(ភ្នំពេញ)៖ គណៈកម្មការជ្រើសរើស និងត្រួតពិនិត្យលក្ខណៈសម្បត្តិសិក្ខាកាម នៃក្រសួងការពារជាតិ នៅព្រឹកថ្ងៃទី២៨ ខែមិថុនា ឆ្នាំ២០១៦ បានចុះធ្វើបទបង្ហាញដល់សិស្សានុសិស្សថ្នាក់ទី១១-១២ នៃវិទ្យាល័យព្រះស៊ីសុវត្ថិ ប្រមាណ៤០០នាក់ អំពីការប្រលងជ្រើសរើសនាយទាហាន ដោយមានការចូលរួមពីលោកនាយកវិទ្យាល័យព្រះស៊ីសុវត្ថិ និងប្រធានក្រុមការងារផ្សព្វផ្សាយ នៃសាលាទាហាន​ នៃកងយោធពលខេមរភូមិន្ទ។

លោក មូល សុខហេង នាយកវិទ្យាល័យព្រះស៊ីសុវត្ថិ បានឱ្យដឹងថា «នេះគឺជាលើកទីមួយហើយ ដែលវិទ្យាល័យបាន​ទទួលនូវការធ្វើ​បទបង្ហាញនេះ និងជាការផ្សព្វផ្សាយ​ដ៏មានសារសំខាន់ និងជា​ការចូលរួម​ចំណែក​ក្នុងកម្មវិធីតម្រង់ទិសវិជ្ជាជីវៈ ដល់សិស្សានុសិស្ស ក្នុងការជ្រើសរើសជំនាញ​ដែលពួកគេពេញ​ចិត្តសម្រាប់អនាគត»។ លោកនាយក​វិទ្យាល័យ ក៏បានស្នើឱ្យ​សិស្សានុសិស្ស ខិតខំយកចិត្តទុកដាក់ ចំពោះការធ្វើបទបង្ហាញដ៏មានសារសំខាន់នេះ ដើម្បីទុកជាទុនក្នុងការជ្រើសរើសជំនាញ នៅពេលដែលបញ្ចប់ការសិក្សា នៅមធ្យមសិក្សានេះ។

លោក ឡុង គឹមធាន នាយការិយាល័យផែនការ​ នៃទីចាត់ការហ្វឹកហ្វឺនអគ្គមេបញ្ជាការ  បានធ្វើបទបង្ហាញពីព័ត៌មានសំខាន់ៗស្តីពី ការប្រលងជ្រើសរើសនាយទាហាន រួមមាន គោលបំណង ព័ត៌មានអំពី​សាលាបណ្តុះបណ្តាលនាយទាហាន, លក្ខណៈសម្បត្តិសិក្ខាកាម, អត្ថប្រយោជន៍ និងព័ត៌មាសំខាន់ៗ មួយចំនួនទៀត ពីការសិក្សានៅក្នុងវិស័យយោធា។ លោកបានថ្លែងថា «គោលបំណងនៃ​ការផ្សព្វផ្សាយ គឺ បណ្តុះបណ្តាលធនធានមនុស្សលើវិស័យយោធា បណ្តុះឆន្ទៈយុវជនឱ្យមានការវិន័យ សច្ចធម៌ សីលធម៌ និង ភាពក្លាហាន បណ្តុះគោលគំនិត​នៃភាពជាអ្នកដឹកនាំ និងបង្កើតស្មារតីស្នេហាជាតិមាតុភូមិ សម្រាប់យុវជនទាំងអស់គ្នា»។

ក្នុងឱកាសនេះដែរ និស្សិតនាយទាហាននៃវិទ្យាស្ថានទ័ពជើងគោក និងសាលានាយទាហាន​សកម្មត្មាតពង ដែលកំពុងសិក្សាវគ្គ​នាយទាហាន បានចែករំលែក​បទពិសោធន៍ នៃការសិក្សា ការរស់ ក្នុងនាមជាសិក្ខាកាមនាយទាហាន ប្រាប់ដល់សិស្សា​នុសិស្សនៃវិទ្យាល័យព្រះស៊ីសុវត្ថិ និងផ្តល់ដំបូន្មានល្អៗ ព្រមទាំងបានលើកទឹកចិត្តដល់សិស្សានុសិស្សវិទ្យាល័យទាំងអស់ ឱ្យខិតខំរៀនសូត្រ និងជ្រើសរើសជំនាញដែលខ្លួនពេញចិត្ត ឱ្យបានត្រឹមត្រូវ។

បន្ទាប់ពីបានចូលរួមស្តាប់ការបទបង្ហាញ និងការទស្សនាស្តង់បង្ហាញពីការជ្រើសរើសនាហាន រួចមក ក្រុមសិស្សនុសិស្ស បានបង្ហាញចំណាប់អារម្មណ៍ ចំពោះការសិក្សាក្នុងវិស័យកងទ័ព ដើម្បីចូលរួម​ការពារជាតិ ហើយពួកគេនឹងពិចារណា ក្នុងការជ្រើសរើសជំនាញនេះ នៅពេលខាងមុខ។

សូមជម្រាបថា លក្ខខណ្ឌនៃការប្រលងជ្រើសរើសនាហាន គឺសិស្សានុសិស្ស ត្រូវមានសញ្ជាតិខ្មែរ អាយុចាប់ពី១៨ ដល់ ២៥ឆ្នាំ កាយសម្បទារឹងមាំ មិនពាក់ព័ន្ធការផ្តន្ទាទោសពីតុលាការ ត្រូវមានសញ្ញាបត្រទុតិយភូមិ ឬ ឯកសារប្រហាក់ប្រហែល និងកម្ពស់បុរស ១.៦០Cm ឡើងទៅ ហើយនារីមានកម្ពស់ ១.៥០Cm ឡើងទៅ៕