(ភ្នំពេញ)៖ សហភាពសហជីព និងសហព័ន្ធសហជីពចំនួន៧ ដែលមានសមាជិករាប់ម៉ឺននាក់ បានរួមគ្នាចេញញត្តិគាំទ្រសាលក្រមសាលាដំបូងរាជធានីភ្នំពេញ ផ្តន្ទាទោស លោក កឹម សុខា ដែលបានប្រព្រឹត្តទង្វើក្បត់ជាតិ។
សហភាពសហជីព និងសហព័ន្ធសហជីពទាំង៧ ដែលបានចេញញត្តិគាំទ្រសាលក្រមផ្តន្ទាទោស លោក កឹម សុខា នេះ រួមមាន៖ សហភាពសហជីពការងារកម្មករកម្ពុជា, សហព័ន្ធសហជីពការងារកម្មករកម្ពុជាដើម្បីសេរីភាព, សហព័ន្ធសហជីពការងារកម្មករកម្ពុជាដើម្បីសន្តិភាព, សហព័ន្ធសហជីពការងារកម្មករកម្ពុជាដើម្បីយុត្តិធម៌, សហព័ន្ធសហជីពអភិវឌ្ឍន៍ការងារយុវជន, សហព័ន្ធសហជីពការងារយុវជនជឿនលឿន និងសហព័ន្ធសហជីពការងារកម្មករកម្ពុជាដើម្បីអភិវឌ្ឍន៍។
ក្នុងញត្តិគាំទ្រនេះសហភាពសហជីព និងសហព័ន្ធសហជីពទាំង៧ បានគូសរំលេចថា ពួកគេបានតាមដានយ៉ាងយកចិត្តទុកដាក់លើសំណុំរឿងលោក កឹម សុខា ហើយបានឃើញថា ជនជាប់ចោទរូបនេះបានប្រើប្រាស់ការលើកកម្ពស់សិទ្ធិមនុស្ស និងលទ្ធិប្រជាធិបតេយ្យធ្វើជាលេស ក្នុងគោលបំណងផ្តួលរំលំរដ្ឋាភិបាលស្របច្បាប់ ដោយបើប្រាស់កម្លាំងមហាជន ធ្វើបដិវត្តន៍ពណ៌ផ្តួលរំលំរដ្ឋាភិបាលស្របច្បាប់។ អំពើឃុបឃិតត្រូវរ៉ូវគ្នាជាមួយបរទេស គឺជាអំពើគ្រោះថ្នាក់ ដ៏ធ្ងន់ធ្ងរបំផុត ប៉ះពាល់ដល់ឯករាជ្យជាតិ សន្តិភាពប្រទេស សន្តិសុខប្រទេស ស្ថិរភាពសង្គម និងភាពសុខសាន្តរបស់ប្រជាជនកម្ពុជាទាំងមូល។
សហភាពសហជីព និងសហព័ន្ធសហជីពទាំង៧ បានលើកឡើងថា សាលក្រមអយ្យការអមសាលាដំបូង រាជធានីភ្នំពេញ នាពេលនេះ ជាការអនុវត្តច្បាប់ដោយម៉ឺងម៉ាត់តាមរយៈការផ្តន្ទទោសចំពោះករណីខាងលើនេះ គឺពិតជាបានចូលរួមចំណែកយ៉ាងសំខាន់ក្នុងការធានាថែរក្សាសុខសន្តិភាព និងភាពសុខសាន្តរបស់ប្រជាជនកម្ពុជា ហើយនេះ ក៏ជាមេរៀនប្រៀនប្រដៅដល់អ្នកនយោបាយផ្សេងទៀតនៅកម្ពុជា ឱ្យមានឧត្តមគតិស្រលាញ់ជាតិស្មោះត្រង់និងជាតិ និងមិនក្បត់ប្រជាជនរបស់ខ្លួន ដោយមិនត្រូវបណ្តែតបណ្តោយខ្លួនឱ្យក្លាយជាភ្នាក់ងារបមើឱ្យបរទេស ដើម្បីតែផលប្រយោជន៍ឬមហិច្ចតាអំណាចផ្ទាល់ខ្លួន។
សហភាពសហជីព និងសហព័ន្ធសហជីពទាំង៧ ប្រកាសគាំទ្រដល់កិច្ចដំណើរការនៃការលើកកម្ពស់សិទ្ធិមនុស្ស និងលទ្ធិប្រជាធិបតេយ្យនៅកម្ពុជា ដែលធានាការពារដោយរដ្ឋធម្មនុញ្ញ និងច្បាប់ជាធរមានទាំងឡាយរបស់កម្ពុជា ហើយប្រឆាំងដាច់ខាតរាល់ការប៉ុនប៉ងបំផ្លិចបំផ្លាញសន្តិភាពប្រទេស សន្តិសុខជាតិ ស្ថិរភាពសង្គម និងភាពសុខសាន្តរបស់ប្រជាជនកម្ពុជា។
សូមបញ្ជាក់ថា បន្ទាប់ពីដំណើរការជំនំុជម្រះក្តីអស់រយៈពេលជាង ៥ឆ្នាំ សំណុំរឿងក្បត់ជាតិរបស់លោក កឹម សុខា ត្រូវបានប្រកាសសាលក្រមកាលព្រឹកថ្ងៃសុក្រ ទី០៣ ខែមីនា ឆ្នាំ២០២៣។
លោក កឹម សុខា ត្រូវបានផ្តន្ទាទោស ដាក់ពន្ធនាគារកំណត់រយៈពេល ២៧ឆ្នាំ ពីបទសន្ទិដ្ឋិភាពជាមួយបរទេស ឬបទឃុបឃិតត្រូវរ៉ូវគ្នាជាមួយបរទេស ប្រព្រឹត្តនៅប្រទេសកម្ពុជា និងទីកន្លែងផ្សេងទៀតកាលពីអំឡុងឆ្នាំ២០១០ ដល់ថ្ងៃទី៣ ខែកញ្ញា ឆ្នាំ២០១៧ ជាបទល្មើសព្រហ្មទណ្ឌ និងត្រូវផ្តន្ទាទោសតាមបញ្ញត្តិមាត្រា ៤៣៩ និងមាត្រា ៤៤៣ នៃក្រមព្រហ្មទណ្ឌ។
លោកក៏ត្រូវបានផ្តន្ទាទោសជនជាប់ចោទនូវទោសបន្ថែម ដោយដកជាស្ថាពរនូវសិទ្ធិបោះឆ្នោត សិទ្ធិឈរឈ្មោះឱ្យគេបោះឆ្នោត និងសិទ្ធិធ្វើសកម្មភាពនយោបាយផ្សេងទៀត តាមបញ្ញត្តិមាត្រា ៤៥០ នៃក្រមព្រហ្មទណ្ឌ។
លោក កឹម សុខា ក៏ត្រូវបានហាមមិនឱ្យចាកចេញពីបរិវេណនៃលំនៅឋាន ផ្ទះលេខ៩៧ ផ្លូវលេខ៣១៣ ភូមិ៧ សង្កាត់បឹងកក់ទី២ខណ្ឌទួលគោក រាជធានីភ្នំពេញ លើកលែងតែមានការអនុញ្ញាត ដោយព្រះរាជអាជ្ញានៃអយ្យការអមសាលាដំបូងរាជធានីភ្នំពេញ។
លោក ក៏ត្រូវបានហាមមិនឱ្យជួបបុគ្គលណាម្នាក់ទាំងសញ្ញាតិខ្មែរ និងបរទេស ដោយផ្ទាល់ ឬដោយ ប្រយោលតាមប្រព័ន្ធបច្ចេកវិទ្យា ក្រៅពីសមាជិកគ្រួសារ លើកលែងតែមានការ អនុញ្ញាតដោយព្រះរាជអាជ្ញានអយ្យការអមសាលាដំបូងរាជធានីភ្នំពេញ ដោយ យោងលើតម្រូវការចាំបាច់តែប៉ុណ្ណោះ។
សាលក្រមផ្តន្ទាទោសលើលោក កឹម សុខា មានការគាំទ្រពីប្រជាពលរដ្ឋខ្មែរគ្រប់ទិសទី និងគ្រប់មជ្ឈដ្ឋាន៕
