(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅល្ងាចថ្ងៃទី៣ ខែមីនា ឆ្នាំ២០២៣នេះ នឹងអញ្ជើញជាអធិបតីក្នុងពិធីបិទសន្និបាតបូកសរុបលទ្ធ ផលការងារឆ្នាំ២០២២ និងទិសដៅការងារ ឆ្នាំ២០២៣ របស់ក្រសួងការបរទេស និងសហប្រតិបត្តិការអន្តរជាតិ (កបទ.សអ.) នៅទីស្តីការក្រសួងការបរទេស ក្រោយសន្និបាតបានដំណើរការអស់រយៈពេល៣ថ្ងៃ ចាប់ពីថ្ងៃទី១ ខែមីនា ឆ្នាំ២០២៣។
យោងតាមរបាយការណ៍របស់លោក អ៊ុច បូររិទ្ធ រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងការបរទេស បានរាយការណ៍ពីលទ្ធផល សរុបការងារឆ្នាំ២០២២ ដែលផ្តោតលើការដ្ឋានធំៗទាំង៥ របស់ក្រសួងការបរទេស ហើយដែលបានទទួលការគាំទ្រនិងលើកទឹកចិត្តពីសម្តេចតេជោនាយករដ្ឋមន្ត្រី៖
ការងារទី១៖ ការការពារផលប្រយោជន៍ជាតិ ជាពិសេសការការពារឯករាជ្យ អធិបតយ្យ បូរណភាពទឹកដី
១.១៖ ការការពារឯករាជ្យ អធិបតេយ្យ កិត្តិយស និងសេចក្តីថ្លៃថ្នូរជាតិ
កម្ពុជាត្រូវបានបន្តយាយីដោយការចោទប្រកាន់ក្នុងចេតនានយោបាយ គ្មានមូលដ្ឋាន និងខ្វះភាពសត្យានុម័ត លើបញ្ហាសិទ្ធិមនុស្សនិងលទ្ធិប្រជាធិបតេយ្យ បញ្ហាមូលដ្ឋាន យោធាបរទេសនៅតំបន់ឆ្នេរ និងបញ្ហាផ្សេងៗទៀតដែលប៉ះពាល់ដល់អធិបតេយ្យ ឯករាជ្យ អព្យាក្រឹតភាព សន្តិភាព ស្ថិរភាព កិត្តិយស និងសេចក្តីថ្លៃថ្នូររបស់ជាតិ។ តបតនឹងការចោទប្រកាន់ទាំងនេះ ថ្នាក់ដឹកនាំជាច្រើន ជាពិសេស សម្តេចតេជោ នាយករដ្ឋមន្រ្តី លោកឧបនាយករដ្ឋមន្រ្តី កបទ.សអ. និងស្ថានបេសកកម្ម អចិន្ត្រៃយ៍កម្ពុជាប្រចាំអង្គការសហប្រជាជាតិ (អ.ស.ប.) និងអង្គការអន្តរជាតិនានានៅទីក្រុងហ្សឺណែវបាន៖
* លើកជាប្រធានបទពិភាក្សា បកស្រាយពន្យល់ ក្នុងឱកាសជំនួបជាមួយមិត្តបរទេសជាច្រើនលើក
* ចេញសេចក្តីប្រកាសព័ត៌មាន សេចក្តីថ្លែងការណ៍អ្នកនាំពាក្យ ប្រតិកម្មឆ្លើយតប ចំនួន ៥១លើក
* ថ្លែងបទអន្តរាគមន៍សរុប ចំនួន ៧១ លើក ក្នុងវេទិកាក្រុមប្រឹក្សាសិទ្ធិមនុស្ស និងធ្វើចលនាស្វែងរកការគាំទ្រជាមួយមិត្តបរទេស ចំនួន ៦០ប្រទេស ក្នុងគោលបំណងបង្កើនសម្លេងវិជ្ជមានរបស់កម្ពុជាលើឆាកអន្តរាជាតិ។ ជាលទ្ធផលនៅក្នុង «កិច្ចសន្ទនាអន្តរកម្មជាមួយអ្នករាយការណ៍ពិសេស ស្តីពីស្ថានភាពសិទ្ធិមនុស្សនៅកម្ពុជា» កាលពីខែតុលា ឆ្នាំ២០២២កន្លងទៅ ប្រទេសចំនួន ៣០ ក្នុងចំណោមប្រទេសចំនួន ៣៩ បានថ្លែងគាំទ្រចំពោះកិច្ចខិតខំប្រឹងប្រែង វឌ្ឍនភាព និងសមិទ្ធផលកម្ពុជា ក្នុងការលើកកម្ពស់ និងការពារសិទ្ធិមនុស្សលើទិដ្ឋភាពជាច្រើន។
១.២៖ ការការពារបូរណភាពទឹកដីកម្ពុជា
នៅក្នុងបុព្វហេតុការពារបូរណភាពទឹកដី និងដោះស្រាយបញ្ហាព្រំដែន ជាមួយប្រទេសជិតខាងឱ្យក្លាយទៅជាព្រំដែនសន្តិភាព សហប្រតិបត្តិការ និងការអភិវឌ្ឍ កបទ.សអ. បានសហការជាមួយស្ថាប័នពាក់ព័ន្ធ៖
* ធ្វើការតវ៉ាលើសកម្មភាពបំពាន នៅចំណុចព្រំដែន ឬតំបន់មិនទាន់បានឯកភាពគ្នា ជាមួយប្រទេសជិតខាង ចំនួន ៤លើក
* សម្របសម្រួលកិច្ចចរចាលើសន្ធិសញ្ញាកំណត់ព្រំដែន កិច្ចព្រមព្រៀងស្តីពីការគ្រប់គ្រងច្រកទា្វរព្រំដែនគោក និងរៀបចំដំឡើងកម្រិតច្រកទ្វារអន្តរជាតិជាដើម។ ក្នុងនោះ ជាមួយឡាវ បានសម្រេចនូវសន្ធិសញ្ញាព្រំដែន ៨៦ភាគរយ ដែលសម្តេចតេជោនាយករដ្ឋមន្ត្រី បានចុះហត្ថលេខា នៅថ្ងៃទី១៣ ខែកុម្ភៈ។ ក្រៅពីនេះ កបទ.សអ. បាន និងកំពុងខិតខំសម្របសម្រួលការចរចាព្រំដែនជាមួយភាគីថៃ និងវៀតណាមបន្តទៀត។
១.៣៖ ការការពារផលប្រយោជន៍ពលរដ្ឋខ្មែរនៅបរទេស
កបទ.សអ. បានផ្តល់ការគាំទ្រ គាំពារ ជួយសង្គ្រោះ និងសម្របសម្រួលមាតុភូមិនិវត្តន៍ដល់ពលរដ្ឋខ្មែរដែលរងគ្រោះដោយការរំលោភសិទ្ធិសេរីភាពនៅបរទេស និង អំពើជួញដូរមនុស្ស ចំនួន ៧ ៩៥៣ នាក់ ពីប្រទេសថៃ ឡាវ វៀតណាម ម៉ាឡេស៉ី ចិន ឥណ្ឌូនេស៉ី មីយ៉ាន់ម៉ា សិង្ហបុរី។ លើសពីនេះ ស្ថានតំណាងកម្ពុជាប្រចាំនៅបរទេស បានយកចិត្តទុកដាក់ខ្ពស់ក្នុងការប្រាស្រ័យទាក់ទងជាមួយពលរដ្ឋកម្ពុជារស់នៅបរទេសមានជាអាទិ៍ អាមេរិក បារាំង អឺរ៉ុប និងអូស្ត្រាលី ក៏ដូចជាសម្របសម្រួលដល់សេចក្តីត្រូវការរបស់ប្រជាពលរដ្ឋ សិស្ស/និស្សិត ពលករ ដែលកំពុងរស់នៅ ធ្វើការ និងសិក្សានៅបរទេស រួមមានការផ្តល់សេវារដ្ឋបាល សេវាកុងស៊ុល និងការឧបត្ថម្ភគាំពារផ្សេងៗ។
ការងារទី២៖ ការអនុវត្តគោលនយោបាយការបរទេសឯករាជ្យផ្អែកលើច្បាប់អន្តរជាតិប្រកបដោយភាពបត់បែន វាងវៃ តបតទៅនឹងសម្ពាធភូមិសាស្ត្រនយោបាយ ឆ្នាំ ២០២២ ជាឆ្នាំដែលកម្ពុជាបានទទួលជោគជ័យយ៉ាងត្រចះត្រចង់ក្នុងវិស័យការទូត ទាំងក្នុងក្របខ័ណ្ឌទ្វេភាគី និងពហុភាគី៖
២.១៖ ទំនាក់ទំនងទ្វេភាគី
* កម្ពុជាបានបន្តពង្រឹងទំនាក់ទំនង និងកិច្ចសហប្រតិបត្តិការទ្វេភាគី តាមរយៈសកម្មភាពរបស់ស្ថានទូត/ស្ថានតំណាងអចិន្ត្រៃយ៍កម្ពុជានៅបរទេសចំនួន ៣១ស្ថានអគ្គកុងស៊ុលកម្ពុជានៅបរទេស ចំនួន១២ កុងស៊ុលកិត្តិយសកម្ពុជានៅបរទេស ចំនួន២៦ និងមន្ត្រីការទូតដែលកំពុងបំពេញបេសកកម្មនៅបរទេសសរុបចំនួន ២០២នាក់។
* នៅក្នុងទិសដៅរួមចំណែកជួយស្វែងរកដំណោះស្រាយសន្តិភាព សន្តិសុខ និងស្ថិរភាពក្នុងតំបន់ ក៏ដូចជាដើម្បីពង្រឹងបន្ថែមចំណងមិត្តភាព និងកិច្ចសហប្រតិបត្តិការល្អប្រសើរទ្វេភាគី សម្តេចតេជោនាយករដ្ឋមន្ត្រី បានបំពេញទស្សនកិច្ចការងារ និងទស្សនកិច្ចផ្លូវការ នៅប្រទេសមីយ៉ាន់ម៉ា បារាំង គុយបា ជប៉ុន សាធារណរដ្ឋកូរ៉េ និង វៀតណាម។ ឧបនាយករដ្ឋមន្ត្រី ប្រាក់ សុខុន បានបំពេញទស្សនកិច្ចផ្លូវការ និងការងារ នៅប្រទេសបារាំង អាល្លឺម៉ង់ និងតួកគី និងបានអញ្ជើញចូលរួមកិច្ចប្រជុំសំខាន់ៗផ្សេងទៀត ដូចជាជាមួយគណៈកម្មការអឺរ៉ុប នៅទីក្រុងព្រុចសែល កិច្ចប្រជុំពិគ្រោះយោបល់បើកចំហស្តីពីបញ្ហាមីយ៉ាន់ម៉ា នៅទីក្រុងបាងកក កិច្ចប្រជុំរដ្ឋមន្ត្រីការបរទេសនៃកិច្ចសហប្រតិបត្តិការមេគង្គ-ឡានឆាង (MLC) លើកទី៧ នៅទីក្រុងបាហ្គាន ប្រទេសមីយ៉ាន់ម៉ា ចូលរួមវេទិកាថ្នាក់រដ្ឋមន្ត្រីស្តីពីកិច្ចសហប្រតិបត្តិការក្នុងតំបន់ឥណ្ឌូប៉ាស៉ីហ្វិក នៅទីក្រុងប៉ារីស កិច្ចប្រជុំពិសេសថ្នាក់រដ្ឋមន្ត្រីអាស៊ាន-ឥណ្ឌា នៅទីក្រុងញូវដេលី ធ្វើជាសហប្រធានកិច្ចប្រជុំ ពិសេសរដ្ឋមន្ត្រីការបរទេសអាស៊ានអំពីបញ្ហាមីយ៉ាន់ម៉ា នៅទីក្រុងហ្សាការតា ប្រទេសឥណ្ឌូណេស៉ី។ល។ ទន្ទឹមនេះ កម្ពុជាក៏បានស្វាគមន៍ទស្សនកិច្ចផ្លូវរដ្ឋ និងផ្លូវការរបស់ថ្នាក់ដឹកនាំបរទេស ចំនួន១១ មកពីប្រទេសចិន ជប៉ុន វៀតណាម ម៉ាឡេស៉ី សិង្ហបុរី ទីម័រខាងកើត ព្រុយណេ ឥណ្ឌូណេស៉ី អារ៉ាប៊ីសាអូឌីត បង់ក្លាដែស និងគុយបា។
* ទំនាក់ទំនងកម្ពុជានិងប្រទេសជិតខាងបានបន្តល្អប្រសើរ ជាមួយនឹងការផ្លាស់ប្តូរទស្សនកិច្ច និងជំនួបសន្ទនារវាងថ្នាក់ដឹកនាំជាញឹកញាប់។ ទំនាក់ទំនង និងកិច្ចសហប្រតិបត្តិការទ្វេភាគី ជាមួយបណ្តាប្រទេសក្នុងតំបន់អាស៉ី-ប៉ាស៉ីហ្វិកជាទូទៅ មានការរីកចម្រើនគួរឱ្យកត់សម្គាល់ តាមរយៈការផ្លាស់ប្តូរទស្សនកិច្ច និងជំនួបទ្វេភាគីជាច្រើនលើកក្នុងកម្រិតថ្នាក់ដឹកនាំជាន់ខ្ពស់ ជាពិសេសសន្ទុះកំណើនការផ្លាស់ប្តូរពាណិជ្ជកម្ម ទេសចរណ៍ និងវិនិយោគ បន្ទាប់ពីវិបត្តិនៃជំងឺរាតត្បាតសកល។ ក្នុងនោះទំនាក់ទំនងទ្វេភាគីគួរឱ្យកត់សម្គាល់៖ (១) ជាមួយចិន នៅបន្តរក្សាបាននូវ «សហប្រតិបត្តិការក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ ពង្រឹងមិត្តភាពដែកថែប និងកសាងសហគមន៍វាសនារួមជាមួយគ្នា»ជាមួយនឹងទំនុកចិត្តនយោបាយខ្ពស់ និងឈរលើកិច្ចសហប្រតិបត្តិការជិតរឹងមាំលើគ្រប់វិស័យ (២) ជាមួយជប៉ុន បានបន្តក្នុងភាពជិតស្និទ្ធ ដោយក្នុងឆ្នាំ២០២២ នាយករដ្ឋមន្ត្រីទាំងពីរបានជួបសន្ទនាគ្នាដោយផ្ទាល់រហូតដល់ទៅ ៤លើក។ ក្នុងជំនួបចុងក្រោយរវាង សម្តេចតេជោនាយករដ្ឋមន្ត្រី និងនាយករដ្ឋមន្ត្រី Kishida Fumio ភាគីទាំងពីរបានសម្រេចដំឡើងទំនាក់ទំនង និងកិច្ចសហប្រតិបត្តិការទ្វេភាគីដល់កម្រិត «ភាពជាដៃគូយុទ្ធសាស្ត្រគ្រប់ជ្រុងជ្រោយ» នៅឆ្នាំ២០២៣នេះ ជាឆ្នាំដែលប្រទេសទាំងពីរអបអរសាទរខួប ៧០ឆ្នាំ នៃការបង្កើតទំនាក់ទំនងការទូតជាមួយគ្នា (៣) ជាមួយវៀតណាម និងឡាវ ទំនាក់ទំនងត្រូវបានបន្តពង្រឹង និងពង្រីកថែមទៀតជាលំដាប់ ពិសេសតាមរយៈជំនួបអាហារពេលព្រឹកការងាររវាងនាយករដ្ឋមន្ត្រីទាំងបី កម្ពុជា វៀតណាម និងឡាវ នៅទីក្រុងព្រុចសែល កាលពីថ្ងៃទី១៤ ខែធ្នូ ឆ្នាំ២០២២។
* ការប្រកាន់ជំហរយ៉ាងត្រឹមត្រូវ និងម៉ឺងម៉ាត់របស់កម្ពុជា គាំទ្រគោលបំណង និងគោលការណ៍នៃធម្មនុញ្ញអ.ស.ប. ក្នុងសង្គ្រាមនៅអ៊ុយក្រែន បានកែសម្រួលយ៉ាងខ្លាំងនូវទំនាក់ទំនងរវាងកម្ពុជាជាមួយបណ្តាប្រទេសបស្ចិមលោក រួមទាំងសហរដ្ឋអាមេរិក (ស.រ.អា.) ផងដែរ ដោយបង្ហាញឱ្យឃើញច្បាស់នូវការប្រកាន់នយោបាយការបរទេសឯករាជ្យផ្អែកលើច្បាប់អន្តរជាតិ។ ការកែសម្រួលនេះ បានស្តែងឡើងតាមរយៈការអញ្ជើញមកចូលរួម របស់លោកប្រធានាធិបតីអាមេរិក Joe Biden និង លោករដ្ឋមន្ត្រីការបរទេស Antony Bliken ក្នុងកិច្ចប្រជុំកំពូល និងកិច្ចប្រជុំរដ្ឋមន្ត្រីការបរទេសពាក់ព័ន្ធនឹងអាស៊ាន និងគណៈប្រតិភូចម្រុះព្រឹទ្ធសភានិងសភាអាមរិក និងឥស្សរជននានា ដែលបានមកបំពេញទស្សនកិច្ចជាបន្តបន្ទាប់នៅកម្ពុជា។ ជាមួយគ្នានេះ សម្តេចតេជោនាយករដ្ឋមន្ត្រី ក៏បានដឹកនាំគណៈប្រតិភូធ្វើទស្សនកិច្ច និងពិសាអាហារពេលល្ងាច ជាលើកដំបូង នៅស្ថានទូតអាមេរិកប្រចាំនៅកម្ពុជា កាលពីចុងឆ្នាំ២០២២ កន្លងទៅ ចាប់តាំងពីប្រទេសទាំងពីរភ្ជាប់ទំនាក់ទំនងការទូតកាលពីឆ្នាំ១៩៥០មក។
ដោយឡែកសម្តេចតេជោនាយករដ្ឋមន្ត្រី ត្រូវបានលោកប្រធានាធិបតីបារាំង Emmanuel Macron អញ្ជើញបំពេញទស្សនកិច្ចការងារ ដោយរៀបចំបាយការងារនៅវិមាន Élysée កាលពីថ្ងៃទី១៣ ខែធ្នូ។ ក្នុងឱកាសនោះ លោកប្រធានាធិបតី បានផ្តល់ការទទួលស្វាគមន៍យ៉ាងកក់ក្តៅ ហើយកិច្ចពិភាក្សារវាងថ្នាក់ដឹកនាំកំពូលទាំងពីរបានប្រព្រឹត្តទៅប្រកបដោយភាពជិតស្និទ្ធ ស្មោះត្រង់ និងការទុកចិត្តគ្នាទៅវិញទៅមក។ ក្រៅពីនេះ ក្នុងឱកាសអញ្ជើញជាសហប្រធានកិច្ចប្រជុំកំពូលរំលឹកខួបអនុស្សាវរីយ៍អាស៊ាន-សហភាពអឺរ៉ុប នៅទីក្រុងព្រុចសែល កាលពីថ្ងៃទី១៤ ខែធ្នូ កន្លងទៅ សម្តេចតេជោនាយករដ្ឋមន្ត្រី ក៏បានជួបទ្វេភាគីជាមួយឥស្សរជនបរទេសមួយចំនួនទៀតរួមមាន អធិការបតីអាល្លឺម៉ង់ Olaf Scholz នាយករដ្ឋមន្ត្រីហូឡង់ Mark Rutte និងនាយករដ្ឋមន្ត្រីហ្វាំងឡង់ Sanna Marin។ សម្តេចតេជោនាយករដ្ឋមន្ត្រី ក៏បានជួបជាមួយធានក្រុមប្រឹក្សាអឺរ៉ុប Charles Michel ចំនួន ២ដងនៅជប៉ុន និងនៅកម្ពុជា។
* ជាមួយគ្នានេះ កបទ.សអ. ក៏បានខិតខំប្រឹងប្រែងក្នុងការពង្រឹងពង្រីកចំណងមិត្តភាព និងកិច្ចសហប្រតិបត្តិការល្អប្រសើរ ជាមួយប្រទេសជាមិត្ត តាមរយៈយន្តការកិច្ច ពិគ្រោះយោបល់ទ្វេភាគី ទាំង១១ និងកំពុងបន្តរិះរកមធ្យោបាយ និងលទ្ធភាពធ្វើពិពិធកម្មដៃគូទំនាក់ទំនងអន្តរជាតិ តាមរយៈយន្តការនេះជាមួយបណ្តាប្រទេសផ្សេងទៀតនៅតំបន់អាស៉ី អូសេអានី អឺរ៉ុបកណ្តាល និងខាងកើត អាមេរិកឡាទីន និងអាមេរិកកណ្តាល។
២.២៖ ទំនាក់ទំនងពហុភាគី
* ក្នុងក្របខ័ណ្ឌអាស៊ាន កម្ពុជាទទួលជោគជ័យយ៉ាងត្រចះត្រចង់ និងទទួលបានការកោតសរសើរយ៉ាងខ្លាំងពីសំណាក់សហគមន៍អន្តរជាតិ ចំពោះភាពប៉ិនប្រសប់ បត់បែន និងវាងវៃ នៅក្នុងការដឹកនាំកិច្ចប្រជុំពេញមួយឆ្នាំក្នុងតួនាទីជាប្រធានប្តូវេនអាស៊ាន រួមទាំងតួនាទីដ៏សកម្មរបស់ឧបនាយករដ្ឋមន្រ្តី ប្រាក់ សុខុន ក្នុងតួនាទីជាប្រេសិតពិសេសរបស់ប្រធានអាស៊ានក្នុងដំណើរការស្វែងរកដំណោះស្រាយដើម្បីជួយមីយ៉ាន់ម៉ា ត្រឡប់ទៅរកប្រក្រតីភាពឡើងវិញ។ ជាក់ស្តែង កម្ពុជាទទួលបានលទ្ធផលគួរជាទីមោទនៈ នៅក្នុងការរៀបចំកិច្ចប្រជុំរដ្ឋមន្រ្តីការបរទេសអាស៊ាន និងកិច្ចប្រជុំរដ្ឋមន្រ្តីពាក់ព័ន្ធ ដោយបានចេញទាន់ពេលវេលានូវសេចក្តីប្រកាសរួម របស់រដ្ឋមន្ត្រីការបរទេសអាស៊ាន (Joint Communiqué) ដែលជាឯកសារយោងដ៏សំខាន់បំផុតមួយសម្រាប់ព្រាងឯកសារសមិទ្ធផលដទៃផ្សេងទៀត។ សរុបមក កិច្ចប្រជុំកំពូលអាស៊ានលើកទី៤០ និង៤១ សម្រេចលទ្ធផលលើសពីការរំពឹងមួយចំនួន រួមមាន៖ (១) ការសម្រេចបានឯកសារ១០១ ក្នុងចំណោមឯកសារសមិទ្ធផលដទៃទៀត ដែលត្រូវបានអនុម័ត និងកត់សម្គាល់ដោយថ្នាក់ដឹកនាំកំពូលអាស៊ាន (២) ការបន្ថែមសមាជិកថ្មីក្នុងសន្ធិសញ្ញាមិត្តភាពនិងសហប្រតិបត្តិការនៅអាស៉ីអាគ្នេយ៍ (TAC) ចំនួន៧ ក្នុងមួយឆ្នាំ ដែលនេះ ច្រើនជាងឆ្នាំណាៗទាំងអស់ (៣) ការពង្រីកដៃគូយុទ្ធសាស្ត្រគ្រប់ជ្រុងជ្រោយជាមួយប្រទេស ចំនួន២ និង (៤) ការសម្រេចទទួលជាគោលការណ៍ឱ្យទីម័រខាងកើតចូលជាសមាជិកអាស៊ានទី១១។ បន្ថែមលើកិច្ចប្រជុំអាស៊ានដែលមានជាទៀងទាត់ កម្ពុជាក៏បានធ្វើជាសហប្រធាន នៃកិច្ចប្រជុំកំពូលពិសេសអាស៊ាន-សហរដ្ឋអាមេរិក នៅទីក្រុងវ៉ាស៉ីនតោន និងកិច្ចប្រជុំរំលឹកខួបអនុស្សាវរីយ៍អាស៊ាន-សហភាពអឺរ៉ុប នៅទីក្រុងព្រុចសែល ប្រកបដោយភាពជោគជ័យគាប់ប្រសើរ។
* ក្រៅពីនេះ កម្ពុជាក៏បានបន្តចូលរួមយ៉ាងសកម្មក្នុងយន្តការពហុភាគីដទៃទៀត ដើម្បីចូលរួមជាផ្នែកមួយក្នុងការកសាងសហគមន៍ នៅក្នុងតំបន់ និងសកលលោក ប្រកបដោយសន្តិភាព សន្តិសុខ និងវិបុលភាព ដូចជាយន្តការកិច្ចសហប្រតិបត្តិការមេគង្គ, Francophonie, NAM, CICA, SCO, ADM, BOAO, CLV, CLMV ជាដើម។
ការងារទី៣៖ ការចូលរួមក្នុងបុព្វហេតុសន្តិភាព ស្ថិរភាព និងដំណោះស្រាយបញ្ហាប្រឈមនានានៅក្នុងពិភពលោក
* ពីឆ្នាំ២០០៦ រហូតដល់ពេលបច្ចុប្បន្ន កម្ពុជាបានបញ្ជូនកងកម្លាំងបំពេញបេសកកម្មរក្សាសន្តិភាព ក្រោមឆត្រអង្គការសហប្រជាជាតិ (អ.ស.ប.) សរុបចំនួន ៨ ៩៥១នាក់ (ស្រ្តី៖ ៦៩២នាក់) ទៅកាន់ប្រទេសចំនួន ៩ រួមមាន៖ ស៊ូដង់ ស៊ូដង់ខាងត្បូង ឆាដ សាធារណរដ្ឋអាហ្វ្រិកកណ្តាល លីបង់ ស៉ីប ស៉ីរីម៉ាលី និងយេម៉ែន។ តាមការវាយតម្លៃរបស់អ.ស.ប. កម្ពុជាជាប់ចំណាត់ថ្នាក់លេខ ២៨ ក្នុងចំណាមប្រទេសចំនួន ១២២ និងចំណាត់ថ្នាក់លេខ ៣ ក្នុងតំបន់អាស៊ាន (បន្ទាប់ពីឥណ្ឌូណេស៉ី និងម៉ាឡេស៉ី)ក្នុងការចូលរួមបំពេញបេសកកម្មដ៍ឧត្តុង្គឧត្តមនេះ។ ដោយឡែក ក្នុងការបញ្ជូនកងកម្លាំងជានារី កម្ពុជាទទួលបានចំណាត់ថ្នាក់លេខ ១៣ ទូទាំងពិភពលោក និងចំណាត់ថ្នាក់លេខ ២ ក្នុងចំណោមប្រទេសអាស៊ានបន្ទាប់ពីឥណ្ឌូណេស៉ី។
* ស្ថិតក្នុងបរិការណ៍ដ៏គ្រោះថ្នាក់បែបនេះ កម្ពុជានឹងពង្រឹងការអនុវត្តនយោបាយការបរទេសឯករាជ្យ ផ្អែកលើច្បាប់អន្តរជាតិ ដោយបន្តការងារការទូតបុរេសកម្ម វាងវៃ និងបត់បែនក្នុងការពង្រឹង
ទំនាក់ទំនងជាមួយមិត្តចាស់ បង្កើនទំនាក់ទំនងជាមួយមិត្តថ្មី ស្របតាមការវិវឌ្ឍសភាពការណ៍ភូមិសាស្ត្រនយោបាយតំបន់ និងពិភពលោក។ យើងនឹងបន្តប្តេជ្ញាការពារនូវផលប្រយោជន៍ស្នូលរបស់ជាតិ ពោលគឺការពារ អធិបតេយ្យ បូរណភាពទឹកដី និងឯករាជ្យភាពកម្ពុជា ការពារសន្តិភាព ស្ថិរភាពក្នុងប្រទេសដើម្បីជំរុញការអភិវឌ្ឍសេដ្ឋកិច្ច-សង្គម តាមផែនការយុទ្ធសាស្ត្រជាតិ។ កបទ.សអ.នឹងបន្តខិតខំចូលរួមក្នុងការកៀរគរទុនវិនិយោគបរទេស ភ្ញៀវទេសចរណ៍ និងផ្សព្វផ្សាយពង្រីកទីផ្សារថ្មីដើម្បីជំរុញផលិតកម្មក្នុងស្រុក។ បន្ថែមពីនេះ កបទ.សអ.នឹងបន្តអនុវត្តការទូតវប្បធម៌ រួមមានការផ្សព្វផ្សាយអំពីវប្បធម៌ អរិយធម៌ សិល្បៈ និងម្ហូបអាហារ ក្នុងស្មារតីបង្កើត និងបង្កើនអំណាចស្រទន់ និងការស្គាល់កម្ពុជាលើឆាកអន្តរជាតិ៕
