(ភ្នំពេញ)៖ លោក ជា ចាន់តូ ទេសាភិបាលធនាគារជាតិនៃកម្ពុជា បានលើកឡើងថា បច្ចុប្បន្នស្ត្រីមិនត្រឹមតែទទួលបន្ទុក ថែទាំគ្រួសារប៉ុណ្ណោះទេ ថែមបានចូលរួមចំណែកក្នុងការកសាង និងអភិវឌ្ឍសង្គមជាតិ ទាំងផ្នែកនយោបាយការងារ សង្គម និងសេដ្ឋកិច្ច ដោយសារស្ត្រីមានប្រាជ្ញាស្មារតី និងតស៊ូអត់ធ្មត់ក្នុងការដោះស្រាយបញ្ហា នៅគ្រប់កាលៈទេសៈទាំងអស់។
ការលើកឡើងរបស់លោក ជា ចាន់តូ ធ្វើឡើងក្នុងឱកាសអបអរសាទរខួបអនុស្សាវរីយ៍លើកទី១១២ នៃទិវាអន្តរជាតិនារី៨ មីនា ឆ្នាំ២០២៣ នៅមណ្ឌលសិក្សាបច្ចេកទេសធនាគារជាតិនៃកម្ពុជា នៅថ្ងៃទី៧ ខែមីនា ឆ្នាំ២០២៣ ក្រោមប្រធានបទ «ស្រ្តីរួមគ្នារក្សាសុខសន្តិភាព ដើម្បីកិច្ចអភិវឌ្ឍក្នុងយុគសម័យឌីជីថល»។
ក្នុងឱកាសអបអរសាទរខួបអនុស្សាវរីយ៍លើកទី១១២ នៃទិវាអន្តរជាតិនារី៨ មីនា រៀបចំឡើងក្នុងគោលបំណងបន្តរំលេចពី តម្លៃនៃការចូលរួមរបស់ស្រ្តី ដែលមិនអាចកាត់ថ្លៃបាន ក្នុងការថែរក្សាសុខសន្តិភាពក៏ដូចជា កំពុងចូលរួមយ៉ាងសកម្ម ក្នុងការពន្លឿនកិច្ចអភិវឌ្ឍលើគ្រប់វិស័យ។
លោក ជា ចាន់តូ បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្រ្តីបុគ្គលិកធនាគារជាតិនៃកម្ពុជា គ្រប់លំដាប់ថ្នាក់ ដែលបានសហការគ្នាបំពេញការងារ ប្រកបដោយស្មារតីទទួលខុសត្រូវខ្ពស់ ហើយបានរួមចំណែកកសាងសមិទ្ធផលជូនធនាគារជាតិនៃកម្ពុជា ជាពិសេសបានរួមចំណែកកសាង ប្រព័ន្ធធនាគារនៅកម្ពុជា ឲ្យមានការរីកចម្រើន និងទទួលបានការគាំទ្រ និងជំនឿទុកចិត្តពីសាធារណជនជាតិ-អន្តរជាតិជាលំដាប់ ហើយទាំងនេះជាសមិទ្ធផលរួម និងជោគជ័យរួមរបស់យើងទាំងអស់គ្នា។
លោកទេសាភិបាល ក៏បានប្រកាសគាំទ្រប្រធានបទឆ្នាំនេះ ដែលផ្ដោតជាសំខាន់ទៅលើតម្លៃ នៃការរួបរួមរបស់ស្រ្តី ក្នុងការរក្សាសុខសន្តិភាព និងដើម្បីកិច្ចអភិវឌ្ឍ ក្នុងយុគសម័យឌីជីថល និងបានលើកទឹកចិត្តឲ្យស្ត្រី និងបុរស មានសិទ្ធិ និងឱកាសដូចគ្នា ក្នុងការទទួលបានចំណេះដឹង និងជំនាញបច្ចេកទេសគ្រប់ផ្នែក និងចូលរួមគ្រប់វិស័យ ព្រោះស្ត្រីមិនត្រឹមតែទទួលបន្ទុកថែទាំគ្រួសារប៉ុណ្ណោះទេ តែថែមទាំងបានរួមចំណែកជាច្រើន ក្នុងការកសាង និងអភិវឌ្ឍសង្គមជាតិទាំងផ្នែកនយោបាយ ការងារ សង្គម និងសេដ្ឋកិច្ច។
លោក ជា ចាន់តូ បានបន្តថា «បច្ចុប្បន្នធនាគារជាតិនៃកម្ពុជា មានមន្រ្តីបុគ្គលិកជានារី ប្រហាក់ប្រហែលនឹងមន្ត្រីបុគ្គលិកជាបុរស ក្នុងនោះមន្រ្តីបុគ្គលិកជានារីមានចំនួន៩២៩នាក់ នៃមន្រ្តីបុគ្គលិកសរុបទូទាំងប្រទេសចំនួន១.៨៨៣នាក់ ចំនួននេះបញ្ជាក់ថា សមាមាត្រមន្ត្រីជាស្តី្រ ចាប់តាំងពីថ្នាក់ទេសាភិបាលរង ដល់មន្រ្តីបុគ្គលិក បានកើនដល់ជាង៤៩% នៃចំនួនសរុប ក្នុងនោះចំនួនស្តី្រចាប់ ពីថ្នាក់ការិយាល័យឡើង បានកើនឡើងដល់៣០%នៃចំនួនស្រ្តីសរុប។ ស្តី្រនៅធនាគារជាតិនៃកម្ពុជា ភាគច្រើនទទួលខុសត្រូវលើការងារដឹកនាំ និងគ្រប់គ្រងការងារជំនាញបច្ចេកទេស និងការងារប្រតិបត្តិការជាដើម»។
ទន្ទឹមនេះយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល បានចាត់ទុកតួនាទីស្រ្ដី គឺជាឆ្អឹងខ្នងនៃសេដ្ឋកិច្ច និងសង្គមជាតិ ហើយផែនការយុទ្ធសាស្ត្រនារីរតនៈ ក៏ត្រូវបានបង្កើតឡើង ដើម្បីជំរុញការលើកកម្ពស់តួនាទីរបស់ស្ដ្រីក្នុងសេដ្ឋកិច្ច និងសង្គមខ្មែរ លើកកម្ពស់សុខុមាលភាពស្រ្តី ការអប់រំដល់ស្រ្ដីនៅគ្រប់កម្រិតឲ្យចូលរួមកាន់តែសកម្ម ក្នុងរដ្ឋបាលសាធារណៈ ការពង្រឹងការឈរឈ្មោះ តាមបណ្ដាភូមិ ឃុំ សង្កាត់ទូទាំងប្រទេស ព្រមទាំងការពង្រឹងឱកាសការងារ និងការពារសិទ្ធធ្វើការងារសម្រាប់ស្ដ្រី។
លោកទេសាភិបាលបានបញ្ជាក់បន្ថែមថា ការបង្កើតគណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានកិត្តិយស និងក្រុមប្រឹក្សាជាតិកម្ពុជាដើម្បីស្ត្រី ដែលមានសម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល ជាប្រធានកិត្តិយស និងសម្ដេចតេជោនាយករដ្ឋមន្ត្រី ជាអនុប្រធានកិត្តិយស ក៏ជាចំណែកមួយក្នុងការលើកកម្ពស់ស្ថានភាពស្ត្រី តម្លៃស្ត្រី រួមទាំងសីលធម៌សង្គម និងវប្បធម៌ប្រពៃណីដ៏ល្អផូរផង់របស់កម្ពុជា៕
