(ភ្នំពេញ)៖ ថ្នាក់សិក្សារបស់មជ្ឈមណ្ឌលបណ្ដុះបណ្ដាល Fresh News (FTC) ស្ដីពី «ការថតរូប ក្នុងវិជ្ជាជីវៈសាព័ត៌មាន» បានបញ្ចប់មេរៀនរបស់ខ្លួនដោយជោគជ័យ នៅរសៀលថ្ងៃទី១៨ ខែកុម្ភៈ ឆ្នាំ២០២៣នេះ។ ថ្នាក់ថតរូបរបស់ FTC បានសិក្សារយៈពេល៣ខែ ក្រោមការបង្ហាត់បង្រៀនដោយផ្ទាល់ពីលោក ហេង ស៊ីនិត្យ ដែលជាអ្នកជំនាញក្នុងវិស័យថតរូបឱ្យសារព័ត៌មានអន្តរជាតិធំៗលើពិភពលោក និងមានបទពិសោធរយៈពេល៣០ឆ្នាំមកហើយ។ ថ្នាក់សិក្សាអំពី«ការថតរូប ក្នុងវិជ្ជាជីវៈសាព័ត៌មាន» នេះមានសិក្ខាកាមចូលរួមសរុបចំនួន ៥១នាក់ មកពីគ្រប់មជ្ឈដ្ឋាន ទាំងរដ្ឋ និងឯកជន។

ក្រោយទទួលបានការបណ្ដុះបណ្ដាលអំពីការថតរូប សិក្ខាកាម បានសម្ដែងនូវការពេញចិត្ត ចំពោះថ្នាក់បណ្ដុះបណ្ដាលពីអ្នកជំនាញនាពេលនេះ។ មិនតែប៉ុណ្ណោះ ក៏មានសិក្ខាកាមជាច្រើនទៀតកំពុងរង់ចាំថ្នាក់សិក្សាថ្មីអំពីការថតរូបនេះផងដែរ។ យ៉ាងណាមិញក្រោយបញ្ចប់ថ្នាក់សិក្សាអំពីការថតរូបនាពេលនេះ ថ្នាក់សិក្សាថ្មីអំពី «ការថតរូប ក្នុងវិជ្ជាជីវៈសាព័ត៌មាន»នឹងត្រូវប្រកាសបើកថ្នាក់ថ្មីនាពេលឆាប់ៗខាងមុខនេះ។

សូមបញ្ជាក់ផងដែរថា មជ្ឈមណ្ឌលបណ្ដុះបណ្ដាល Fresh News (FTC) បច្ចុប្បន្នមានថ្នាក់សិក្សាចំនួន២ ទី១ គឺថ្នាក់សិក្សាអំពីការសរសេរព័ត៌មាន និងទី២ គឺថ្នាក់សិក្សាអំពីការថតរូបក្នុងវិជ្ជាជីវៈ អ្នកសារព័ត៌មាន។ FTC គឺជាផ្នែកមួយរបស់អង្គភាពព័ត៌មាន Fresh News ដែលត្រូវបានបង្កើតឡើង នៅខែកញ្ញា ឆ្នាំ២០២១ ក្រោមគំនិតផ្ដួចផ្ដើមរបស់ លោក លឹម ជាវុត្ថា ដើម្បីចូលរួមចែករំលែកចំណេះដឹង និងបទពិសោធន៍ផ្នែកព័ត៌មាន ក៏ដូចជាចូលរួមបណ្តុះបណ្តាលយុវជនជំនាន់ក្រោយ ក្នុងវិស័យព័ត៌មានជាដើម។

FTC មានលោក ម៉ារ យ៉ារិទ្ធិ ជាប្រធាន ដែលលោកមានបទពិសោធន៍ក្នុងវិស័យសារព័ត៌មានជិត៤០ឆ្នាំមកហើយ។ លោកធ្លាប់ជាភ្នាក់ងារសារព័ត៌មានបរទេសល្បីៗជាច្រើនដូចជា UPI, AP និង VOA ជាដើម។ លោកក៏ជាអតីតនិស្សិតខ្មែរ ដែលបានសិក្សាវិស័យវិជ្ជាជីវៈសារព័ត៌មានក្នុង សកលវិទ្យាល័យមីឈីហ្គែន University of Michigan និងសកលវិទ្យាល័យមែរីលែន University of Maryland ក្នុងសហរដ្ឋអាមេរិក។
នៅក្រោយការបញ្ចប់វគ្គសិក្សា សិក្ខាកាមនឹងទទួលបានវិញ្ញាបនបត្របញ្ជាក់ការសិក្សា ផងដែរ៕
ព័ត៌មានបន្ថែមសូមទំនាក់ទំនង៖

* លោក ពេជ្រ ប៊ុនសាយ អគ្គនាយករង Fresh News និងជាអនុប្រធានប្រចាំការ FTC តាមរយៈ
Tel: 089 960 090
Telegram: https://t.me/pichbunsay
* កញ្ញា ថាន រស្មី ប្រធានផ្នែកជំនាក់ទំនងសាធារណៈ FTC តាមរយៈ
Tel: 092 322 334
Telegram: https://t.me/raksmeythanfn