(ភ្នំពេញ)៖ លោកបណ្ឌិត គិន ភា ប្រធានផ្នែកទំនាក់ទំនងសាធារណៈ នៃរាជបណ្ឌិតសភាកម្ពុជា និងជាអ្នកវិភាគនយោបាយ បានបង្ហាញប្រាប់អតីតបុគ្គលិក VOD អំពីសារៈសំខាន់នៃការងាររាជការដែលជាការងារបម្រើជាតិពិតប្រាកដ។
លោកបានលើកឡើងដូច្នេះថា៖ «មិនថាពេលនេះ ឬពេលណាទេ ការងាររាជការតែងតែជាក្តីប្រាថ្នានៃអ្នកសិក្សាភាគច្រើននៃសង្គមខ្មែរយើងរាប់ជំនាន់មកហើយ។ បើបងប្អូនអតីតបុគ្គលិក VOD មិនចាប់យកឱកាសមាសដែលជាការផ្តល់ជូនជាករណីពិសេស នៃប្រមុខរាជរដ្ឋាភិបាលនាពេលនេះទេ នោះបងប្អូននឹងបាត់បង់ឱកាសមាសបែបនេះជារៀងរហូត ហើយសូមកុំទន្ទឹងរង់ចាំការវិលត្រឡប់មកវិញនៃ VOD»។
លោក គិន ភា បានបន្តថា ការប្រឡងប្រជែងចូលការងាររាជការ មិនមែនជាការងាយស្រួលទេ ក្នុងមួយឆ្នាំៗ មានបេក្ខជនរាប់ម៉ឺននាក់ដាក់ពាក្យប្រឡងចូលការងាររាជការ តែអ្នកមានវាសនាក៏មិនច្រើនដែរ ដ្បិតចំនួនក្របខណ្ឌដែលរាជរដ្ឋាភិបាលផ្តល់ជូនសម្រាប់ក្រសួង-ស្ថាប័ននីមួយៗ គឺមានកម្រិតណាស់។
«ដូច្នេះ សូមបងប្អូនម្នីម្នារូតរះទៅដាក់ពាក្យសុំចូលបម្រើការងាររាជការក្នុងក្របខណ្ឌស្របតាមសមត្ថភាព ជំនាញវិជ្ជាជីវៈ និងឧបនិស្ស័យការងាររបស់បងប្អូនរៀងៗខ្លួន។ សូមបងប្អូនកុំបណ្ដែតបណ្ដោយឱ្យខកខានពេលវេលារហូតដល់ឱសានវាទចុងក្រោយ ដែលបណ្ដាលឱ្យបាត់បង់ឱកាសមាសដ៏កម្រនេះ។ បើបងប្អូនពិតជាស្រឡាញ់ជាតិ និងពិតជាចង់ជួយជាតិមែន សូមបងប្អូនរួមចំណែកជាមួយរាជរដ្ឋាភិបាលក្នុងការងាររាជការ ហើយធ្វើការដោយបេះដូងស្មោះនឹងជាតិយើង»។ នេះបើតាមការបន្ថែមរបស់លោកបណ្ឌិត គិន ភា។
ទោះជាយ៉ាងនេះក្តីលោកក៏បានណែនាំទៅដល់ អតីតបុគ្គលិក VOD មួយចំនួន ដែលមិនមានបំណងចង់ចូលធ្វើការងារមន្ត្រីរាជការ។ លោកថា សម្រាប់បងប្អូនដែលមិនមានបំណងដាក់ពាក្យសុំចូលបម្រើការងាររាជការដែលជាការផ្តល់ជូនរបស់ប្រមុខរាជរដ្ឋាភិបាល ហើយសុខចិត្តទៅធ្វើស្រែឡើងត្នោត ឬដាំស្ពៃនោះ សូមបងប្អូនអញ្ជើញទៅធ្វើខ្លួនឯងចុះ, តែសូមកុំបាច់ផ្លែផ្កា រុញឱ្យខ្លោច រោចឱ្យឆៅ។
លោកបានបន្ថែមទៀតថា កម្ពុជាត្រូវការយើងទាំងអស់គ្នា មានភាពជាពលរដ្ឋល្អ មានសុភវិនិច្ឆ័យ ឧត្តមគតិ និងមនសិកាជាតិ ដើម្បីរួមគ្នាថែរក្សាសន្តិភាព ស្ថិរភាព វឌ្ឍនភាព និងវិបុលភាពសង្គម ក្រោមការដឹកនាំរបស់រាជរដ្ឋាភិបាល ក្រោមដំបូលរដ្ឋធម្មនុញ្ញ និងក្រោមម្លប់ព្រះមហាក្សត្រជាទីគោរពសក្ការៈនៃយើង។
សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសទុកពេលទទួលអតីតបុគ្គលិករបស់ VOD ចូលក្របខណ្ឌរដ្ឋត្រឹមម៉ោង៥ល្ងាចថ្ងៃទី២៨ ខែកុម្ភៈ ឆ្នាំ២០២៣ ខណៈមកដល់ល្ងាចថ្ងៃទី១៧ ខែកុម្ភៈ មានបុគ្គលិក ៨រូបហើយ បានដាក់ពាក្យចូលបម្រើការងាររដ្ឋ ដែលសម្តេចបានផ្តល់ជូន។
សម្តេចតេជោ បានបញ្ជាក់លើទំព័រហ្វេសប៊ុកយ៉ាងដូច្នេះ «ដើម្បីបញ្ចប់ការងារនេះ ខ្ញុំសូមកំណត់រយៈពេលឈប់ទទួលពាក្យសុំចូលធ្វើការត្រឹមម៉ោង ១៧៖០០នាទីថ្ងៃ២៨ ខែកុម្ភៈ ឆ្នាំ២០២៣»៕
