(សៀមរាប)៖ ក្រោយពីទទួលបានអនុសាសន៍ណែនាំដ៏ខ្ពង់ខ្ពស់ពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដេីម្បីបញ្ជូនប្រព័ន្ធផ្គត់ផ្គង់ទឹកស្អាតឲ្យដល់ប្រជាពលរដ្ឋនៅតំបន់អភិវឌ្ឍន៍រុនតាឯក និងតំបន់អភិវឌ្ឍន៍ពាក់ស្នែង ក្នុងខេត្តសៀមរាប លោកកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានធ្វេីការដឹកនាំដោយផ្ទាល់នូវការអនុវត្តគម្រោងសាងសង់ប្រព័ន្ធបញ្ជូនទឹកស្អាតទៅតំបន់អភិវឌ្ឍន៍ទាំងពីរខាងលេី ជាបន្តបន្ទាប់ ដោយក្នុងនោះបានរៀបចំរាល់ឯកសារគតិយុត្តពាក់ព័ន្ធ ការគិតគូមធ្យោបាយនិងសំភារៈសាងសង់ ការចុះពិនិត្យដល់ទីតាំងផ្ទាល់ ព្រមទាំងចាត់ចែងឲ្យក្រុមជំនាញនៃរដ្ឋាករទឹកស្វយ័តសៀមរាបចុះអនុវត្តការសាងសង់ជាលក្ខណ:បន្ទាន់។
ជាក់ស្តែងដេីម្បីចុះពិនិត្យពីវឌ្ឍនភាពការងារខាងលេី នៅព្រឹកថ្ងៃទី១៧ ខែកុម្ភៈឆ្នាំ២០២៣ លោកកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានដឹកនាំប្រតិភូក្រសួងនិងមន្ត្រីជំនាញចុះពិនិត្យពីវឌ្ឍនភាពគម្រោងបញ្ជូនទឹកស្អាតទៅតំបន់អភិវឌ្ឍន៍រុនតាឯក និងពាក់ស្នែង រួមមានការចុះពិនិត្យទីតាំងសាងសង់អាងស្តុកទឹកដែលំពុងដំណេីការសាងសង់ និងបានចុះពិនិត្យការជីកកប់ និងការតភ្ជាប់បំពង់បណ្តាញជាដេីម។
មានប្រសាសន៍នាឱកាសនោះ លោកកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានវាយតម្លៃខ្ពស់ និងកោតសរសើរចំពោះកិច្ចសហការដ៏ល្អពីអជ្ញាធរខេត្តនិងអង្គភាពពាក់ព័ន្ធ ជាពិសេសអង្គភាពរដ្ឋាករទឹកស្វយ័តសៀមរាប ដែលបានដឹកនាំការងារយ៉ាងសកម្ម សហការគ្នាធ្វេីទាំងយប់ទាំងថ្ងៃធ្វេីឲ្យគម្រោងនេះអនុវត្តបានលឿនឆាប់រហ័ស ជាលទ្ធផលគឺមានដូចជា៖-បានដាក់បណ្តាញមេបញ្ជូនទឹកទៅតំបន់អភិវឌ្ឍន៍រុនតាឯកបាន១០០%-បាននឹងកំពុងដាក់បណ្តញមេក្នុងតំបន់រុនតាឯកបានចំនួន ១គីឡូម៉ែត្រ/៦៤គីឡូម៉ែត្រ-និងកំពុងត្រៀមរៀបចំតម្លើងម៉ូទ័របូមបញ្ជូនបន្តទៅតំបន់អភិវឌ្ឃន៍រុនតាឯក។ ដោយឡែកសម្រាប់តំបន់អភិវឌ្ឍន៍ពាក់ស្នែងបានដាក់បណ្តាញទឹកស្អាតទំហំ៤០០មម ប្រវែង៥គីឡីម៉ែត្រ និងទំហំ ៣១៥មម ប្រវែវង១៥គីឡូម៉ែត្រ។
តមកនៅព្រឹកថ្ងៃបន្ទាប់ គឺថ្ងៃទី១៨ ខែកុម្ភៈ ឆ្នាំ២០២៣ លោកកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានដឹកនាំប្រតិភូក្រសួងអញ្ជេីញចុះពិនិត្យដំណេីរការសាងសង់អាងប្រព្រឹត្តិកម្មទឹកស្អាតដែលមានទីតាំងនៅភូមិ បុស្សអង្កាញ់ សង្កាត់ជ្រៀវ ក្រុងសៀមរាប ខេត្តសៀមរាប ដែលមានសមត្ថភាពផលិត៦មុឺនម៉េត្រគូបក្នុងមួយថ្ងៃ។
ក្នុងឱកាសនោះ លោកកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានវាយតម្លៃខ្ពស់ និងថ្លែងអំណរគុណចំពោះកម្ចីដ៏មានសារ:សំខាន់របស់ប្រទេសជប៉ុន ជាមួយនឹងបច្ចេកទេសសាងសង់របស់ជប៉ុនផងដែរ ដេីម្បីធានាការផ្គត់ផ្គង់ទឹកស្អាតទៅទីក្រុងសៀមរាបនិងតំបន់ជុំវិញ ដែលកំពុងមានតម្រូវការខ្ពស់នាពេលបច្ចុប្បន្ន ហេីយសង្ឃឹមថា គម្រោងនេះ នឹងត្រូវបញ្ចប់ក្នុងកំឡុងខែមេសាខាងមុខតាមការគ្រោងទុក។
បន្ទាប់មកទៀត នៅព្រឹកថ្ងៃដដែល លោកទេសរដ្ឋមន្រ្តី ចម ប្រសិទ្ធ ក៏បានបន្តដំណេីរ ទៅខេត្តកំពង់ធំដេីម្បីចុះពិនិត្យជាក់ស្តែងនូវគម្រោងពង្រីកសមត្ថភាពផ្គត់ផ្គង់ទឹកស្អាតខេត្តកំពង់ធំ ក្រោមជំនួយហិរញ្ញប្បទានឥតសំណងរបស់រាជរដ្ឋាភិបាលជប៉ុន ដែលមានសមត្ថភាពផលិត ៧.៥០០ម៉ែតត្រីគុណក្នុងមួយថ្ងៃ និងមានបណ្តាញចែកចាយប្រវែង១៥២ គីឡូម៉ែត្រ។
មានប្រសាសន៍ណែនាំនាឱកាសនោះ លោកទេសរដ្ឋមន្រ្តី ចម ប្រសិទ្ធ បានជម្រុញឲ្យរដ្ឋាករទឹកខេត្តកំពង់ធំខិតខំតបណ្តាញចូលផ្ទះប្រជាពលរដ្ឋឲ្យបានគ្រប់ខ្នងផ្ទះ នៅតំបន់ដែលមានបណ្តាញទឹកស្អាតឆ្លងកាត់ ព្រមទាំងខិតខំពិនិត្យលទ្ធភាពនៅតំបន់មិនទាន់មានទឹកស្អាតចូលដល់ ធ្វេីយ៉ាងណាដេីម្បីសម្រេចបាននូវគោលដៅអភិវឌ្ឍន៍វិស័យទឹកស្អាតសម្រាប់ឆ្នាំ២០២៥ និងឆ្នាំ២០៣០ ខាងមុខ៕
