(ភ្នំពេញ)៖ លោក សុខ បូរ៉ា ប្រធាននាយកដ្ឋានតាវកាលិក នៃបេឡាជាតិសន្តិសុខសង្គម បានបង្ហាញថា សម្រាប់កម្មករ បុគ្គលិកទាំងអស់ ដែល​បានបម្រើការងារ​ ក្នុងប្រទេសកម្ពុជា ត្រូវបានការការពារហានិភ័យការងារ ក្នុងនោះកត្តាសុខភាពក៏ត្រូវបានការ​ការពារ​ ពីបេឡាជាតិសន្ដិសុខសង្គម​(ប.ស.ស)ផងដែរ។

ការលើកឡើងរបស់លោក សុខ បូរ៉ា ធ្វើឡើងក្នុងសិក្ខាសាលាស្ដីពី របបសន្ដិសុខសង្គមជូនដល់សមជិកអ្នកសារព័ត៌មាន ដោយរៀបចំឡើងដោយអង្គការអុកស្វាម និងក្លឹបអ្នកការសែតកម្ពុជា ក្រោមគម្រោងស្ដីពី «គាំពារសង្គមប្រកបដោយបរិយាបន្ន ដែលឆ្លើយតបទៅនឹងតម្រូវការរបស់កម្មករនិយោជិត ក្នុងវិស័យកាត់ដេរ» នៅថ្ងៃទី៣ ខែមីនា ឆ្នាំ២០២៣។

លោកបានថ្លែងថា នេះជាលើកទី១ដែលបេឡាជាតិសន្ដិសុខសង្គម​ បានផ្សព្វផ្សាយពី​ អត្ថប្រយោជន៍លើសន្ដិសុខសង្គម ផ្នែកការងារ ការថែទាំងសុខភាព ពិសេសគឺប្រាក់សោធនជូនដល់សមាជិកសមាជិការ។

លោក សុខ បូរ៉ា បានថ្លែងថា «សម្រាប់ថ្ងៃនេះបេឡាជាតិសន្ដិសុខសង្គម បានផ្ដោតសំខាន់លើការ ការពារគ្រោះថ្នាក់​នៃការងារ ដែលជួយដល់បុគ្គលិកកម្មករទាំងអស់ ដែលបម្រើការងារនៅកម្ពុជា បានជួបបញ្ហាអាចទទួលបានអត្ថប្រយោជន៍ពី ប.ស.ស។ កត្តាសុខភាពបូករួមទាំងជំងឺមហារីក ត្រូវបានការការពារដោយឥតគិតថ្លៃពី ប.ស.ស»។

លោកបានបញ្ជាក់ថា ក្នុងនោះផ្នែកប្រាក់សោធន ដែលត្រូវបានរាជរដ្ឋាភិបាលបាន​ ដាក់ឲ្យអនុវត្តន៍បានចំនួន៤ខែហើយ ដោយចាប់ផ្ដើមពីចុងឆ្នាំ២០២២ ដែលជាប្រវត្តិសាស្រ្ដ​របស់កម្មករ និយោគជិក ក្នុងវិស័យឯកជន គឺមានរបរចូលនិវត្តន៍ ដែលរបបសន្ដិសុខសង្គមបានជួយបងប្អូនកម្មករ និយោជិត ដែលឈានដល់វ័យចំណាស់។ ក្រៅពីការបើកប្រាក់សោធននេះហើយ កម្មករ និយោជិតក៏ទទួល​បានសេវាថែទាំសុខភាពក្នុងមន្ទីរពេទ្យ ដូច្នេះបងប្អូនមិនចាំបាច់បារម្ភថា នៅពេលដែលចាស់ទៅត្រូវសម្រាកព្យាបាល ពុំចាំបាច់ចំណាយថវិកាពីអ្នកផ្ទះទៀតឡើយ ដោយគ្រប់ការចំណាយទាំងអស់ របបសន្ដិសុខសង្គមជាអ្នករ៉ាប់រង ដូច្នេះបងប្អូនទទួលបានទាំងប្រាក់សោធន និងការរ៉ាប់រងពេលឈឺថ្កាត់ ព្រោះ​ ប.ស.ស អ្នករ៉ាបរងជំនួស។

លោកស្រី កេក ណារ៉ាទេវី អ្នកសម្របសម្រួលផ្នែកទំនាក់ទំនងនៃអង្គការ Oxfam បានថ្លែងថា អង្គការ Oxfam បានចូលរួមចំណែកយ៉ាងសំខាន់​ ជាមួយស្ថាប័ន្ធពាក់ព័ន្ធ ពិសេស​រាជរដ្ឋាភិបាល និងអង្គការសង្គមស៊ីវិល ក្នុងការលើកកម្ពស់ ការអនុវត្តន៍គោលនយោបាយគាំពារសង្គម។

លោកស្រីបន្ដថា ថ្ងៃនេះអង្គការ Oxfam បានចូលរួមពង្រឹងការផ្សព្វផ្សាយពីកិច្ចគាំពារសង្គម ដល់ក្រុមគោលដៅ ដែល​ពុំទាន់ទទួលបានកិច្ចគាំពារសង្គម រួមទាំងជនជាតិភាគតិចផងដែរ ក្នុងនោះអង្គការ Oxfam បានធ្វើការជាមួយ​សង្គមស៊ីវិល និងរាជដ្ឋាភិបាលផ្សព្វផ្សាយលើកិច្ចគាំពារសង្គម ជួយ​សម្របសម្រួលធ្វើយ៉ាងណាឲ្យពលរដ្ឋ​ មានស្ថានភាពក្រីក្រ ទទួលបានព័ត៌មាននានា ចំពោះ ប.ស.ស នេះគឺបានផ្សព្វផ្សាយយ៉ាងខ្លាំង​ ដល់កម្មករ​ក្នុងវិស័យកាត់ដេរជាដើម។

សូមបញ្ជាក់ថា ដើម្បីជួយជ្រោមជ្រែងរដ្ឋាភិបាលកម្ពុជា ក្នុងការដោះស្រាយបញ្ហាប្រឈម អង្គការអុកស្វាមនៅកម្ពុជា ក្រោមការឧបត្ថម្ភផ្នែកហិរញ្ញវត្ថុពីមូលនិធិ Laudes Foundation បានសហការជាមួយអង្គការក្រៅរដ្ឋាភិបាល និងសហជីពចំនួន៤ ដើម្បីអនុវត្តគម្រោងមួយដែលមានឈ្មោះថា «គាំពារសង្គមប្រកបដោយដោយបរិយាបន្ន ដែលឆ្លើយតបទៅនឹងតម្រូវការរបស់កម្មករនិយោជិត​ ក្នុងវិស័យកាត់ដេរ ឬហៅកាត់ថា INSPIRE»។

គម្រោងនេះនឹងត្រូវអនុវត្តរួមគ្នាពីថ្ងៃទី២០ ខែធ្នូ ឆ្នាំ២០២១ រហូតដល់ថ្ងៃទី៣១ ខែមីនា ឆ្នាំ២០២៥ គំនិតផ្តួចផ្តើមនេះនឹងអនុញ្ញាតឲ្យកម្មករនិយោជិត​ ក្នុងវិស័យកាត់ដេរអាចទទួលបានសេវាគាំពារសង្គម និងព័ត៌មាននានាស្តីពី កិច្ចគាំពារសង្គមកាន់តែប្រសើរឡើង។

សូមជម្រាបថា គោលបំណងរបស់សិក្ខាសាលានេះរៀបចំឡើងដើម្បី៖
១៖ ពង្រឹងសមត្ថភាពជូនអ្នកសារព័ត៌មាន តាមរយ:បទបង្ហាញពី ប.ស.ស ដើម្បីលើកកម្ពស់ការផ្សព្វផ្សាយពី របបសន្តិសុខសង្គម តាមប្រព័ន្ធផ្សព្វផ្សាយឲ្យកាន់តែទូលំទូលាយ ដល់សាធារណជន ជាពិសេសកម្មករនិយោជិត ក្នុងវិស័យកាត់ដេរ។
២៖ ចែករំលែក និងពង្រឹងការយល់ដឹងបន្ថែមទៀត ដល់សមាជិកសាព័ត៌មានស្តីពីគោលនយោបាយគាំពារសង្គម និងបញ្ហាប្រឈមរបស់កម្មករនិយោជិត (ភាគច្រើនជាស្ត្រី) ក្នុងការទទួលបាន និងការប្រើប្រាស់ប័ណ្ណសមាជិក ប.ស.ស។
៣៖ ចែករំលែកនូវចំណេះដឹង និងលទ្ធផលអំពីការអនុវត្តគម្រោង INSPIRE ជូនដល់អ្នកចូលរួម។
៤៖ បង្កើនប្រសិទ្ធភាពនៃការងារទំនាក់ទំនង និងផ្សព្វផ្សាយគាំពារសង្គមកម្ពុជា, និងបង្កើនកិច្ចសហការ
ពាក់ព័ន្ធនានាលើការងារទំនាក់ទំនង និងផ្សព្វផ្សាយជាមួយស្ថាប័នផ្សព្វផ្សាយព័ត៌មាន៕