(ក្រចេះ)៖ លោកកិត្តិនីតិកោសលបណ្ឌិត អុឹម ឈុនលឹម ប្រធានក្រុមប្រឹក្សាធម្មនុញ្ញ នាថ្ងៃទី៣ ខែមីនា ឆ្នាំ២០២៣ បានដឹកនាំគណៈប្រតិភូក្រុមប្រឹក្សាធម្មនុញ្ញ ចុះសំណេះសំណាល និងនាំថវិកា ព្រមទាំងសម្ភារសិក្សាដល់វិទ្យាល័យសម្តេចតេជោ ហ៊ុនសែន ក្រុងក្រចេះ ខេត្តក្រចេះ និងសាលាបឋមសិក្សាក្រចេះក្រុង សម្រាប់ចៅៗជាសិស្សានុសិស្សក្នុងវិទ្យាល័យប្រេីប្រាស់ និងសិក្សារៀនសូត្រ ដេីម្បីទទួលបានចំណេះជំនាញផ្នែកឌីជីថលទៅថ្ងៃអនាគត។
សម្ភារ និងថវិកាទាំងនេះរួមមាន៖ តុកុំព្យូទ័រ៣០តុ កុំព្យូទ័រ០៣គ្រឿង LCD Projector ០១គ្រឿង ផ្ទាំងសំពត់ស ០១គ្រឿង ម៉ាស៊ីនព្រីនធ័រកូល័រ ០១គ្រឿង Keyboard+Mouse ១០កំប្លេរ Mouse Pad ៣០សន្លឹក កៅអីជ័រ ៥២កៅអី USB Wireless Network ២៥គ្រឿង និងថវិកាចំនួន ២លានរៀល ដល់សាលាបឋមសិក្សាក្រចេះក្រុង។
គូសបញ្ជាក់ផងដែរថា នៅក្នុងពិធីខាងលើ មានការអញ្ជើញចូលរួមពីលោក យ៉ង់ សែម ប្រធានគណៈកម្មការទី១ នៃព្រឹទ្ធសភា, ប្រធានក្រុមប្រឹក្សាខេត្ត, លោកអភិបាលខេត្ត លោកប្រធានមន្ទីរអប់រំ យុវជន និងកីឡាខេត្ត នាយកវិទ្យាល័យ នាយកបឋមសិក្សា លោកគ្រូ អ្នកគ្រូ និងសិស្សានុសិស្សផងដែរ៕
