(អេហ្ស៊ីប)៖ ក្រុមអ្នកស៊ើបអង្កេតអេហ្ស៊ីប បានបញ្ជាក់ជាផ្លូវការនៅព្រឹកថ្ងៃព្រហស្បតិ៍នេះថា យន្តហោះ EgyptAir ជើងហោះហើរ flight MS804 ពិតជាមានផ្សែងហុយចេញពីយន្តហោះ នៅមុនពេលធ្លាក់ចុះ​ក្នុង​សមុទ្រមេឌីទែរ៉ាណេ។ នេះបើយោងតាមការចេញផ្សាយរបស់សារព័ត៌មាន BBC ចេញផ្សាយនៅមុននេះបន្តិច។

សារអេឡិចត្រូនិកដែលបានផ្ញើដោយស្វ័យប្រវត្តិនៅក្នុងប្រអប់ខ្មៅ បានបង្ហាញថា នៅមុនពេលធ្លាក់ យន្តហោះ EgyptAir មានហុយផ្សែងខ្មៅចេញពី​បង្គន់ ហើយក៏រាលដាលដល់​ខាងក្រោម​កាប៊ីនយន្តហោះ ដោយ​វា​បាន​កើតឡើង​ប៉ុន្មាននាទីមុន ពេលយន្តហោះ​បាត់ខ្លួន។

ទិន្នន័យនេះ ត្រូវបាន​ក្រុមអ្នកស៊ើបអង្កេតអេហ្ស៊ីប ស្រង់ចេញពីប្រអប់ខ្មៅ Recorded Data ដែលរកឃើញ​ដំបូង​គេ ចំណែកប្រអប់ខ្មៅទី២ កំពុងស្ថិតនៅក្នុងប្រទេសបារាំង ព្រោះក្រុមអ្នកស៊ើបអង្កេតអេហ្ស៊ីប បានបញ្ជូន​ទៅឲ្យអាជ្ញាធរបារាំងជួសជុល ដោយសារតែមានកំណកអំបិល និងស្លែជាមេម៉ូរ៉ី​នៃប្រអប់ខ្មៅច្រើនពេក។

គួរបញ្ជាក់ផងដែរថា យន្តហោះ EgyptAir ជើងហោះហើរ flight MS804 ពីទីក្រុងប៉ារីស ប្រទេសបារាំង ទៅ​កាន់ទីក្រុងគែរ ប្រទេសអេហ្ស៊ីប បានបាត់ខ្លួន និងត្រូវបានគេរកឃើញធ្លាក់នៅក្នុងសមុទ្រមេឌីទែរ៉ាណេ កាលពី ថ្ងៃទី១៩ ខែឧសភា ដោយបានស្លាប់មនុស្ស ៦៦នាក់៕