(ពោធិ៍សាត់)៖ លោក ខូយ រីដា អភិបាលនៃគណៈអភិបាលខេត្តពោធិ៍សាត់ នាថ្ងៃទី២៨ ខែកុម្ភៈ ឆ្នាំ២០២៣នេះ បានដឹកនាំប្រតិភូ ចូលគោរពវិញ្ញាណក្ខន្ធ សពលោក ផាន់ អាត ប្រធានការិយាល័យរៀបចំដែនដី នគរូបនីយកម្ម សំណង់ និងភូមិបាលស្រុកបាកាន ដែលបានទទួលមរណភាព វេលាម៉ោង២រសៀល ថ្ងៃចន្ទ ០៨កើត ខែផល្គុន ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី២៧ ខែកុម្ភៈ ឆ្នាំ២០២៣ ដោយរោគាពាធ។
ពិធីគោរពវិញ្ញាណក្ខន្ធសព ត្រូវបានធ្វើឡើងនៅគេហដ្ឋាននៃសព ដែលស្ថិតក្នុងភូមិកោះស្វាយ ឃុំត្រពាំងជង ស្រុកបាកាន ខេត្តពោធិ៍សាត់។
លោក ខូយ រីដា តាងនាមជំនួសមុខឱ្យក្រុមប្រឹក្សាខេត្ត គណៈអភិបាលខេត្ត មន្ត្រីរាជការ កងកម្លាំងប្រដាប់អាវុធទាំង៣ប្រភេទ និងប្រជាពលរដ្ឋទូទាំងខេត្តពោធិ៍សាត់ បានសម្តែងនូវក្តីក្រៀមក្រំ ក្តុកក្តួលរំជួលចិត្ត សោកស្តាយក្រៃលែង ចំពោះការបាត់បង់ លោក ផាន់ អាត ប្រធានការិយាល័យរៀបចំដែនដី នគរូបនីយកម្ម សំណង់ និងភូមិបាលស្រុកបាកាន។
លោកបានចាត់ទុកថា មរណៈភាពរបស់លោក ផាន់ អាត គឺជាការបាត់បង់មន្ត្រីដ៏ល្អមួយរូប ដែលបានបម្រើប្រជាពលរដ្ឋ ប្រកបដោយសទ្ធាជ្រះថ្លាជ្រាលជ្រៅ ក្នុងការងារមនុស្សធម៌ និងការងារព្រះពុទ្ធសាសនា ព្រមទាំងជាការបាត់បង់ឳពុក ឳពុកក្មេង ជីតា ប្រកបដោយព្រហ្មវិហារធម៌ និងជាទីស្រលាញ់ ដែលបានបីបាច់ថ្នាក់ថ្នមថែរក្សា និងផ្គត់ផ្គង់គ្រប់បែបយ៉ាង ដល់ក្រុមគ្រួសារ និងបានអប់រំ ណែនាំ ផ្តល់ដំបូន្មានល្អៗ ធ្វើឱ្យកូនចៅបានក្លាយជាពលរដ្ឋល្អ។
ស្ថិតក្នុងស្ថានភាពដ៏ក្រៀមក្រំនេះ លោកអភិបាលខេត្ត សូមចូលរួមរំលែកនូវមរណទុក្ខ និងសេចក្តីសោកស្តាយ អាឡោះអាល័យជាទីបំផុត ជាមួយក្រុមគ្រួសារនៃសព ដោយសេចក្តីសង្វេគជាទីបំផុត និងសូមឧទ្ទឹសបួងសួង ដល់វិញ្ញាណក្ខន្ធរបស់លោក ផាន់ អាត បានសោយសុខក្នុងសុគតិភព កុំបីឃ្លាងឃ្លាតឡើយ។
នាឱកាសនោះលោក ខូយ រីដា ក៏បាននាំយក អង្ករ១០០គីឡូក្រាម ទឹកបរិសុទ្ធ៤កេស និងថវិកា១លានរៀល មកប្រគល់ជូនក្រុមគ្រួសារសព ដើម្បីទុកចាត់ចែងរៀបចំធ្វើបុណ្យតាមប្រពៃណី៕
