(ភ្នំពេញ)៖ លោក ឡាវ ភីត ម៉េង (Lau Peet Meng) ប្រធានស្ថាប័នចារកម្ម​ស៊ីវិលសិង្ហបុរី បានលើក​ឡើង​ថា សម្តេចតេជោ ហ៊ុន សែន នាយករដ្ឋមន្ត្រីកម្ពុជា គឺជាមេដឹកនាំមួយរូប ដែល​បានចូលរួមចំណែករកសន្តិភាពសម្រាប់តំបន់ និងពិភពលោក។

លោក ឡាវ ភីត ម៉េង បានគូសរំលេចបែបនេះ ក្នុងជំនួបសម្តែងការគួរសម និងពិភាក្សាការងារជាមួយសម្តេចតេជោនាយករដ្ឋមន្ត្រីនាព្រឹកថ្ងៃអង្គារ ទី២៨ ខែកុម្ភៈ ឆ្នាំ២០២៣នេះ នៅវិមានសន្តិភាព។

បើតាមលោក អ៊ាង សុផល្លែត ជំនួយការផ្ទាល់របស់សម្តេចតេជោនាយករដ្ឋមន្ត្រី បានឱ្យដឹងថា នៅក្នុងជំនួបនេះ លោក ឡាវ ភីត ម៉េង បានសម្តែងគោរពចំពោះភាព​ជាអ្នកដឹកនាំរបស់សម្តេចតេជោ រួមមានការដឹកនាំអភិវឌ្ឍន៍ជាតិ រួមជាមួយនឹងការដឹក​នាំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ។

សម្រាប់ការដឹកនាំជាតិ លោក ឡាវ បានរំលឹកថា លោកធ្លាប់បានមក​កម្ពុជាកាល​ពី​ឆ្នាំ២០២០ តែសម្រាប់២០២៣នេះ លោកសង្កេតឃើញថា មានការរីកចម្រើនខុស​ប្លែកគ្នាច្រើន ជាមួយការរក្សាបាននូវស្ថេរភាព និងសុខសន្តិភាព។

លោក ឡាវ បានសម្តែងការអបអរសាទរជូនសម្តេចតេជោ ដែលបានដឹកនាំកិច្ចប្រជុំ​កំពូល​អាស៊ាន និងកិច្ចប្រជុំកំពូលពាក់ព័ន្ធ បានជោគជ័យ​ចំពេលពិភពលោក​កំពុង​ប្រឈមបញ្ហាជំងឺកូវីដ១៩ វិបត្តិនៅប្រទេសមីយ៉ាន់ម៉ា សង្គ្រាមនៅអ៊ុយក្រែន និងបញ្ហា​នៅសមុទ្រចិនខាងត្បូងជាដើម។

លោក អ៊ាង សុផល្លែត បានគូសរំលេចបែបនេះថា «ឯកឧត្តម ឡាវ បានលើកឡើង​ថា សម្តេចតេជោ មិនត្រឹមតែបានដឹកនាំកិច្ចប្រជុំកំពូលអាស៊ាន និងកិច្ចប្រជុំកំពូល​ពាក់​ព័ន្ធបានជោគជ័យប៉ុណ្ណោះទេ ប៉ុន្តែបានចូលរួមចំណែករកសន្តិភាពសម្រាប់តំបន់ និងពិភពលោកផងដែរ»។

ក្នុងជំនួបនោះ លោក ឡាវ ក៏បានសុំអនុសាសន៍សម្តេចតេជោ ជុំវិញកិច្ចសហប្រតិបត្តិ​ការ​រវាងកម្ពុជា និងសិង្ហបុរីផងដែរ។

ជាការឆ្លើយតបសម្តេចតេជោនាយករដ្ឋមន្ត្រី បានអរគុណលោក ឡាវ សម្រាប់ការវាយ​តម្លៃប្រកបដោយសុទិដ្ឋិនិយមលើវឌ្ឍនភាពសង្គម និងកិច្ចប្រជុំកំពូលអាស៊ាន ដែល​ដឹក​នាំដោយកម្ពុជា។

សម្តេចតេជោ បានលើកឡើងថា ភាពជោគជ័យរបស់អាស៊ានកាលពីឆ្នាំ២០២២ គឺបានមកពីការចូលរួមពីអ្នកពាក់ព័ន្ធទាំងអស់។ សម្តេចតេជោ ក៏បានអរគុណសិង្ហបុរី ដែលបានចូលរួមធ្វើកិច្ចប្រជុំដ៏មានសារៈសំខាន់នេះ។

សម្រាប់កិច្ចសហប្រតិបត្តិការទ្វេភាគីវិញ សម្តេចតេជោនាយករដ្ឋមន្ត្រី បានណែនាំ​លើក​​ទឹក​ចិត្តឱ្យជំរុញការតភ្ជាប់រវាងកម្ពុជា និងសិង្ហបុរី ជាពិសេសតាមផ្លូវអាកាស។ សម្តេចតេជោ ក៏ចង់ឃើញកិច្ចសហប្រតិបត្តិការលើវិស័យទេសចរណ៍ ការអប់រំ និងសុខាភិបាលផងដែរ៕