(ក្រិច)៖ បើនិយាយដោយភាពស្មោះត្រង់ ប្រទេសក្រិចមានមូលហេតុច្រើនជាងចក្រភពអង់គ្លេស ក្នុងការ​ខឹង​សម្បា​រជាមួយ​សហភាពអឺរ៉ុប (EU) ហើយក៏មានហេតុផលសមរម្យជាច្រើន ក្នុងការដើរេចេញពី​សហភាព​អឺរ៉ុប​ផងដែរ។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី២៧ ខែមិថុនា ឆ្នាំ២០១៦នេះ។

ទាំងប្រជាជន និងរដ្ឋាភិបាលនៃប្រទេសក្រិច មានអារម្មណ៍មួម៉ៅ ទៅជាលើវិធានការរឹតត្បិតដ៏អាក្រក់​ ដែល​​កំណត់​ដោយ EU និងមូលនិធិរូបិយវត្ថុអន្ដរជាតិ (IMF) មកលើប្រទេសក្រិច។ លក្ខខណ្ឌ​ថវិកាផ្សេង ដែល​ EU និង IMF បានកំណត់ បាននាំឲ្យប្រទេសក្រិច ​ជួបនូវវិបត្តិសេដ្ឋកិច្ចយ៉ាងជ្រៅ នៅក្នុងឆ្នាំនេះ បើទោះបីជា​​លក្ខខណ្ឌទាំងនោះ បាន​ជួយកាត់បន្ថយ​បន្ទុកបំណុល របស់ប្រទេសក្រិចក្ដី។

អ្វីដែលក្រិចត្រូវប្រឈមមុខធំជាងគេ ក្នុងនាមជាសមាជិក EU នោះគឺការទទួលយកជនភៀសខ្លួន ដោយក្នុងនោ ​ក្រិចជាប្រទេសនៅជួរមុខគេ ក្នុងការទទួលយកជនភៀសខ្លួន ដោយត្រឹមរយៈពេល១៨ខែ មាន​ជនភៀសខ្លួនច្រើនជាង ១លាននាក់ ត្រូវបាន​ផ្ដល់ជម្រកដោយរដ្ឋាភិបាលក្រិច ហើយនេះគឺជាបន្ទុកមួយដ៏ធ្ងន់ធ្ងរបំផុត។

យោងតាមមជ្ឈមណ្ឌលស្រាវជ្រាវ Pew បានឲ្យដឹងថា ក្រិចមានហេតុផលច្រើនជាង UK រហូតដល់ ៧១ភាគរយ​ ក្នុងការចាកចេញពី EU ហើយបើតាមការស្រាវជ្រាវរបស់ Pew ក៏បានបង្ហាញឲ្យដឹងផងដែរថា ​មានច្រើនជាង៩០ភាគរយ មិនចេញចិត្តចំពោះវិធី ដែលសហភាពអឺរ៉ុប ដោះស្រាយ​បញ្ហាសេដ្ឋកិច្ច និង​វិបត្តិ​ចំណាកស្រុក៕