(តាកែវ)៖ វគ្គបណ្តុះបណ្តាលស្តីពីការពង្រឹងសមត្ថភាពមន្រ្តីអនុវត្តច្បាប់គ្រឿងញៀន ត្រូវបានបិទបញ្ចប់ហើយ នៅល្ងាចថ្ងៃទី១៨ ខែមករា ឆ្នាំ២០២៣ នៅសាលាខេត្តតាកែវ ក្រោមអធិបតីភាពនាយឧត្ដមសេនីយ៍ មាស វិរិទ្ធ អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងលោក យង់ សុវឌ្ឍនា អភិបាលរង និងជាប្រធានលេខាធិការគណកម្មាធិការត្រួតពិនិត្យគ្រឿងញៀនខេត្តតាកែវ។
ក្នុងរបាយការណ៍របស់លោក យង់ សុវឌ្ឍនា បានបង្ហាញពីការយកចិត្តទុកដាក់រៀនសូត្រ ស្តាប់ការចែករំលែកចំណេះដឹង និងបទពិសោធន៍របស់វាគ្មិនជំនាញ និងបានស្នើសុំឱ្យគ្រប់ក្រុងស្រុកទាំងអស់ទូទាំងខេត្តតាកែវ សូមរៀបចំធ្វើបច្ចុប្បន្នភាពគណៈកម្មាធិការត្រួតពិនិត្យគ្រឿងញៀនក្រុង ស្រុក ឃុំ សង្កាត់ ស្រង់ទិន្នន័យអ្នកញៀនគ្រឿងញៀ នៅក្នុងមូលដ្ឋានឃុំសង្កាត់ឱ្យបានហ្មត់ចត់ងាយស្រួលគ្រប់គ្រង និងសម្របសម្រួលពួកគាត់ឱ្យទៅទទួលបានសេវាព្យាបាលអ្នកញៀនគ្រឿងញៀននៅតាមមូលដ្ឋាន។
ក្នុងឱកាសនោះនាយឧត្តមសេនីយ៍ មាស វីរិទ្ធ បានថ្លែងសាទរនូវលទ្ធផលដែលអ្នកពាក់ព័ន្ធទាំងអស់ នៃវគ្គបណ្តុះបណ្តាលរួមគ្នាសម្រេចបាន ដើម្បីពង្រឹងសមត្ថភាពបន្ថែមដល់មន្រ្តីអនុវត្តច្បាប់សំដៅបង្ការ បង្រ្កាបបទល្មើស គ្រឿងញៀន និងជួយឱ្យអ្នកញៀនគ្រឿងញៀនទទួលបានសេវាព្យាបាល «ការគ្រប់គ្រងទិន្នន័យអ្នកញៀនគ្រឿងញៀនបានច្បាស់លាស់ អាចឱ្យវាយតម្លៃបានពីសកម្មភាពជូញដូរគ្រឿងញៀន»។
ក្នុងឱកាសនោះ នាយឧត្តមសេនីយ៍ មាស វីរិទ្ធ អគ្គលេខាធិការ បានប្រាប់ពីស្ថានភាព នៃការបង្វែរសារធាតុគីមីផ្សំដែលបច្ចប្បន្នត្រូវបានឈ្មួញលូចបង្វែរពីការផលិតកែឆ្នៃពីគ្រឿងញៀនពាក់កណ្តាលសំយោគ ទៅជាគ្រឿងញៀន សំយោគសុទ្ធសាធ ហើយបង្កការគ្រោះថ្នាក់ដល់សុខភាពអ្នកប្រើប្រាស់កាន់តែធ្ងន់ធ្ងរជាងមុន។
ជាមួយគ្នានេះ នាយឧត្តមសេនីយ៍ មាស វីរិទ្ធ បានសំណូមពរដល់អ្នកសិក្ខាកាមទាំងអស់ ត្រូវយកចំណះដឹង និងបទពិសោធន៍ដែលទទួលបានពីវគ្គបណ្តុះបណ្តាលនេះទៅប្រើប្រាស់ចាត់តាំង បញ្ជាអនុវត្តដើម្បីបង្កើនប្រសិទ្ធភាព ក្នុងការងារប្រយុទ្ធប្រឆាំងគ្រឿងញៀនក្នុងមូលដ្ឋានរបស់ខ្លួន។
សូមបញ្ជាក់ថា វគ្គបណ្តុះបណ្តាលប្រព្រឹត្តទៅមានរយ:កាលពីរថ្ងៃ១៧-១៨ ខែមករា ឆ្នាំ២០២៣ ជ័យលាភីជាមន្រ្តីអនុវត្តច្បាប់គ្រឿងញៀនមកពីអង្គភាពនិងក្រុង ស្រុក ទាំង១០ នៃខេត្តតាកែវ ចំនួន៨៣នាក់៕
