(ព្រះសីហនុ)៖ កម្លាំងជំនាញនៃស្នងការដ្ឋាននគរបាលខេត្តព្រះសីហនុ សហការជាមួយកម្លាំងអធិការដ្ឋាននគរបាលក្រុងកោះរ៉ុង បានធ្វើការស្រាវជ្រាវយ៉ាងយកចិត្តទុកដាក់ឃាត់ខ្លួនបានជនសង្ស័យចំនួន២នាក់ ពាក់ព័ន្ធករណីគាស់បន្ទប់រីសត MOONLIGHT ស្ថិតក្នុងសង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ។

របាយការណ៍របស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ដែលបណ្ដាញព័ត៌មាន Fresh News ទទួលបាននៅថ្ងៃទី២០ ខែកុម្ភៈ ឆ្នាំ២០២៣នេះ បានឲ្យដឹងថា នៅយប់ថ្ងៃទី១៥ ខែកុម្ភៈ ឆ្នាំ២០២៣ មានប្រជាពលរដ្ឋប្ដឹងមកសមត្ថកិច្ចថា មានជនមិនស្គាល់អត្ដសញ្ញាណធ្វើសកម្មភាពគាស់បង្អួចបន្ទប់ស្នាក់នៅ ដោយលួចយកសម្ភារមួយចំនួន។

បន្ទាប់ពីស្រាវជ្រាវយ៉ាងយកចិត្តទុកដាក់ កម្លាំងជំនាញបានចាប់ខ្លួនជនសង្ស័យ២នាក់ និងដកហូតសម្ភារមួយចំនួន រួមមាន ម៉ូតូ១គ្រឿង ម៉ាក KAWASAKI KSR ពណ៌លឿងបិតស្កុតពណ៌ខ្មៅ (គ្មានស្លាកលេខ) និងទូរស័ព្ទដៃចំនួន២គ្រឿង ម៉ាក iPhone12 pro max ពណ៌ទឹកមាស និងម៉ាក iPhone14 pro max ពណ៌ស្វាយ (ផលចោរកម្ម)។

បន្ទាប់ពីធ្វើការសាកសួរក្នុងករណីនេះ ខាងការិយាល័យនគរបាលព្រហ្មទណ្ឌកម្រិតស្រាល កំពុងបន្តនីតិវិធីច្បាប់បន្ត៕