(កំពង់ឆ្នាំង)៖ ព្រះមេត្តិសត្ថា វង្ស កុសល ព្រះអនុគណស្រុករលាប្អៀរ ខេត្តកំពង់ឆ្នាំង ក្នុងនាមតំណាងឱ្យមន្ត្រីសង្ឃ ក្នុងស្រុករលាប្អៀរ ខេត្តកំពង់ឆ្នាំង បានថ្លែងអំណរគុណដល់លោក ពៅ សុខ ទីប្រឹក្សាផ្ទាល់សម្តេចតេជោ ហ៊ុន សែន និងជាប្រធានក្រុមការងារសៀវភៅ «កូនប្រុសច្បងដ៏មានឥទ្ធិពល» ព្រមទាំងក្រុមការងារ ដែលបាននាំយកនូវសៀវភៅចំនួន ១២០ក្បាល ប្រគេនជូនសាលាគណខេត្ត, សាលាអនុគណស្រុក, មន្ទីរធម្មការនិងសាសនាខេត្ត សាលាស្រុករលាប្អៀរ, សាខពុទ្ធិកសាកលវិទ្យាល័យ ព្រះសីហនុរាជខេត្តកំពង់ឆ្នាំង សាលាពុទ្ធិកអនុវិទ្យាល័យខ្សាម និងឃុំទាំង១៤ ក្នុងស្រុក និងវត្តទាំង៦២ ក្នុងស្រុករលាប្អៀរ។
ព្រះមេត្តិសត្ថា វង្ស កុសល បានថ្លែងអរគុណយ៉ាងដូចនេះ នាថ្ងៃទី១១ ខែកុម្ភៈ ឆ្នាំ២០២៣នេះ ក្នុងឱកាសដែលលោក ពៅ សុខ ទីប្រឹក្សាផ្ទាល់សម្តេចតេជោ ហ៊ុន សែន និងជាប្រធានក្រុមការងារសៀវភៅ «កូនប្រុសច្បងដ៏មានឥទ្ធិពល» នាំយកសៀវភៅប្រមាណ ១២០ក្បាល ប្រគេនជូននៅសាលាអនុគណស្រុករលាប្អៀរ ស្ថិតក្នុងវត្តវិហាហ្លួង ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង។
ព្រះមេត្តិសត្ថា វង្ស កុសល មានសង្ឃដីការបន្ថែមថា ការផ្តល់សៀវភៅបែបប្រវត្តិសាស្ត្រដ៏មានតម្លៃនេះ ជារឿងមួយដែលល្អណាស់ ព្រោះសៀវភៅដ៏មានតម្លៃ ប្រកបដោយខ្លឹមសារ និងអត្ថន័យនៅពេលនេះ គឺពិតជាល្អចំពេលដែលមានតម្រូវការ ព្រោះសៀវភៅដ៏មានតម្លៃនេះ គឺជាការចែករំលែកក្នុងការសិក្សាឈ្វេងយល់ឲ្យកាន់តែច្បាស់អំពីបេក្ខភាពនាយករដ្ឋមន្ត្រី នាពេលអនាគតផងដែរ។
បើតាមព្រះគ្រូសិរីធម្មវង្សា សេង ដា ជំនួយការសាលាអនុគណស្រុករលាប្អៀរ មានសង្ឃដីការដែរថា សៀវភៅដែលលោក ពៅ សុខ នាំយកមកនាពេលនេះ មិនត្រឹមតែមានសៀវភៅ «កូនប្រុសច្បងដ៏មានឥទ្ធិពល» តែប៉ុណ្ណោះទេ ដែលទាំងមានសៀវភៅជាច្រើនទៀតរួមមាន៖ សៀវភៅ «កូនប្រុសច្បងដ៏មានឥទ្ធិពល» ចំនួន ១២០ក្បាល សៀវភៅ «អ្នកយុទ្ធិសាស្ត្រវ័យក្មេងនៅអាស៊ី» ចំនួន ៣០ក្បាល សៀវភៅ «ទឹកចិត្តអ្នកជួយសង្រោះ» ចំនួន ៣០ក្បាល, សៀវភៅ «សម្ដេច ហ៊ុន សែន ៣យន្តការឈ្នះកូវីដ១៩» ចំនួន ៣០ក្បាល, សៀវភៅ «សម្ដេច ហ៊ុន សែន កំពូលស្ថាបនិក និងបិតាសន្តិភាព របស់កម្ពុជា» ចំនួន ៣០ក្បាល សរុប ២៤០ក្បាល។
ព្រះគ្រូសិរីធម្មវង្សា សេង ដា បានបន្ថែមថា ការប្រគេនសៀវភៅនេះ ជាការលេីកទឹកចិត្ត ជំរុញ និងគ្រាំទ្រ សន្តិភាព សច្ចៈប្រវត្តិសាស្ត្របានបញ្ជាក់យ៉ាងច្បាស់ និងធ្វេីឲ្យព្រះសង្ឃបានចង់ចាំថាបេីគ្មាន ថ្ងៃ៧ មករា ១៩៧៩ នោះទេគឺគ្មានអ្វីៗទាំងអស់ពិសេសវិស័យព្រះពុទ្ធសាសនាផងដែរ៕
