(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានស្នើប្រព័ន្ធផ្សព្វផ្សាយទាំងអស់ ឲ្យចូលរួមផ្សព្វផ្សាយយុទ្ធនាការរាប់ថយក្រោយ ១០០ថ្ងៃ នៃការឆ្ពោះទៅការប្រកួតកីឡាស៊ីហ្គេម និងប៉ារ៉ាហ្គេម ឱ្យបានផុលផុស នៅថ្ងៃ២៥ ខែមករា ឆ្នាំ២០២៣ ដើម្បីបំផុសស្មារតីដល់ពលរដ្ឋ និងលើកទឹកចិត្តដល់កីឡាករ កីឡាការនី។
ថ្លែងក្នុងឱកាសជួបសំណេះសំណាលជាមួយអ្នកសារព័ត៌មានដោយផ្ទាល់លើកទី៥ នៅមជ្ឈមណ្ឌលសន្និបាត និងពិព័រណ៌កោះពេជ្រ នាល្ងាចថ្ងៃទី១៤ ខែមករា ឆ្នាំ២០២៣ សម្តេចតេជោបានមានប្រសាសន៍ថា នៅថ្ងៃទី២៥ ខែមករា ឆ្នាំ២០២៣ ខាងមុខនេះ គឺជាថ្ងៃយុទ្ធនាការរាប់ថយក្រោយ១០០ថ្ងៃនៃព្រឹត្តិការណ៍ប្រកួតកីឡាស៊ីហ្គេមលើកទី៣២ ឆ្នាំ២០២៣ ដូច្នេះហើយ ប្រព័ន្ធផ្សព្វផ្សាយទាំងអស់ សូមចូលរួមយុទ្ធនាការផ្សព្វផ្សាយយុទ្ធនាការនេះឱ្យបានផុលផុស ដើម្បីឱ្យពលរដ្ឋកម្ពុជាទាំងក្នុង និងក្រៅប្រទេសឱ្យបានដឹង និងបំផុសស្មារតីលើកទឹកចិត្តដល់កីឡាករ កីឡាការនី ឱ្យខិតខំវ៉ឹកហាត់ដើម្បីទទួលបានមេដាយច្រើន ក្នុងការប្រកួតនាពេលខាងមុខ។
សម្តេចតេជោបានមានប្រសាសន៍បន្តថា «អ៊ីចឹងទេ នៅថ្ងៃទី២៥ ខែមករា ខាងមុខនេះ គឺជាថ្ងៃ សល់១០០ ថ្ងៃ ដូច្នេះប្រព័ន្ធផ្សព្វផ្សាយទាំងអស់ធ្វើឱ្យផ្ទុះឡើង ដើម្បីឱ្យប្រជាជនកម្ពុជាទាំងអស់បានដឹងថា យើងចាប់រាប់ថយក្រោយ ពីថ្ងៃទី២៥ គឺ១០០ថ្ងៃ ២៦ សល់៩៩ថ្ងៃ, ទី២៧សល់៩៨ថ្ងៃ និងបន្តបន្ទាប់ក្រោយទៀត។»
ទន្ទឹមគ្នានេះដែរ សម្តេចថែមទាំងអំពាវនាវឱ្យប្រព័ន្ធផ្សព្វផ្សាយ បន្តលើកទឹកចិត្តឱ្យយុវជន និងប្រជាពលរដ្ឋកម្ពុជាគាំទ្រ និងស្នេហាវិស័យកីឡា ក្រោមពាក្យស្លោក «កីឡារស់នៅក្រោមសន្តិភាព ប្រជាជនម្នាក់លេងកីឡាមួយមុខ កម្ពុជាកាត់បន្ថយគ្រោះថ្នាក់ចរាចរណ៍ និងកម្ពុជាស្អាត ដើម្បីលើកទឹកចិត្តឱ្យប្រជាពលរដ្ឋហាត់ប្រាណ លេងកីឡា និងជាពិសេសផ្តោតការយកចិត្តទុកដាក់ក្នុងការកាត់បន្ថយគ្រោះថ្នាក់ចរាចរណ៍។
ជាមួយគ្នានេះ សម្តេចតេជោ ហ៊ុន សែន ប្រកាសថា នឹងយកល្ងាចថ្ងៃទី០៤ ខែមេសា ឆ្នាំ២០២៣ ជួបជាមួយកីឡាករ កីឡាការិនី។
សូមបញ្ជាក់ថា កម្ពុជានឹងធ្វើជាម្ចាស់ផ្ទះលើកដំបូងនៃការប្រកួតកីឡាអាស៊ីអាគ្នេយ៍ ឬស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ នៅថ្ងៃទី០៥ ខែឧសភា ឆ្នាំ២០២៣ ដែលជាព្រឹត្តិការណ៍ជាប្រវត្តិសាស្ត្រថ្មីមួយទៀត សម្រាប់កម្ពុជា។
ការប្រកួតកីឡាអាស៊ីអាគ្នេយ៍ដែលមានប្រទេសចំនួន១១ចូលរួមនេះ ត្រូវបានរៀបចំឡើងរៀងរាល់ពីរឆ្នាំម្តង។ មកដល់ពេលនេះព្រឹត្តិការណ៍នៃការប្រកួតកីឡាអាស៊ីអាគ្នេយ៍ ឬស៊ីហ្គេមនេះ មានរយៈពេល៦៤ឆ្នាំមកហើយ។ ដោយសារតែវិបត្តិនយោបាយ និងសង្គ្រាម ក៏ដូចជាស្ថានភាពសេដ្ឋកិច្ចនៅមានកម្រិតនោះ ធ្វើឱ្យប្រទេសកម្ពុជាមិនធ្លាប់បានធ្វើជាម្ចាស់នៃការប្រកួតនេះឡើយ៕
