(ប៉ៃលិន)៖ នាព្រឹកថ្ងៃអាទិត្យ ថ្ងៃទី២៦ ខែមិថុនា ឆ្នាំ២០១៦ នៅទីស្នាក់ការគណបក្សប្រជាជនខេត្តប៉ៃលិន បានប្រារព្ធមិទ្ទីងអបអរសាទរខួបអនុស្សាវរីយ៍ លើកទី៦៥ (២៨ មិថុនា ១៩៥១-២៨ មិថុនា ២០១៦) ថ្ងៃបង្កើតគណបក្សប្រជាជនកម្ពុជា ក្រោមអធិបតីភាពលោក អ៉ី ឈាន សមាជិក គណៈកម្មាធិការកណ្តាល គណបក្សប្រជាជនកម្ពុជា និងជាប្រធានក្រុមការងារថ្នាក់កណ្តាល ចុះជួយខេត្តប៉ៃលិន ព្រមទាំងមានការចូលរួមពីលោក លោកស្រី សមាជិក សមាជិកាក្រុមការងារចុះជួយខេត្ត និងគណៈកម្មាធិការគណបក្សខេត្ត និងក្រុមការងារយុវជន ព្រមទាំងសមាជិកគណបក្សទូទាំងខេត្ត ប្រមាណជាង ៦៥០នាក់។
ការប្រារព្ធមិទ្ទិញនាឱកាសនេះគឺក្នុងស្មារតីគោរព និងដឹងគុណចំពោះយុទ្ធជន យុទ្ធនារី និងអ្នកស្នេហាជាតិគ្រប់ជំនាន់ ដែលបានតស៊ូប្រយុទ្ធយ៉ាងប្តូរផ្តាច់ លះបង់សាច់ឈាម និងអាយុជីវិត ប្រកបដោយវីរភាពដើម្បីបុព្វេហតុជាតិ និងប្រជាជន ។
ឱកាសនោះ លោក អ៉ី ឈាន ប្រធានក្រុមការងារថ្នាក់កណ្តាលចុះជួយខេត្តប៉ៃលិន បាននាំបណ្តាំផ្ញើសួរសុខទុក្ខពីសំណាក់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ជូនដល់អង្គមិទ្ទីងទាំងមូល ហើយលោកបានថ្លែងជូនដល់សមាជិក សមាជិកទាំងអស់ថា៖ តាំងពីថ្ងៃចាប់ផ្តើមបដិសន្ធិមកទល់ បច្ចុប្បន្ន គណបក្សប្រជាជនកម្ពុជាបានប្រកាន់ខ្ជាប់ឥតប្រែប្រួលនូវគោលបំណង និងឧត្តមគតិរបស់ខ្លួន ដែលផ្សារភ្ជាប់ទៅនឹង គោលការណ៍ ប្រជាធិបតេយ្យប្រជាជន ក្នុងន័យថាគណបក្សប្រជាជនកម្ពុជា គឺជាគណបក្សដែលកើតចេញពី ប្រជាជន មានអត្ថិភាពដោយសារប្រជាជន និងដើម្បីប្រជាជននៅជាមួយប្រជាជន រួមសុខរួមទុក្ខជាមួយប្រជាជនក្នុងគ្រប់កាលៈទេសៈ និងធ្វើជាស្នូលនៃការបង្រួបបង្រួមជាតិ ព្រមទាំងបង្រួបបង្រួមកម្លាំងប្រជាជន គ្រប់ស្រទាប់ជាន់ថ្នាក់ ដោយគ្មានការរើសអើង ដើម្បីបុព្វហេតុនៃប្រទេសកម្ពុជាជាមួយឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត្យ និងវឌ្ឍនភាពសង្គម ។
លោក អ៉ី ឈាន បានបន្តថា មហាជ័យជម្នះជាប្រវត្តិសាស្ត្ររបស់ប្រជាជនកម្ពុជា នាថ្ងៃ ៧ មករា ឆ្នាំ១៩៧៩ លើរបបប្រល័យពូជសាសន៍ប៉ុលពត បានរំដោះជាតិ និងប្រជាជនកម្ពុជាឲ្យមានជីវិតរស់រានជាថ្មីឡើងវិញ ។ ខ្មែរបានបញ្ចប់ការបង្ហូរឈាមរវាងខ្មែរ និងខ្មែរ តាមរយៈ នយោបាយឈ្នះឈ្នះ មកទល់បច្ចុប្បន្នប្រទេសជាតិ មានការរីក ចំរើនឥតឈប់ឈរលើគ្រប់វិស័យ ទាំងនេះគឺក៏ដោយសារការបង្រួបបង្រួមសាមគ្គីរវាងខ្មែរ និងខ្មែរជាធ្លុងមួយ អនុវត្តយ៉ាងសកម្មនូវកម្មវិធីនយោបាយ និងយុទ្ធសាស្ត្រចតុកោណដំណាក់កាលទី១ ទី២ និងទី៣ របស់រាជរដ្ឋាភិបាល ដែលមានគណបក្សប្រជាជនកម្ពុជា ជាអ្នកដឹកនាំបានធ្វើឲ្យប្រទេសជាតិ ជាទីស្រឡាញ់នៃយើងទាំងអស់គ្នា មានសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈដ៏រឹងមាំ សេដ្ឋកិច្ច និងសង្គមជាតិ មានសន្ទុះអភិវឌ្ឍន៍ខ្លាំងក្លា កិត្តិយស និងកិត្យានុភាពជាតិ ត្រូវបានលើកកម្ពស់ឥតឈប់ឈរ។ ក្នុងឱកាសនោះលោក អ៉ី ឈាន ក៏មានឧបត្ថម្ភថវិកា ជូនសមាជិក សមាជិកាគណៈកម្មាធិការគណបក្សទាំង៨ឃុំ សង្កាត់ គ្រប់ៗគ្នាផងដែរ៕
