(បន្ទាយមានជ័យ)៖ លោក ប៊ុន សុខវិបុល កុងស៊ុលកម្ពុជាប្រចាំខេត្តស្រះកែវ បានឲ្យភ្នាក់ងារ Fresh News ឲ្យដឹងនៅថ្ងៃទី៣០ ខែមិថុនា ឆ្នាំ២០១៦នេះថា សមត្ថកិច្ចថៃបានចាប់​ប្រជាពលរដ្ឋខ្មែរ​២នាក់ បញ្ជូនទៅពន្ធធនាគា ដោយគ្រាន់តែបើកគោយន្តដឹកគ្រែ និងកៅអីឈើលក់ក្នុងទឹកដីថៃ តែប៉ុណ្ណោះ។ លោកបានបន្ថែមថា លោកបានឲ្យមន្ត្រីជំនាញខាងកម្ពុជាសិក្សាព្យាយាម និងរកមេធាវី ជួយដោះស្រាយអន្តរាគមន៍ជូនពលរដ្ឋ២នាក់ ខាងលើនេះឲ្យបានឆាប់រហ័ស ហើយបានវិលមកទឹកដីមាតុភូមិវិញ ដើម្បីបានជួបភរិយា កូនចៅ កំពុងរង់ចាំនៅផ្ទះ។

សូមបញ្ជាក់ថា សមត្ថកិច្ចថៃ បានដកហូតគោយន្ត២គ្រឿង ជាមួយនឹងគ្រឿង​សង្ហាររឹមមួយចំនួន ដែលប្រជាពលរដ្ឋខ្មែរបានឆ្លងដែនតាម​ច្រករបៀងចំការគរ ស្ថិតក្នុងស្រុកថ្មពួក ខេត្តបន្ទាយមានជ័យ កាលពីវេលាម៉ោង៤ល្ងាច ថ្ងៃទី២៧ ខែមិថុនា ឆ្នាំ២០១៦ ហើយឈមក្នុង​ភូមិសាស្រ្ត ស្រុកតាបប្រាយ៉ា ខេត្តស្រះកែវ ប្រទេសថៃ ក្នុងគោលបំណងលក់គ្រឿងសង្ហារឹម ក្រោយត្រូវបានសមត្ថកិច្ច​ថៃចាប់​បញ្ជូន​ទៅពន្ធធនាគា ប្រទេសថៃ៕