(សៀមរាប)៖ សមាគមក្រុមប្រឹក្សាវប្បធម៌ឌីជីថលអង្គរ សហការជាមួយស្ថានទូតអង់គ្លេសប្រចាំកម្ពុជា និងក្រសួងវប្បធម៌ និងវិចិត្រសិល្បៈ នៅរសៀលថ្ងៃទី១២ ខែកុម្ភៈ ឆ្នាំ២០២៣ បានរៀបចំ Gala Dinner សម្រាប់មូលនិធិវប្បធម៌ ដើម្បីជួយគាំទ្រដល់មូលដ្ឋានគ្រឹះក្នុងការអភិរក្ស និងអភិវឌ្ឍន៍វប្បធម៌ ដែលបានប្រារព្ធធ្វើឡើងនៅប្រាសាទចៅសាយទេវតា ក្នុងខេត្តសៀមរាប។ នៅក្នុងពិធីនោះដែរ ក៏មានការបង្ហាញពីវប្បធម៌ និងសិល្បៈរបស់កម្ពុជា និងចក្រភពអង់គ្លេសផងដែរ។

ពិធីនេះមានការចូលរួមពីលោកជំទាវបណ្ឌិត ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកឧកញ៉ា តឹង ភិពីង ប្រធានសមាគមក្រុមប្រឹក្សាវប្បធម៌ឌីជីថលអង្គរ ព្រះនាងតូច នរោត្តម ជេណា និងលោក លោកស្រី មកពីក្រសួងស្ថាប័ននានា ព្រមទាំងភ្ញៀវជាតិ និងអន្តរជាតិជាច្រើនចូលរួមផងដែរ។

លោកឧកញ៉ា តឹង ភិពីង ប្រធានសមាគមក្រុមប្រឹក្សាវប្បធម៌ឌីជីថលអង្គរ បានលើកឡើងថា ជាមួយនឹងការខិតខំប្រឹងប្រែងរួមគ្នារបស់យើង ព្រឹត្តិការណ៍តន្ត្រីនៃវប្បធម៌ និងសិល្បៈនេះ ត្រូវបានប្រារព្ធធ្វើឡើងនៅរាត្រីនេះ។
លោកឧកញ៉ា បានថ្លែងថា «ខ្ញុំក៏សូមសម្តែងនូវការស្វាគមន៍យ៉ាងកក់ក្តៅ និងថ្លែងអំណរគុណយ៉ាងជ្រាលជ្រៅចំពោះភ្ញៀវកិត្តិយសទាំងអស់ ដែលបានអញ្ជើញមកចូលរួមក្នុង «ព្រឹត្តិការណ៍វប្បធម៌ និងសិល្បៈកម្ពុជា និងអង់គ្លេស លើកទី១ ឆ្នាំ២០២៣ នារាត្រីនេះ»។

លោកឧកញ៉ា តឹង ភិពីង ក៏សូមថ្លែងអំណរគុណចំពោះលោកជំទាវបណ្ឌិតសភាចារ្យរដ្ឋមន្ត្រីក្រសួងវប្បធម៌ និងវិចិត្រសិល្បៈ សមាជិកនៃរាជវង្សកម្ពុជា និងសិល្បករដែលអញ្ជើញមកពីចក្រភពអង់គ្លេស ថៃ កម្ពុជា និងភ្ញៀវកិត្តិយសជាតិ និងអន្តរជាតិ ដែលបានអញ្ជើញចូលរួមក្នុងព្រឹត្តិការណ៍នៃរាត្រីនេះផងដែរ។

លោកជំទាវបណ្ឌិត ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានលើកឡើងថា កម្មវិធីនេះកើតឡើងចេញពីការរួបរួមគ្នារវាងសមាគមក្រុមប្រឹក្សាវប្បធម៌ឌីជីថលអង្គរ និងក្រសួងវប្បធម៌ និងវិចិត្រសិល្បៈកម្ពុជា ក៏ដូចជាមិត្តភក្កិដទៃទៀត រួមនឹងមន្រ្តី និងសិល្បករកម្ពុជា ដើម្បីបង្ហាញនូវអ្វីដែលជា តម្លៃនៃសិល្បៈ ហើយក៏ជាការជួបជុំមួយរវាងមិត្តភក្កិ នៅក្នុងរាត្រីនេះផងដែរ។

លោកជំទាវបណ្ឌិត ភឿង សកុណា សូមថ្លែងអំណរគុណចំពោះប្រធានសមាគមក្រុមប្រឹក្សាវប្បធម៌ឌីជីថលអង្គរ ស្ថានទូតអង់គ្លេសប្រចាំទីក្រុងភ្នំពេញ វិទ្យាស្ថានតន្ត្រីទីក្រុងឡុងដ៍ និងភ្ញៀងកិត្តិយសទាំងអស់គ្នានៅទីនេះ ដែលបានអញ្ជើញមកចូលកម្មវិធីនេះ។

ព្រះនាងតូច នរោត្តម ជេណា បានសម្តែងនូវសេចក្តីសប្បាយរីករាយជាខ្លាំង ដែលបានចូលរួមនៅក្នុងកម្មវិធីមួយនេះ ដោយព្រះនាងតូចស្រឡាញ់វិស័យសិល្បៈតាំងពីក្មេងមក ហើយកម្មវិធីនេះដែរ ក៏បានទស្សនានូវទស្សនីយភាព វប្បធម៌ និងសិល្បៈជាច្រើនរបស់បរទេសផងដែរ៕