(រតនគិរី)៖ នៅព្រឹកថ្ងៃចន្ទ ១រោច ខែមាឃ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៦ ខែកុម្ភៈ ឆ្នាំ២០២៣ លោក ញ៉ែម សំអឿន អភិបាលខេត្តរតនគិរី និងលោកស្រី ព្រមទាំងថ្នាក់ដឹកនាំ មន្ត្រីរាជការពុទ្ធបរិស័ទ បានអញ្ជើញចូលរួមរាប់បាត្រព្រះសង្ឃចំនួន៩៣អង្គ ជាកិច្ចឆ្លងនៃពិធីបុណ្យមាឃបូជា។
កម្មវិធីរាប់បាត្របាននិមន្តព្រះសង្ឃគោចរបិណ្ឌបាត្រពីចំណុច វត្តឥសាន្តរតនារាម ឆ្ពោះមករង្វង់មូលនាគព័ន្ធបន្តទៅជុំវិញផ្សារក្រុងបានលុងរួច និមន្តគោចរបិណ្ឌបាត្រឆ្ពោះទៅទីអារាមវត្តឥសាន្តរតនារាមវិញជាកិច្ចឆ្លងបញ្ចប់ពិធីបុណ្យមាឃបូជានៅវេលានោះដោយបរិបូរណ៍។
សូមបញ្ជាក់ថា នៅរាត្រីថ្ងៃ១៥កើត ពេញបូណ៌មីខែមាឃ ឆ្នាំខាលចត្វាស័ក ព.ស ២៥៦៦ ត្រូវ នឹងថ្ងៃទី៥ ខែកុម្ភៈ ឆ្នាំ២០២៣ លោក ញ៉ែម សំអឿន និងលោកស្រីបានអញ្ជើញអធិបតីក្នុងពិធីបុណ្យមាឃបូជា ដែលរៀបចំធ្វើឡើងយ៉ាង អធិកអធម នៅបរិវេណវត្តឥសាន្តរតនារាមស្ថិតនៅ សង្កាត់បឹងកន្សែង ក្រុងបានលុង ដើម្បីរំឭកដល់ថ្ងៃព្រះសម្មាសម្ពុទ្ធ ព្រះបរមគ្រូ ចំពោះហេតុ ២ យ៉ាង គឺទ្រង់ដាក់ ព្រះជន្មាយុសង្ខារ និងទ្រង់ធ្វើ ចតុរង្គ មហាសន្និបាត នៃព្រះអរហន្ត ទាំង១២៥០អង្គ។
ពិធីបុណ្យ មាឃបូជា គឺជាបុណ្យមួយក្នុងបណ្តាបុណ្យធំៗ ទាំងឡាយក្នុងព្រះពុទ្ធសាសនាដែលប្រទេសកាន់ព្រះពុទ្ធសាសនា លើពិភពលោកតែងតែប្រារព្ធធ្វើពុំដែលខាន។ ចំពោះពុទ្ធសាសនិកជនខ្មែរយើង ក៏តែងតែប្រារព្ធ បុណ្យមាឃបូជា នៅគ្រប់វត្តអារាមទូទាំងប្រទេសជារៀងរាល់ឆ្នាំ ទៅតាមទំនៀមទម្លាប់នៃព្រះពុទ្ធសាសនា និងស្របតាម រដ្ឋធម្មនុញ្ញ នៃព្រះរាជាណាចក្រកម្ពុជា បានចែងថា ព្រះពុទ្ធសាសនា ជាសាសនារបស់រដ្ឋ៕
