(ភ្នំពេញ)៖ កម្លាំងសមត្ថកិច្ចខណ្ឌឫស្សីកែវ​ សហការជាមួយប៉ុស្តិ៍ទួលសង្កែ​ បានធ្វើការឃាត់ខ្លួនយុវជនម្នាក់​ និងថ្នាំញៀន​ ១កញ្ចប់​ កាលពីវេលាម៉ោង​​ ៤និង​០០នាទីទាបភ្លឺ​ ថ្ងៃទី​ ២៩​ ខែមិថុនា​ ឆ្នាំ២០១៦​ ស្ថិតចំណុចផ្លូវរថភ្លើង កែងផ្លូវ​លេខ៧០ ក្រុមទី៩ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ។

ជនសង្ស័យមានឈ្មោះ​ ផល​ សីហា ​ភេទប្រុស​ អាយុ​ ២៧ឆ្នាំ​ មុខរបរ​ ​ដើររើសអេតចាយ ស្នាក់នៅផ្ទះជួលកើតហេតុខាងលើ​ និងមានប្រពន្ធឈ្មោះ​ ម៉ែ​ អាម៉ាប់​ អាយុ​៣០ឆ្នាំ​ មុខរបរ​ លក់បន្លែនៅផ្សារទំនប់​។

ប្រភពព័ត៌មាន​ពីសមត្ថកិច្ចបានឲ្យដឹងថា មុនពេលកើតហេតុ​ កម្លាំងសមត្ថកិច្ចខណ្ឌឫស្សីកែវ​ សហការជាមួយកម្លាំងសមត្ថកិច្ចប៉ុស្តិ៍ឫស្សីកែវ បាននិងកំពុងជិះល្បាតជុំវិញភូមិសាស្ត្រ​ខណ្ឌឫស្សីកែវ ពេលនោះ​ ក៏បានប្រទះឃើញយុវជនម្នាក់កំពុងដើរតាមផ្លូវ​ និងមានការសង្ស័យបានហៅអោយឈប់​ រួចធ្វើការឆែកឆេរ​បានរកឃើញនៅថ្នាំញៀន​ ​១កញ្ចប់​ ជាប្រភេទម៉ាទឹកកក​ ភ្លាមៗនោះ​ កម្លាំងសមត្ថកិច្ចយើងបានធ្វើការឃាត់ខ្លួន​ និងយកមកប៉ុស្តិ៍ទួលសង្កែ​ ដើម្បីធ្វើការសាកសួរ​។

ក្រោយមកជនសង្ស័យបានសារភាពថា​ ខ្លនបានប្រើប្រាស់ថ្នាំញៀនរយៈពេល​ ៥ខែមកហើយ​ ដោយរូបគេបានដើររើសអេតចាយ យកទៅលក់ បានលុយយកមកទិញថ្នាំញៀនជក់​។

បច្ចុប្បន្នជនសង្ស័យខាងលើ ត្រូវបានសមត្ថកិច្ចឃុំខ្លួនជាបណ្ដោះអាសន្ន នៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿង​ បញ្ជូនទៅកាន់តុលាការ​ ចាត់ការតាមនីតិវិធីច្បាប់​៕