(ភ្នំពេញ)៖ ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២៤ ខែមករា ឆ្នាំ២០២៣នេះ បានចេញសេចក្តីថ្លែងការណ៍ដោយ ប្រកាសបដិសេធចោលទាំងស្រុងចំពោះការផ្សព្វផ្សាយព័ត៌មានមិនពិត ដែលថាប្រទេសកម្ពុជាបានផ្ដល់ជំនួយ យោធាសម្រាប់អ៊ុយក្រែន ដោយ Channel Telegram​ មានឈ្មោះថា «Demografiya upala»។

តាមរយៈសេចក្តីថ្លែងការណ៍របស់ក្រសួងការបរទេស ដែលបណ្តាញព័ត៌មាន Fresh News ទទួលបាននៅយប់ថ្ងៃនេះ និងបានបកប្រែក្រៅផ្លូវការ បានបញ្ជាក់ថា ក្រសួងសូមបញ្ជាក់ឡើងវិញថា ការសម្រេចចិត្តផ្ដល់ជំនួយផ្នែកបណ្ដុះបណ្ដាលបច្ចេកទេស ដោះគ្រាប់មីន ដល់អ្នកដោះមីនមកពីប្រទេសអ៊ុយក្រែន នៅក្នុងប្រទេសកម្ពុជា ក្រោមកិច្ចសហប្រតិបត្តិការជាមួយអង្គការ JICA​ គឺធ្វើឡើងដោយផ្អែកលើគោលការណ៍មនុស្សធម៌សុទ្ធសាធ ដូចគ្នាទៅនឹងបេសកកម្មរក្សាសន្តិភាពនានារបស់កម្ពុជា នៅក្នុងតំបន់អាហ្វ្រិក និងមជ្ឈិមបូព៌ាដូច្នោះដែរ ក្រោមឆត្រអង្គការសហប្រជាជាតិ។

ជុំវិញបញ្ហានេះ ក្រសួងការបរទេស និងសហប្រតិបត្តិការអន្តរជាតិ ជំរុញឱ្យ ChannelTelegram «Demografiya Upala» កែតម្រូវព័ត៌មានខាងលើឡើងវិញនៅលើគណនី ដែលការពិតគ្រុបនេះ មិនត្រឹមតែមិនមែនជាគណនីពិតប្រាកដនោះទេ ប៉ុន្តែវាក៏ធ្វើឱ្យប៉ះពាល់ដល់កម្ពុជា ក្នុងនាមជាប្រទេសមួយស្រឡាញ់សន្តិភាពស្របទៅនឹងគោលនយោបាយការបរទេសអព្យាក្រឹត ដែលមានចែងនៅក្នុងរដ្ឋធម្មនុញ្ញរបស់ខ្លួនផងដែរ។

សូមជម្រាបថា រយៈពេលពេញ១សប្តាហ៍នេះ សិក្ខាកាមរបស់អ៊ុយក្រែន ទទួលបានការហ្វឹកហ្វឺនប្រកបដោយវិជ្ជាជីវៈ និងបទពិសោធន៍លើទីលានចំការមីនជាក់ស្តែង ក្រោមការសហការរវាងគ្រូជំនាញបច្ចេកទេស របស់អង្គភាពស៊ីម៉ាក់ រួមជាមួយនឹងការបង្ហាញបន្ថែម លើឧបករណ៍បច្ចេកវិទ្យាម៉ាស៊ីនរាវមីន ក្រោយពួកគេបានមកកម្ពុជា ដើម្បីរៀនសូត្រ និងទទួលយកបទពិសោធន៍នៃការដោះមីននៅកម្ពុជា។

ក្នុងវគ្គហ្វឹកហ្វឺននេះដែរ សិក្ខាកាមរបស់អ៊ុយក្រែន បានចាប់អារម្មណ៍យ៉ាងខ្លាំង ព្រមទាំងបានសិក្សាស្វែងយល់បន្ថែមទៀត ពីកម្លាំងជំនាញរបស់អង្គភាព CMAC ដែលកំពុងបំពេញប្រតិបត្តិការនៅចំការមីន ដែលអាចឆ្លើយតបទៅនឹងស្ថានភាព នៅប្រទេសអ៊ុយក្រែនផងដែរ ដូចជាកម្លាំងជំនាញបោសសម្អាតមីនដោយគ្រឿងចក្រ និងកម្លាំងជំនាញបោសសម្អាតមីន ដោយការបញ្ជាសុនខ។

ក្រុមសិក្ខាកាមដោះមីនរបស់អ៊ុយក្រែន បានចុះអនុវត្តជាក់ស្តែងនៅតាមខេត្តមួយចំនួនរបស់ប្រទេសកម្ពុជា ដូចជាខេត្តកំពង់ឆ្នាំង ខេត្តសៀមរាប និងខេត្តបាត់ដំបងជាដើម៕