរាជធានីភ្នំពេញ ដោយ យោងលើតម្រូវការចាំបាច់តែប៉ុណ្ណោះ៕