(ភ្នំពេញ)៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នឹងអញ្ជើញជាអធិបតីប្រារព្ធទិវាវប្បធម៌ជាតិ នៅថ្ងៃទី២ ខែមីនា ឆ្នាំ២០២៣ ខាងមុខនេះ។
នេះបើតាមលោក ឡុង ប៉ុណ្ណស៉ីរីវត្ថ រដ្ឋលេខាធិការ និងជាអ្នកនាំពាក្យ ក្រសួងវប្បធម៌ និងវិចិត្រសិល្ប: ថ្លែងក្នុងសន្និសីទសារព័ត៌មាន ស្តីពីការរៀបចំទិវាវប្បធម៌ជាតិ នៅថ្ងៃទី២៦ ខែមីនា ឆ្នាំ២០២៣។
មន្ត្រីជាន់ខ្ពស់ក្រសួងវប្បធម៌ បានលើកឡើងថា តាមពិតទៅ ទិវាវប្បធម៌ជាតិ ត្រូវបានកំណត់ធ្វើឡើង នៅថ្ងៃទី៣ ខែមីនា ឆ្នាំ២០២៣ ប៉ុន្តែដោយសារឆ្នាំនេះ កុំឲ្យប៉ះពាល់ដល់ពេលវេលារបស់សិល្បករសិល្បការិនី សម្តេចតេជោ ហ៊ុន សែន ក៏សម្រេចចិត្តធ្វើមុន ១ថ្ងៃ។
លោកបន្តថា ឆ្នាំ២០២៣នេះ ទិវាវប្បធម៌ជាតិ នឹងត្រូវធ្វើឡើង ជាលើកទី២៥ ក្រោមប្រធានបទ «យុវជនដើម្បីវប្បធម៌ជាតិ»។ តាមការគ្រោងទុក មានសិល្បករសិល្បការិនី ប្រមាណ ៤ពាន់នាក់ នឹងចូលរួម អបអរសាទរទិវាវប្បធម៌ជាតិ។
សូមជម្រាបថា ថ្ងៃ៣មីនា ជាទិវារំលឹកដល់គុណូបការៈបុព្វបុរសខ្មែរគ្រប់ជំនាន់ ដែលបានពលីទាំងកំលាំងកាយ កំលាំងចិត្ត ប្រាជ្ញា ស្មារតី និងអាយុជីវិត ក្នុងការបង្កើត ថែរក្សា និងការពារសម្បត្តិវប្បធម៌ដ៏សំបូរបែប និងមានតម្លៃសម្រាប់កូនចៅជំនាន់ក្រោយ៕
