(ភ្នំពេញ)៖ ផ្ទះវិឡាភ្លោះមួយកន្លែង ត្រូវបានអគ្គិភ័យឆាបឆេះយ៉ាងសន្ធោសន្ធៅ បង្កការភ្ញាក់ផ្អើលដល់កម្លាំងសមត្ថកិច្ចចេញរថយន្តពន្លត់អគ្គិភ័យជួយអន្តរាគមន៍ភ្លាមៗ។ ហេតុការណ៍នេះ បានកើតឡើងនៅចំណុចផ្ទះលេខ៧ ផ្លូវលេខ២ ភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ នាវេលាម៉ោង ៧៖៥០នាទីព្រឹកថ្ងៃទី៧ ខែមីនា ឆ្នាំ២០២៣នេះ បានបំផ្លាញសម្ភារខាងក្រោមពែកខាងមុខអស់មួយចំនួន និងប្រើប្រាស់ឡានទឹកអស់ចំនួន៣គ្រឿងទើបគ្រប់គ្រងបានមិនឲ្យរីករាលដាល។
លោកវរសេនីយ៍ឯក ព្រហ្ម យ៉ន នាយការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានប្រាប់ Fresh News ឲ្យដឹងថា ក្រោយពីទទួលបានព័ត៌មានពីប្រជាពលរដ្ឋ រាយការណ៍មកកាន់លេខ ៦៦៦ ថា មានករណីអគ្គិភ័យកំពុងឆាបឆេះផ្ទះវិឡាភ្លោះ, ភ្លាមៗនោះលោកបានបញ្ជារថយន្តពន្លត់អគ្គិភ័យចេញជួយអន្តរាគមន៍តែម្តង។
លោកវរសេនីយ៍ឯក ព្រហ្ម យ៉ន បានបន្តថា ចំពោះករណីខាងលើ មិនបណ្តាលឲ្យមានមនុស្សស្លាប់ ឬរបួសមនុស្សណាម្នាក់នោះទេ។ រឺឯផ្ទះវិឡាភ្លោះ ដែលត្រូវអគ្គិភ័យឆាបឆេះជាប្រភេទសំណង់វិឡាភ្លោះ ទំហំ ៧ម៉ែត្រ គុណនឹង ១៨ម៉ែត្រ។
លោកវរសេនីយ៍ឯក ព្រហ្ម យ៉ន បានបន្តទៀតថា ករណីអគ្គិភ័យនេះ កម្លាំងសមត្ថកិច្ចបានបាញ់ទឹកពន្លត់ នៅវេលា៨៖៥០នាទី ក្នុងនោះសមត្ថកិច្ចបានប្រើរថយន្តការិយាល័យអគ្គិភ័យចំនួន៤គ្រឿង ប្រើប្រាស់ទឹកអស់ចំនួន៣ឡាន ស្មើនឹង១២ម៉ែត្រគូប។
ជាចុងក្រោយ លោកវរសេនីយ៍ឯក ព្រហ្ម យ៉ន បានសំណូមពរដល់បងប្អូនប្រជាពលរដ្ឋទាំងអស់នៅក្នុងរាជធានីភ្នំពេញ ត្រូវតែបង្កើតការប្រុងប្រយ័ត្នឲ្យបានខ្ពស់បំផុត៕
