(ព្រះសីហនុ)៖ ឃ្លាំងដាក់ម៉ាស៊ីនរបស់សណ្ឋាគារ វ៉ាយថ៍ស៊ែនភែលេស នៅតាមបណ្តោយផ្លូវកោះពូឡូវ៉ៃ ស្ថិតក្នុងភូមិ៤ សង្កាត់លេខ៤ ក្រុង/ខេត្តព្រះសីហនុ ត្រូវបានអគ្គិភ័យឆេះបង្កការភ្ញាក់ផ្អើល នៅវេលាម៉ោង ៨៖៣៥នាទីព្រឹក ថ្ងៃទី១៤ ខែមីនា ឆ្នាំ២០២៣។
តាមសេចក្តីរាយការណ៍ពីសមត្ថកិច្ច បានឲ្យដឹងថា ក្រោយមានហេតុការណ៍នេះ លោកឧតម្តសេនីយន៍ទោ ជួន ណារិន្ទ ស្នងការនគរបាលខេត្តព្រះសីហនុ បានបញ្ជូនកម្លាំងសមត្ថកិច្ច និងរថយន្តពន្លត់អគ្គិភ័យទៅបាញ់ពន្លត់ រហូតគ្រប់គ្រងស្ថានភាពបាន។
មន្រ្តីជំនាញនគរបាលពន្លត់អគ្គិភ័យខេត្តព្រះសីហនុ បានបញ្ជាក់ថា សម្រាប់ប្រតិបត្តិការពន្លត់អគ្គិភ័យនេះ កម្លាំងសមត្ថកិច្ចបានប្រើប្រាស់រថយន្តពន្លត់អគ្គិភ័យជិត៥គ្រឿង។
ករណីអគ្គិភ័យនេះ បណ្តាលមកពីផ្ទុះអាគុយ និងឆ្លងចរន្តខ្សែភ្លើងនៅក្នុងនោះ តែយ៉ាងណាមិញ មិនមានអ្នករងរបួស និងខូចខាតសម្ភារអ្វីច្រើននោះឡើយ៕
