(ភ្នំពេញ)៖ និស្សិតអាហារូបករណ៍សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចំនួន ៣៥រូប បានធ្វើដំណើរចេញទៅសិក្សានៅប្រទេសចិនហើយ កាលពីថ្ងៃទី១៨ និង១៩ ខែកុម្ភៈ ឆ្នាំ២០២៣កន្លងទៅនេះ។
និស្សិតដែលចេញទៅសិក្សានៅសាកលវិទ្យាល័យអានហ៊ួយ ប្រទេសចិននេះ ទទួលបានការយកចិត្តទុកដាក់ខ្ពស់ពីសំណាក់លោកបណ្ឌិត ហ៊ុន ម៉ាណែត ក៏ដូចជា លោក ឡាវ វ៉ាន់ រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានក្រុមការងារគ្រប់គ្រងនិស្សិតក្រៅប្រទេសប្រចាំចិន ព្រមទាំងលោក Liu Ren ប្រធានសមាគមសភាពាណិជ្ជកម្មខេត្តអានហ៊ួយនៅកម្ពុជា។
ក្នុងនោះលោក ឡាវ វ៉ាន់ បានអញ្ជើញជូនដំណើរនិស្សិតដែលចេញទៅសិក្សានៅប្រទេសចិននេះដោយផ្ទាល់ នៅព្រលានយន្តហោះថែមទៀតផង។
សូមរំលឹកថា មុននឹងឡើងយន្តហោះចេញទៅសិក្សានៅប្រទេសចិន កាលពីថ្ងៃទី១៤ ខែកុម្ភៈ កន្លងទៅ លោក ឡាវ វ៉ាន់ បានរៀបចំអាហារមួយពេលជូននិស្សិតទាំង ៣៥រូបនេះផងដែរ។
ក្នុងពេលនោះ លោក ឡាវ វ៉ាន់ បានផ្តាំផ្ញើដល់និស្សិតទាំង៣៥រូប ឱ្យប្រឹងប្រែងសិក្សារៀនសូត្រក្រេបយកចំណេះវិជ្ជា មកបំពេញការងារចិញ្ចឹមជីវិត។ ជាពិសេសត្រូវយកចំណេះវិជ្ជា បទពិសោធន៍ដែលបានឆ្លងកាត់អំឡុងពេលសិក្សានៅក្រៅប្រទេស ត្រលប់មកតបស្នងសងគុណដល់រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិតរបស់សម្តេចតេជោនាយករដ្ឋមន្ត្រី។
លោក ឡាវ វ៉ាន់ ក៏បានផ្តាំផ្ញើបន្ថែមនិស្សិតទាំង៣៥រូប កុំមានអារម្មណ៍ឯកោ ពេលស្នាក់នៅ និងសិក្សានៅប្រទេសចិន ព្រោះថ្នាក់ដឹកនាំ ជាពិសេសសម្តេចតេជោ និងសម្តេចកិត្តិព្រឹទ្ធបណ្ឌិត យកចិត្តទុកដាក់ជាប់ជានិច្ច។
លោកបន្តថា ប្រសិនបើមានបញ្ហាអ្វីត្រូវទាក់ទងក្រុមការងារគ្រប់គ្រងនិស្សិតក្រៅប្រទេស ប្រចាំប្រទេសចិន តាមរយៈក្រុមសម្របសម្រួលកិច្ចការនិស្សិត និងតំណាងនិស្សិតប្រចាំតំបន់ ដើម្បីជួយដោះស្រាយបញ្ហា៕
