(កណ្ដាល)៖ លោកស្រី ម៉ុម ថានី រដ្ឋលេខាធិការក្រសួងបរិស្ថាន និងលោក តាំង ម៉េងលាន អភិបាលរងខេត្តកណ្ដាល នៅព្រឹកថ្ងៃទី៣១ ខែមករា ឆ្នាំ២០២៣នេះ បានអញ្ជើញជាអធិបតីភាពក្នុងកិច្ចប្រជុំបុកសរុប លទ្ធផលការងារបរិស្ថាន ឆ្នាំ២០២២ និងលើកទិសដៅការងារអនុវត្តបន្តឆ្នាំ២០២៣ ដោយបានការអញ្ជើញចូលរួមពីបណ្ដាមន្ទីរ អង្គភាព ជុំវិញខេត្ត និងរដ្ឋបាលក្រុង-ស្រុកទាំង១១។

លោក ពៅ សោមាណាក់ ប្រធានមន្ទីរបរិស្ថានខេត្តកណ្ដាល បានឲ្យដឹងថា កន្លងទៅមន្ទីរបានចុះផ្សព្វផ្សាយអប់រំចំណេះដឹងបរិស្ថាន ការគ្រប់គ្រងសំរាមសំណល់រឹង សំណល់ផ្លាស្ទិក គិច្ចគាំពារបរិស្ថាន ដើម្បីភូមិស្អាត សហគមន៍ស្អាត ផ្លូវសាធារណស្អាត គ្មានសំរាមបានចំនួន៥៩ភូមិ ក្នុងក្រុងតាខ្មៅ មានអ្នកចូលរួមសរុប២,៣៤០នាក់ ស្រី ១,៣៦២នាក់។

បន្ថែមពីនេះ បានចុះអប់រំផ្សព្វផ្សាយចំណេះដឹងបរិស្ថាន និងច្បាប់បរិស្ថានមួយចំនួនដល់សិស្សានុសិស្ស លោកគ្រូ អ្នកគ្រូបានចំនួន៥សាលារៀន មានអ្នកចូលរួមចំនួន ២៦៨នាក់ ស្រី១៥៨នាក់ ដោយបានការសហការ ពីគម្រោងអច្ឆរិយភាព នៃទន្លេមេគង្គផងដែរ។

លោក តាំង ម៉េងលាន អភិបាលរងខេត្តកណ្ដាល បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងអនុវត្តការងារ និងកិច្ចសហការរបស់មន្ទីរបរិស្ថានខេត្តកណ្ដាល នាពេលកន្លងមក ដែលបានចូលរួមសហការ យ៉ាងសកម្មបំផុត ដោយបំពេញតួនាទីភារកិច្ចជាសេនាធិការឲ្យរដ្ឋបាលខេត្ត ក្នុងការគ្រប់គ្រងសំរាម សំណង់រឹងទីប្រជុំជន ការរៀបចំលិខិតបទដ្ឋានគតិយុត្តនានា សេចក្តីណែនាំ និងគំរូផែនការងារនានាសំដៅ គាំទ្រដល់ការអនុវត្តមុខងារដែលបានផ្ទេរដោយក្រសួងបរិស្ថាន ជូនរដ្ឋបាលថ្នាក់ក្រោមជាតិឲ្យកាន់តែមានប្រសិទ្ធភាពបន្ថែមទៀត និងដើម្បីរួមចំណែកក្នុងការលើកកម្ពស់ការគ្រប់គ្រងសំរាម សំណល់រឹងទីប្រជុំជន ប្រកបដោយប្រសិទ្ធភាពតម្លាភាព និងគណនេយ្យភាព សំដៅធានាបាននៅសោភ័ណ្ឌភាព ក្រុង-ស្រុក និងកិច្ចគាំពារសុខមាលភាពសាធារណៈជាដើម។

លោកបន្តទៀតថា រដ្ឋបាលខេត្តបានបង្កើតគណៈកម្មការតាមដាន ត្រួតពិនិត្យ និងវាយតម្លៃការគ្រប់គ្រងសំរាមសំណល់រឹងទីប្រជុំជន ដែលមានការអនុវត្តយ៉ាងផុសផុលជាប្រចាំតាមបណ្ដារដ្ឋបាលក្រុង-ស្រុក-ឃុំ-សង្កាត់ បានទទួលអនុវត្តគម្រោងសាងសង់អាងប្រព្រឹត្តិកម្មទឹកកខ្វក់ក្រុងតាខ្មៅ កំណត់ទីលានចាក់សំរាមដែលជាគម្រោងរបស់ធនាគារពិភពលោក និងជំរុញការប្រឡងប្រណាំងផ្ទៃក្នុងភូមិ-ឃុំមានសុវត្ថិភាព វិស័យបរិស្ថាន ដែលរហូតមកដល់ពេលនេះក្រុមការងារខេត្ត បានអនុវត្ត៣ជំហានហើយ ដែលនឹងកំណត់ជ័យលាភីនៅខែមេសាឆ្នាំ២០២៣។

ជាមួយគ្នានេះ លោកស្រី ម៉ុម ថានី រដ្ឋលេខាធិការក្រសួងបរិស្ថាន បានបញ្ជាក់ថា ដើម្បីជំរុញការអភិវឌ្ឍន៍ប្រកបដោយចីរភាព និងក្នុងគោលដៅនៃការធ្វើកំណែទម្រង់មជ្ឈការ និងវិសហមជ្ឈការឲ្យកាន់តែស៊ីជម្រៅ រាជរដ្ឋាភិបាលកម្ពុជា បានប្ដេជ្ញាចិត្តយ៉ាងមុតមាំក្នុងការកែទម្រង់ការដឹកនាំ និងគ្រប់គ្រងក្នុងក្របខណ្ឌរដ្ឋបាលសាធារណៈ ទាំងលើរចនាសម្ព័ន្ធដឹកនាំក្រសួង ស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិ ដើម្បីសម្រេចបាននូវគោលដៅលើកកម្ពស់អភិបាលកិច្ចល្អក្នុងប្រព័ន្ធរដ្ឋបាលសាធារណៈ ដែលជាបុព្វហេតុដ៏សំខាន់នៅក្នុងការឆ្ពោះទៅរកវិបុលភាព និងកិច្ចអភិវឌ្ឍន៍ប្រកបដោយសមធម៌ និងបរិយាប័ន្ន។

លោកស្រីរដ្ឋលេខាធិការបានបន្ថែមថា កិច្ចប្រជុំបូកសរុបលទ្ធផលការងាររបស់មន្ទីរបរិស្ថាននៅពេលនេះ ក្នុងគោលបំណងពិនិត្យលើបញ្ហាប្រឈម និងភាពខ្វះចន្លោះនានាដូចជា ការថយចុះនៃគុណភាពបរិស្ថាន រួមមាន៖ បញ្ហាទឹក ដី ខ្យល់ជាដើម ដែលកត្តាទាំងនេះបានបង្កការរាំងស្ទះដល់ការអនុវត្តគោលនយោបាយវិមជ្ឈការ និងវិសហមជ្ឈការនៅថ្នាក់ក្រោមជាតិ ព្រមទាំងយុទ្ធសាស្ត្រចតុកោណដំណាក់កាលទី៤ ដើម្បីកំណើនការងារសមធម៌ និងប្រសិទ្ធភាពក្នុងការកសាងមូលដ្ឋានឆ្ពោះសម្រេចបាននូវ ចក្ខុវិស័យកម្ពុជាឆ្នាំ២០៥០ ដើម្បីរិះរកដំណោះស្រាយ និងកាលានុវត្តភាពជំរុញឲ្យមានការអនុវត្តប្រព្រឹត្តទៅដោយជោគជ័យ៕