(ភ្នំពេញ)៖ លោក ចាស្ទីន ខេវិន វ៉ាយអេត (Justin Kevin Whyatt) ឯកអគ្គរាជទូតអូស្ត្រាលីប្រចាំនៅកម្ពុជា បានប្តេជ្ញាលើកកម្ពស់ទំនាក់ទំនងជាមួយកម្ពុជាឱ្យកាន់តែល្អប្រសើរ។ ជាពិសេសនឹងជំរុញកិច្ចសហប្រតិបត្តិការលើវិស័យមួយចំនួនទៀត មានដូចជាការវិនិយោគ ពាណិជ្ជកម្ម ប្រជាធិបតេយ្យ និងការដោះមីនជាដើម។
លោក ចាស្ទីន វ៉ាយអេត បានគូសបញ្ជាក់បែបនេះ ក្នុងពេលអញ្ជើញជួបសម្តែងការគួរសមជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅព្រឹកថ្ងៃចន្ទ ទី១៣ ខែមីនា ឆ្នាំ២០២៣នេះ នៅវិមានសន្តិភាព។
លោក អ៊ាង សុផល្លែត ជំនួយការផ្ទាល់របស់សម្តេចតេជោនាយករដ្ឋមន្ត្រី បានឱ្យដឹងថា ក្នុងជំនួបនេះ លោកឯកអគ្គរាជទូត បានជម្រាបសម្តេចតេជោ ដោយបង្ហាញនូវអារម្មណ៍រីករាយ ដែលបានវិលត្រឡប់មកបំពេញការងារនៅកម្ពុជាជាថ្មីទៀត បន្ទាប់ពីបញ្ចប់ការងារលើកដំបូងនៅកម្ពុជាអស់រយៈពេលជាង២០ឆ្នាំមកនោះ។
លោកឯកអគ្គរាជទូត ក៏បានជម្រាបសម្តេចតេជោ ពីការកត់សម្គាល់របស់លោកពីការរីកចម្រើនរបស់កម្ពុជានាពេលបច្ចុប្បន្ន ដែលខុសគ្នាឆ្ងាយបើធៀបពេលលោកបំពេញការងារនៅកម្ពុជាកាលពីជាង២០ឆ្នាំមុន។
លោក ចាស្ទីន វ៉ាយអេត ក៏សម្តែងការគោរពចំពោះការដឹកនាំរបស់សម្តេចតេជោ ដោយបាន ទប់ស្កាត់ការរីករាលដាលជំងឺកូវីដ១៩ នាពេលកន្លងមក។ ជាពិសេសការរៀបចំ និងដឹកនាំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធកាលពីឆ្នាំ២០២២ ដោយបាននាំមកនូវកិត្តិនាម និងកិត្តិស័ព្ទដ៏ល្អរន្ធឺជូនកម្ពុជា។
ជាមួយនឹងបេសកកម្មការងារជាឯកអគ្គរាជទូតនៅកម្ពុជា លោក ចាស្ទីន វ៉ាយអេត បានជម្រាបសម្តេចតេជោថា លោកនឹងប្រឹងប្រែងលើកកម្ពស់ទំនាក់ទំនងរវាងកម្ពុជា និងអូស្ត្រាលី ព្រមទាំងកិច្ចសហប្រតិបត្តិការដទៃទៀតឱ្យកាន់តែល្អប្រសើរ។
លោកឯកអគ្គរាជទូត បានជម្រាបសម្តេចតេជោថា កិច្ចការដែលលោកនឹងប្រឹងប្រែងជំរុញដើម្បីលើកកម្ពស់កិច្ចសហប្រតិបត្តិការនោះមានដូចជា៖ ទំនាក់ទំនងរវាងប្រជាជន និងប្រជាជន, ទំនាក់ទំនងរវាងអ្នកវិនិយោគ និងអ្នកវិនិយោគ, កិច្ចសហប្រតិបត្តិការលើវិស័យកសិកម្ម, វិស័យសុខាភិបាល, ការដោះមីន ជួយកម្ពុជាឱ្យសម្រេចគោលដៅជាប្រទេសគ្មានមីននៅឆ្នាំ២០២៥, សង្គមកិច្ច, លទ្ធិប្រជាធិបតេយ្យ និងសិទ្ធិមនុស្ស, ការពារជាតិ, ទប់ស្កាត់ឱក្រិដ្ឋកម្មឆ្លងដែន ជួញដូរគ្រឿងញៀន ជួញដូរមនុស្ស និងឧក្រិដ្ឋកម្មផ្សេងៗទៀត។
សម្តេចតេជោនាយករដ្ឋមន្ត្រី បានសម្តែងការស្វាគមន៍ និងអបអរសាទរជូនលោកឯកអគ្គរាជទូត ដែលបានតែងតាំងបំពេញបេសកកម្មការងារនៅកម្ពុជាជាថ្មី។
សម្តេចតេជោនាយករដ្ឋមន្ត្រី បានសម្តែងនូវក្តីរីករាយចំពោះកិច្ចសហប្រតិបត្តិការរវាងកម្ពុជា និងអូស្ត្រាលី។ ជាពិសេសលើវិស័យកសិកម្ម ដែលក្នុងនោះអូស្ត្រាលី បានជួយបង្កើតវិទ្យាស្ថានស្រាវជ្រាវ និងអភិវឌ្ឍកសិកម្ម (CARDI) សម្រាប់ការស្រាវជ្រាវលើវិស័យកសិកម្ម។ ការស្រាវជ្រាវនោះ បានជួយកម្ពុជា ទទួលបានពូជស្រូវល្អ ជាប់ចំណាត់ថ្នាក់លេខ១ ក៏ដូចជាពូជស្រូវជាច្រើនដទៃទៀត។
សម្តេចតេជោ ក៏បានថ្លែងអំណរគុណជូនចំពោះរដ្ឋាភិបាល និងប្រជាជនអូស្ត្រាលី ដែល បានផ្តល់វ៉ាក់សាំងទប់ស្កាត់ការរាតត្បាតជំងឺកូវីដ១៩។ សម្តេចតេជោ បានលើកឡើងថា ជោគជ័យរបស់កម្ពុជាលើការទប់ស្កាត់ជំងឺកូវីដ១៩ មិនអាចកាត់ផ្តាច់បានពីការគាំទ្រ និងជួយពីអូស្ត្រាលីនោះឡើយ។
សម្តេចតេជោនាយករដ្ឋមន្ត្រី ក៏បានថ្លែងអំណរគុណដល់រដ្ឋាភិបាល និងប្រជាជនអូស្ត្រាលី ដែលបានជួយកម្ពុជាលើការងារដោះមីន និងកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងវិនិយោគ រួមនិងវិស័យដទៃទៀត៕
