(ភ្នំពេញ)៖ ថ្ងៃទី២៨ ខែកុម្ភៈ ឆ្នាំ២០២៣នេះ គឺជាថ្ងៃចុងក្រោយហើយសម្រាប់​អតីត​បុគ្គលិកវិទ្យុ VOD ក្លាយជាមន្ត្រីរាជការ ក្រោមកិច្ចអនុគ្រោះរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។

លោក ព្រុំ សុខា រដ្ឋមន្ត្រីក្រសួងមុខងារសាធារណៈ បានប្រាប់បណ្តាញព័ត៌មាន Fresh News នៅព្រឹកថ្ងៃអង្គារ ទី២៨ ខែកុម្ភៈ ឆ្នាំ២០២៣នេះថា គិតត្រឹមថ្ងៃទី២៧ ខែកុម្ភៈ មាន​អតីត​បុគ្គលិក VOD សរុប ២៥នាក់ ក្នុងនោះនារី ៦នាក់ បានទៅដាក់ពាក្យ​បម្រើ​ការងារក្នុងក្របខណ្ឌរដ្ឋ។

លោករដ្ឋមន្ត្រី បានឱ្យដឹងទៀតថា ឱសានវាទនៃការទទួលពាក្យនឹងត្រូវបិទ​បញ្ចប់នៅ​ល្ងាច​ថ្ងៃនេះ តាមការកំណត់របស់សម្តេចតេជោ។ លោករដ្ឋមន្ត្រី រំពឹងថា នៅថ្ងៃនេះនឹង​មាន​អតីតបុគ្គលរបស់ VOD មកដាក់ពាក្យបន្តទៀត។

សូមបញ្ជាក់ថា កាលពីថ្ងៃទី១៤ ខែកុម្ភៈ ថ្ងៃទិវានៃក្តីស្រឡាញ់ សម្តេចតេជោ ហ៊ុន សែន បានសម្រេចផ្តល់ការងារក្របខណ្ឌមន្ត្រីរាជការជូនដល់អតីតបុគ្គលិករបស់វិទ្យុ VOD ដើម្បីដោះស្រាយការលំបាកក្នុងជីវភាព បន្ទាប់ពីវិទ្យុ VOD ត្រូវបានក្រសួង​ព័ត៌មាន​បិទការផ្សាយ ព្រោះការផ្សាយព័ត៌មានខុស និងមិនព្រមកែតម្រូវ ឬសូមទោស​ជាសាធារណៈចំពោះកំហុសលើការផ្សាយនេះ។

សម្តេចតេជោ ហ៊ុន សែន បានផ្តល់ឱកាសសម្រាប់ការដាក់ពាក្យចូលបម្រើការងារក្នុង​ក្របខណ្ឌរដ្ឋ ត្រឹមថ្ងៃទី២៨ ខែកុម្ភៈ នេះតែប៉ុណ្ណោះ។

បន្ទាប់ពីទទួលបានក្តីអនុគ្រោះ និងឱកាសដ៏កម្រនេះ អតីតបុគ្គលិករបស់វិទ្យុ VOD ក៏បានមកដាក់ពាក្យចូលបម្រើការងារក្របខណ្ឌរដ្ឋជាបន្តបន្ទាប់។ បើតាមព័ត៌មាន​អតីត​បុគ្គលិក​របស់វិទ្យុ VOD មានចំនួនសរុបជាង ៥០នាក់។ ពេលនេះចំនួនជាងពាក់កណ្តាលហើយ បានដាក់ពាក្យទទួលក្របខណ្ឌរដ្ឋ៕