(កណ្ដាល​)៖​ រឿង​សហាយ​ស្មន់​ឈាន​ដល់ការ​​សម្លាប់​​មនុស្ស​ច្រក​បាវ​បណ្តែត​ទឹក​ទន្លេ​ រហូតមកទល់​ពេល​នេះ​ សមត្ថកិច្ច​បាន​វែក​មុខ​​ជនដៃដល់​ពីរ​នាក់​​ដែល​ជា​ប្តី​ប្រពន្ធ​នឹង​គ្នា​ ហើយ​ត្រូវ​បាន​តុលាការ​សម្រេច​ឃុំ​ខ្លួន​ដាក់​ពន្ធនាគារ​​បណ្តោះអាសន្ន​ដើម្បី​រង់ចាំ​ការ​ស៊ើបអង្កេត​បន្ត​ទៀត​ ។

មន្ត្រី​តុលាការ​ថ្លែងឲ្យដឹង​ថា​ ពីរ​នាក់​ប្តីប្រពន្ធ​នេះ​ ត្រូវបាន​លោក​ គឹម​ ម៉េង​ ចៅក្រម​ស៊ើប​សួរ​សាលា​ដំបូង​​ខេត្ត​កណ្ដាល​ សម្រេច​នៅល្ងាច​ថ្ងៃ​ទី​៤​ ខែ​កក្កដា​ ឆ្នាំ​២០​១៦​ ឃុំ​ខ្លួន​ដាក់​ពន្ធនាគារ​ ក្រោម​ការ​ចោទប្រកាន់​ពី​ឃាតកម្ម​គិត​ទុក​ជា​មុន​ និង​បទ​សមគំនិត​​ក្នុង​អំពើ​ឃាត​កម្ម​គិត​ទុក​ជា​មុន​ តាម​មាត្រា​២៩និង​ មាត្រា​២០០​នៃ​ក្រម​ព្រហ្មទណ្ឌ​  ប្រព្រឹត្ត​កាលពី​ថ្ងៃទី​២៣​ ខែ​មិថុនា​ ឆ្នាំ​២០១៦​ នៅចំណុច​ភូមិ​តានូ​ ឃុំ​ស្អាង​ភ្នំ​ ស្រុក​ស្អាង​ ខេត្ត​កណ្ដាល​។ បទ​ល្មើស​នេះ​កំណត់​ការ​ផ្តន្ទា​ទោស​អស់​មួយ​ជីវិត​ ។

សមត្ថកិច្ច​បញ្ជាក់​ថា​ ជនដៃដល់​ជា​ប្តី​មាន​ឈ្មោះ​ ខេម ខេង អាយុ២៩ឆ្នាំ​ និង​ប្រពន្ធ​ ឈ្មោះចាប សុខជឿន អាយុ២៦ឆ្នាំ​ ត្រូវ​បាន​សមត្ថកិច្ច​ព្រហ្មទណ្ឌ​កម្រិត​​ធ្ងន់​នៃ​ស្នងការដ្ឋាន​​នគរបាល​ខេត្ត​កណ្ដាល​ ឃាត់​ខ្លួន​កាលពី​ថ្ងៃទី​៣​ ខែ​កក្កដា​ ឆ្នាំ​២០១៦​ ។

នៅ​ដំណាក់កាល​សមត្ថកិច្ច​ ឈ្មោះ​ ខេម​ ខេង​ បាន​សារភាព​ថា​ ខ្លួនពិតជាបានសម្លាប់ឈ្មោះ លៃ លីន ពិតប្រាកដមែនដោយមូលហេតុ ឈ្មោះ លៃ លីន លបលួច ទាក់ទងស្រឡាញ់ប្រពន្ធរបស់ខ្លួន  ហើយខ្លួនក៍តាមទាន់ ពេលអ្នកទាំង​ពីរ​អោបថើបគ្នា។  បន្ទាប់មក​ខ្លួន​បានប្រាប់ប្រពន្ធឲ្យ​ទូរស័ព្ទ​ហៅឈ្មោះលៃ លីន មកដើម្បីសម្លាប់ ។  

រហូត​ដល់​ថ្ងៃទី២៣ ខែមិថុនាឆ្នាំ២០១៦  ខ្លួនបានឲ្យប្រពន្ធ ណាត់​ឈ្មោះ លៃ លីន មកជួបនៅផ្ទះ ហើយខ្លួនបានរៀបចំ ចរន្តអគ្គិសនីដើម្បីត្រៀមឆក់ ពេលឈ្មោះ លៃ លីន មកដល់ផ្ទះខ្លួន ក៍យក ប្រដាប់ឆក់ នោះឆក់ទៅលើ ឈ្មោះ លៃ លីន បណ្ដាលឲ្យ សន្លប់ហើយ ក៍យកត្បូងចប វាយលើក្បាលបន្ថែមទៀត បន្ទាប់មក ក៍យកថង់ផ្លា​ស្ទិក​ ច្រកក្បាល យកកៅស៊ូ រិតកង់ រិតកបន្ថែមកុំឲ្យចេញ ឈាម និងយកការុ៉ង មានថង់ផ្លាស្ទីចខាងក្នុងច្រកសសពសែង​ពីរ​នាក់ ប្ដី ប្រពន្ធ យកមកទម្លាក់ចោល នៅត្រពាំងតាណែម ដែលមានចម្ងាប្រហែល២០០ម៉ែត្រពីផ្ទះ រួចងូតទឹកចូលដេក ។ ចំណែក ចបកាប់ ទុកក្នុងរោងគោ​និង​ខ្សែភ្លើង ដែក ដង​ឫស្សី​ ទុកនៅក្រោមគ្រែ ក្នុងផ្ទះ ។

ករណីនេះ​សមត្ថកិច្ច​បាន​សន្និដ្ឋាន​ថា​ជា​ឃាតកម្ម ដោយមានការគ្រោងរៀបចំគិតទុកជាមុន ផ្ដើមចេញពីអំពើ ផិតក្បត់ ក្នុងគ្រួសារ បង្កឲ្យមានគំនុំសងសឹក ទើបរៀបចំគម្រោង ការសម្លាប់ ដោយត្រៀមរៀបចំឧបករណ៍ដើម្បីធ្វើសកម្មភាពសម្លាប់ ដើម្បីដោះស្រាយគំនុំនិងបញ្ចប់ស្នេហាត្រីកោណ៕